3 - സി.കെ. ബാബു

പരസ്പരവിരുദ്ധമായി സംസാരിക്കാറുണ്ടോ?

കാര്യസാദ്ധ്യത്തിനായി‍ സ്പഷ്ടമായ പരസ്പരവൈരുദ്ധ്യം മറച്ചുവച്ചു് സംസാരിക്കാറില്ല.

എന്താണ്‌ സൌന്ദര്യം?

ആഹ്ലാദജനകമായ ആകര്‍ഷണീയത.

ഗായകന്‍, അദ്ധ്യാപകന്‍, കുശിനിക്കാരന്‍, ആശാരി, കോമാളി എന്നീ അഞ്ചു തൊഴിലുകളേ ലഭ്യമുള്ളു എന്നു വന്നാല്‍ താങ്കള്‍ ഏതു തിരഞ്ഞെടുക്കും?

കുളിമുറിഗായകനായ, സ്വന്തം ആവശ്യത്തിനു് പാചകം ചെയ്യുന്ന, സ്വന്തം വീടിന്റെ ആശാരിപ്പണി അടക്കമുള്ള മെയിന്റനന്‍സ് ജോലികള്‍ ചെയ്യുന്ന, അല്പം കോമാളിയായ ഒരദ്ധ്യാപകന്‍.

എന്താണ്‌ ദൈവം?

മാനുഷികഗുണങ്ങളുടെ അമാനുഷികാവിഷ്കരണം.

കായംകുളം കൊച്ചുണ്ണി, വെള്ളായണി പറമു, മുളമൂട്ടില്‍ അടിമ, ഇത്തിക്കര പക്കി, ജംബുലിംഗം തുടങ്ങിയവര്‍ ധനികരെ കവര്‍ന്ന് പാവങ്ങള്‍ക്കു നല്‍കുകയും നാട്ടുനീതി നടപ്പാക്കുകയും ചെയ്തിരുന്നു എന്ന വീരചരിതങ്ങള്‍ ഇഷ്ടമാണോ?

ധനികരെ കൊച്ചുണ്ണിമാര്‍ കവര്‍ന്നാലും, പാവങ്ങളെ രാഷ്ട്രീയക്കാരും, ആത്മീയനേതാക്കളും, ഉദ്യോഗസ്ഥരും കവര്‍ന്നാലും മോഷണം ഒരു വീരതയല്ല. മോഷണം വഴി നടപ്പാക്കുന്നതല്ല, നിയമങ്ങള്‍ വഴി സമ്പത്തിന്റെ നീതിയുക്തമായ വിതരണം പിഴവുപറ്റാതെ നടപ്പാക്കുന്നതാണു് സാമൂഹികനീതി, അതിലാണു് സാമൂഹികവീരത കുടികൊള്ളുന്നതു്.

കുയിലിനെയോ കൊറ്റിയേയോ കൂടുതലിഷ്ടം?

ഇവയില്‍ ഒന്നിനെ കൂടുതലോ, മറ്റേതിനെ കുറച്ചോ ഇഷ്ടപ്പെടുന്നതിനെ ന്യായീകരിക്കാന്‍ തത്കാലം കാരണമൊന്നും കാണുന്നില്ല.

ഈയിടെയായി ഒറ്റയ്ക്കിരിക്കുമ്പോള്‍ ഒരു ഏകാന്തത അനുഭവപ്പെടാറുണ്ടെന്ന് തോന്നുന്നു?

ഒറ്റക്കിരിക്കുമ്പോള്‍ എന്നെ മറ്റാരും കാണാറില്ല. മനുഷ്യന്‍ ഒറ്റക്കിരിക്കുന്നതു് ഏകാന്തതക്കു് വേണ്ടി മാത്രമാവണമെന്നില്ല. ഏകാന്തത അത്ര മോശമാണെന്നും തോന്നുന്നില്ല.

കഷ്ടകാലം എന്നാലെന്താണ്‌?

സംതൃപ്തിയെ അളക്കുന്ന നേര്‍‌രേഖയില്‍ ജീവിതത്തിന്റെ (ആപേക്ഷികമായ) മൂല്യം താഴേക്കു് നീങ്ങുന്ന അവസ്ഥയുടെ അളവു്.

മോഹന്‍ലാല്‍ എന്തു തരം കഴിവുകള്‍ കൊണ്ടാണ്‌ സൂപ്പര്‍സ്റ്റാര്‍ ആയി അറിയപ്പെടുന്നത്‌?

ആരാധിക്കാന്‍ വ്യക്തികളെ തേടുന്ന സമൂഹം അവരുടെ സൂപ്പര്‍സ്റ്റാറുകളെ കണ്ടെത്തും. കഴിവുകളുടെ അംഗീകാരം കൊണ്ടു് തൃപ്തിപ്പെടാന്‍ അങ്ങനെയുള്ളവര്‍ പഠിച്ചിട്ടില്ല.

ബ്ലോഗിൽ അവസാനമായ എഴുതിയ post എന്തിനെഴുതി?

ആദ്യമായി എഴുതിയ പോസ്റ്റ് എഴുതിയ അതേ കാരണത്താല്‍.

മോതിരം, മാല, വാച്ച്‌, ബ്രേസ്‌ലെറ്റ്‌ തുടങ്ങിയവ ധരിക്കാന്‍ ഇഷ്ടമാണോ?

കമ്മലും, മൂക്കുത്തിയും, മറ്റു് പലയിനം പിയേഴ്സിംഗുകളും കൂടി ധരിക്കാന്‍ അനുവാദമുണ്ടെങ്കില്‍.

പുരുഷന്മാര്‍ മാര്‍സില്‍ നിന്നും സ്ത്രീകള്‍ വീനസില്‍ നിന്നുമുള്ളവരാണെന്ന് വിശ്വസിക്കുന്നോ?

സ്ത്രീകളും പുരുഷന്മാരും അമ്മയുടെ ഗര്‍ഭപാത്രത്തില്‍ നിന്നുമുള്ളവരാണെന്നാണു് എന്റെ അറിവു്.

ആന മെലിഞ്ഞാല്‍ തൊഴുത്തില്‍ കെട്ടുന്നതില്‍ തെറ്റുണ്ടോ?

പുറത്തുനിന്നു് മഴയും വെയിലും ഏല്‍ക്കുന്നതില്‍ ഭേദം മെലിഞ്ഞതെങ്കിലും ആനയ്ക്കു് കയറി നില്‍ക്കാന്‍ മതിയായ ഒരു തൊഴുത്തുതന്നെ.

ഏറ്റവും വലുതെന്താണ്‌?

മനുഷ്യരുടെ ഞാന്‍ എന്ന ഭാവം.

കാശ്മീരസന്ധ്യകളേ കൊണ്ടുപോരൂ എന്റെ ഗ്രാമസുന്ദരിക്കൊരു നീലസാരി എന്താ ഈവരിയുടെ അര്‍ത്ഥം?

ഒരു കാശ്മീര്‍ നീലസാരി വേണമെന്നു് ഗ്രാമസുന്ദരി കാമുകനോടു് പറഞ്ഞുകാണണം.

പാമ്പിന്റെ രത്നം, കൊതിയന്റെ വിത്തം, സതീകുചം, കേസരി തന്റെ കേശം. തങ്കളുടെ അഭിപ്രായത്തില്‍ ഈ ഗണത്തില്‍ പെടുന്ന ഒരു മൂന്നെണ്ണം കൂടി പറയാമോ?

ഒലക്കേടെ മൂടു്, വെടിയന്റെ സത്യം, കേശവന്‍ തന്റെ മീശ.

അല്ലാ, പൂച്ച ഏതു നിറമായാലും എലിയെപ്പിടിച്ചാല്‍ പോരേ?

എലിയെ പിടിക്കല്‍ മാത്രമാണു് പൂച്ചയുടെ കര്‍ത്തവ്യമെങ്കില്‍.

പാലുകുടിക്കുമ്പോള്‍ പൂച്ച കണ്ണടയ്ക്കുന്നതെന്തിനാണ്‌?

പാല്‍ത്തുള്ളികള്‍ കണ്ണിലേക്കു് തെറിക്കാതിരിക്കാന്‍.

പൂച്ചക്ക്‌ പൊന്നുരുക്കുന്നിടത്ത്‌ കാര്യമുണ്ടോ?

അതറിയില്ല. പക്ഷേ, പൊന്നു് തൂക്കുന്നിടത്തു് പൂച്ചക്കു് കാര്യമുണ്ടായിരിക്കണം.

മാര്‍ജ്ജാരപ്രണയമോ ഹംസലീലയോ കൂടുതല്‍ മനോഹരം?

മുള്ളന്‍പന്നികളുടെ അതിശ്രദ്ധാപൂര്‍വ്വമായ പ്രണയലീല.

മലയാളം പത്രത്തില്‍ റവന്യൂ സൂപ്രണ്ട്‌ എന്ന ഇംഗ്ലീഷ്‌ പദവിക്കു പകരം ജമാബന്ദിശിരസ്തദാര്‍ എന്നെഴുതേണ്ടതുണ്ടോ? എക്സൈസ്‌ എന്നെഴുതുന്നതോ പിറവക എന്നെഴുതുന്നതോ കൂടുതല്‍ അഭികാമ്യം?

ഇന്നത്തെ സ്ഥിതിക്കു് പത്രക്കാര്‍ റവന്യൂ സൂപ്രണ്ടിനെ നഴ്സിംഗ് സൂപ്രണ്ടെന്നു് എഴുതാതിരുന്നാല്‍ നമ്മള്‍ സന്തോഷിക്കുക.

കുട്ടിയായിരുന്നപ്പോള്‍ ആയിത്തീരണമെന്ന് ആഗ്രഹിച്ചതിനുമപ്പുറത്ത്‌ താങ്കളുയര്‍ന്നോ? എങ്കില്‍ അതില്‍ സന്തോഷിക്കുന്നുണ്ടോ?

എന്തെങ്കിലും ആയിത്തീരാന്‍ ആഗ്രഹിക്കണമെന്നു് എന്നോടു് പറഞ്ഞൊരു കുട്ടിക്കാലം എനിക്കില്ല. എന്റെ സാദ്ധ്യതകളെ നേരിട്ടതിലെ, നേരിടുന്നതിലെ ആത്മാര്‍ത്ഥതയില്‍ ഞാന്‍ സംതൃപ്തനാണു്.

എന്താണ്‌ ശരിയല്ലാത്തത്‌?

എന്റെ ശരി മറ്റുള്ളവരുടെയും ശരി ആവണമെന്ന നിര്‍ബന്ധം.

എന്താണ്‌ സന്തോഷം?

സന്താപമില്ലാത്ത അവസ്ഥയിലെ സംതൃപ്തി.

ആധുനിക കവിതകളെ കുറിച്ച് എന്താണു അഭിപ്രായം

ഭാഷയുടെ ലക്ഷ്യം വ്യക്തമായ ആശയവിനിമയമായിരിക്കണം.

ബ്ലോഗിൽ ഓർമ്മക്കുറിപ്പുകൾ എഴുതുന്നതിനെ കുറിച്ച് എന്താണു് അഭിപ്രായം

ഓര്‍മ്മക്കുറിപ്പുകളില്‍ നിന്നും എനിക്കു് എന്തെങ്കിലും നന്മ ഉള്‍ക്കൊള്ളാനാവുമെങ്കില്‍ എതിരില്ല.

മലയാളം ബ്ലോഗിൽ ഇഷ്ടപ്പെട്ട കവി ആരാണു്.

പലരുണ്ടു്.

മലയാളം ബ്ലോഗിൽ ഇഷ്ടപ്പെട്ട ഓർമ്മ കുറുപ്പ്ist ആരാണു്

ആരുമില്ല.

താങ്കളുടെ Camera ഏതാണു്?

DSLR, Film, Mobile Phone Camera

ഫോട്ടോ ബ്ലോഗുകളെ കുറിച്ചുള്ള അഭിപ്രായം

നല്ലതെങ്കില്‍ നല്ലതു്.

39881.6875