34 - അപ്പു

ചോദ്യങ്ങൾ	ഉത്തരങ്ങൾ
ദൈവത്തെ വഴിയിൽ വെച്ചു് കണ്ടാൽ തിരിച്ചറിയുമോ?	ദൈവത്തെവഴിയില്‍ വച്ച് കണ്ടുമുട്ടാന്‍ ദൈവം മറ്റൊരു ലോകത്ത് ജീവിക്കുന്ന വ്യക്തിയൊന്നുമല്ലല്ലോ! പ്രപഞ്ചത്തിന്റെ ചാലകശക്തിയാണ്‍ ദൈവം എന്നാണെന്റെ വിശ്വാസം. പ്രപഞ്ചം മുഴുവനും‍ ആ ശക്തിയും ചൈതന്യവും നിറഞ്ഞിരിക്കുന്നു. പുളിയും ഉപ്പും മധുരവും വാക്കുകളാല്‍ നിര്‍വചിക്കാനാവാത്ത രുചിഭേദങ്ങളാണെന്നതുപോലെ ദൈവസാമീപ്യവും രുചിച്ചും അനുഭവിച്ചും മനസിലാക്കേണ്ട ഒന്നാണ്‍. ദൈവം സ്നേഹമാണ്‍, നന്മയാണ്‍, ജ്ഞാനമാണ്, നല്ലതുകളുടെ സത്തയാണ്‍.
കടമ, ദൈവം, മതം, കുടുംബം, സ്വത്ത്. നിങ്ങൾക്ക് തോന്നുന്ന പ്രാധാന്യമനുസരിച്ച് ക്രമത്തിൽ എഴുതുക.	ഇസ്ലാം, ഹിന്ദു, ക്രിസ്ത്യാനി തുടങ്ങിയ പേരുകള്‍ക്കുപരി, മതം എന്നത് ഒരു വ്യക്തിയുടെ attitude, പെരുമാറ്റരീതി ആയിരിക്കണമെന്നാണ്‍ എന്റെ അഭിപ്രായം. എന്റെ മതം സ്നേഹമാണ്. എന്റെ സമീപം സഹായം പ്രതീക്ഷിച്ചു നില്‍ക്കുന്ന സഹോദരനെ ദയാപൂര്‍വ്വം നോക്കാതെ ഞാന്‍ ഈശ്വരനെ തേടിച്ചെന്നാല്‍ ആ ഈശ്വരന്‍‍ എനിക്ക് അദൃശ്യനായിരിക്കും. അതിനാല്‍ കടമയ്ക്കാണ്‍ രണ്ടാമതായി ഞാന്‍ പ്രാധാന്യം കൊടുക്കുന്നത് . കടമകള്‍ - സ്വന്തം കുടുംബത്തോടും സമൂഹത്തോടും ചുറ്റുപാടുകളോടുമുള്ള കടമകള്‍‍. മുകളില്‍ പറഞ്ഞവ ജീവിതത്തില്‍ പ്രാവര്‍ത്തികമാക്കുന്നവന്‍ മാത്രമേ ദൈവത്തെ അന്വേഷിച്ച് ചെല്ലേണ്ടതുള്ളൂ. അതിനാല്‍‍ എന്റെ ഉത്തരം മതം> കടമ> കുടുംബം> ദൈവം> സ്വത്ത്
വംശനാശ ഭീഷണി നേരിടുന്ന ഒരു മൃഗത്തെ സംരക്ഷിക്കുന്നതിനായി രണ്ടിടങ്ങളിൽ ഒന്നു തിരഞ്ഞെടുക്കാൻ നിങ്ങളെ ചുമതലപ്പെടുത്തുന്നു. തിരഞ്ഞെടുക്കുന്ന സ്ഥലം പൂർണ്ണമായും ഇടിച്ചു നിരത്തുകയും ചെയ്യും. 1) ഒരു മത വിഭാഗത്തിന്റെ ആരാധനാലയം 2) 10,000 തൊഴിലാളികൾ ജോലി ചെയ്യുന്ന ഒരു വ്യവസായ സ്ഥാപനം.. ഇതിൽ ഏതു തിരഞ്ഞെടുക്കു? എന്തുകൊണ്ടു്?	രണ്ടും ചെയ്യില്ല. ഇത് അല്പം കൂടി വിവേകപൂര്‍വ്വം കൈകാര്യം ചെയ്യേണ്ട വിഷയമാണെന്നാണ്‍ എന്റെ പക്ഷം. വംശനാശഭീഷണി നേരിടുന്ന ആ മൃഗത്തിന്‍ ജീവിക്കാനുതകുന്ന പരിതസ്ഥിതി ഒരിക്കലും ഒരു ആരാധനാലയമോ വ്യവസായശാ‍ലയോ സ്ഥിതിചെയ്യുന്ന പരിസരങ്ങളിലാവാന്‍ വഴിയില്ല -കാട്ടിലായിരിക്കും. ഇനി അഥവാ നാട്ടിലാണെങ്കിലും അനുയോജ്യമായ മറ്റൊരു സ്ഥലം കണ്ടുപിടിക്കുന്നതാണ്‍ നല്ലത്. ദൈവം ഒരു ആരാധനാലയത്തിനുള്ളില്‍ തളച്ചിടപ്പെട്ട ശക്തിയല്ല എങ്കിലും ആരാധനാലയം എന്നത് ഒരുകൂട്ടം വ്യക്തികളുടെ വിശ്വാസത്തിന്റെയും ജീവിതത്തിന്റെയും ഭാഗമാണ്‍. ഇന്ത്യയിലാണെങ്കില്‍ അത് ഭരണഘടന നല്‍കുന്ന അവകാശവും സ്വാന്തന്ത്ര്യവുമാണ്‍. ഒരു കൂട്ടം വ്യക്തികളുടെ അവകാശത്തില്‍ കൈവയ്ക്കുന്നത് സമൂഹത്തിലുണ്ടാക്കുന്ന ഒരു അസ്വസ്ഥതയാണ്. അതേതായാലും നന്നല്ല. വ്യവസാ‍യശാല എന്നത് കുറേപ്പേരുടെ വരുമാനമാര്‍ഗ്ഗമാണ്‍, അന്നമാണ്, രാജ്യത്തിന്റെ സ്വത്താണ് ഇതുരണ്ടും പൊളിക്കുന്നതിനേക്കാള്‍ നല്ലത് മറ്റൊരു സ്ഥലം കണ്ടെത്തുന്നതാണ്. തരിശായി ഇട്ടിരിക്കുന്ന ഒരു വയലായാലോ?!!!
ഗായകന്‍, അദ്ധ്യാപകന്‍, കുശിനിക്കാരന്‍, ആശാരി, കോമാളി എന്നീ അഞ്ചു തൊഴിലുകളേ ലഭ്യമുള്ളു എന്നു വന്നാല്‍ താങ്കള്‍ ഏതു തിരഞ്ഞെടുക്കും?	അദ്ധ്യാപകവൃത്തിതന്നെ. അറിയാവുന്ന അക്ഷരങ്ങള്‍ മറ്റുള്ളവര്‍ക്ക് പകര്‍ന്നുകൊടുക്കുന്ന അദ്ധ്യാപക ജോലിയിലും സന്തോഷം തരുന്ന ഒരു ജോലി എനിക്ക് ഈ ലിസ്റ്റില്‍‍ കാണാനാവുന്നില്ല! കുശിനിയും എനിക്ക് നന്നായി വഴങ്ങും. ഗായകനോ ആശാരിയോ ആയാല്‍ സ്വയം കോമാളിയായിക്കോള്ളും!!!
എന്താണു സൌന്ദര്യം	പഞ്ചേന്ദ്രിയങ്ങള്‍ നമുക്ക് അനുഭവേദ്യമാക്കിത്തരുന്ന എന്തിലും സൌന്ദര്യമുണ്ട്. സൌന്ദര്യം എന്നത് ആപേക്ഷികമാണ്. ഓരോരുത്തരുടെയും നോട്ടം, വീക്ഷണം‍, അഭിരുചി എന്നിവയ്ക്കനുസരിച്ച് സൌന്ദര്യസങ്കല്‍പ്പങ്ങളും മാറും. കുഞ്ഞിന്റെ ചിരിയിലും, കടലിന്റെ രൌദ്രതയിലും, നീലാകാശത്തിന്റെ ശാന്തതയിലും, മൂര്‍ഖന്റെ പത്തിയിലും, പൂവിന്റെ നിറത്തിലും, ശലഭത്തിന്റെ ചിറകിലും, ഈച്ചയുടെ കണ്ണിലും എല്ലാത്തിലും സൌന്ദര്യമുണ്ട്. പൂര്‍ണ്ണമായി സൌന്ദര്യം ആസ്വദിക്കുവാന്‍ കാഴ്ചയോടൊപ്പം ഉള്‍ക്കാഴ്ചകള്‍കൂടി ആവശ്യമാണ്.
നിങ്ങൾക്ക് 20 വർഷം പുറകോട്ടു് നീക്കാൻ അവസരം കിട്ടിയാൽ എന്തു ചെയ്യും	ഇങ്ങനെ സാധിക്കുമായിരുന്നെങ്കില്‍ എത്രനന്നായിരുന്നു! ഒരു പെണ്ണിനെ പ്രേമിക്കാനൊത്തിട്ടില്ല. അതിനു വല്ല ചാന്‍സുമുണ്ടോ എന്നു നോക്കും :-) ഇന്ന് ജെ.സി.ബി.കളും, റബര്‍ തോട്ടങ്ങളും, തരിശാക്കിക്കിടക്കുന്ന പാടങ്ങളും ചേര്‍ന്ന് നശിപ്പിച്ച എന്റെ ഗ്രാമത്തിന്റെ അന്നത്തെ ഭംഗി നന്നായി ആസ്വദിക്കും. ഇവിടെനിന്ന് ഒരു കാമറയും ഹാന്റികാമും കൊണ്ടുപോകാന്‍ സാധിക്കുമെങ്കില്‍ കൊണ്ടുപോയി അതെല്ലാം പകര്‍ത്തിക്കൊണ്ടുപോരുകയും ചെയ്യും; എന്നും കാണാമല്ലോ :-)
കുട്ടിയായിരുന്നപ്പോള്‍ ആയിത്തീരണമെന്ന് ആഗ്രഹിച്ചതിനുമപ്പുറത്ത്‌ താങ്കളുയര്‍ന്നോ? എങ്കില്‍ അതില്‍ സന്തോഷിക്കുന്നുണ്ടോ?	തീര്‍ച്ചയായും. കുട്ടിയായിരുന്നപ്പോള്‍‍ ആഗ്രഹങ്ങള്‍‍ പലതായിരുന്നു. ലക്ഷ്യമില്ലാത്ത പല ആഗ്രഹങ്ങള്‍‍. റെയില്‍‌വേ സ്റ്റേഷന്‍മാസ്റ്റരര്‍‍ ആകണമെന്നതായിരുന്നു ഏറ്റവും വലിയ മോഹം. പക്ഷേ എത്തിപ്പെട്ടത് അതുമായി ഒരുബന്ധവുമില്ലാത്ത ജോലിയിലും. പത്തിരുപതു കൊല്ലം മുമ്പ് എനിക്ക് പ്രതീക്ഷിക്കാവുന്നതിലും എത്രയോ വലിയ നിലയിലാണ്‍ ഞാനിന്ന് ഉള്ളത്. അതില്‍ സന്തോഷവും ഉണ്ട്.
മലയാള ബ്ലോഗിൽ എന്തുകൊണ്ടാണു് സാങ്കേതിക വിഷയങ്ങൾ അധികം ആരും ചർച്ച ചെയ്യാത്തതു്?	മലയാളബ്ലോഗില്‍‍ സാങ്കേതിക വിഷയങ്ങള്‍‍ ആരും ചര്‍ച്ചചെയ്യുന്നില്ല എന്നത് അത്രകണ്ട് ശരിയായ ഒരു പ്രസ്താവനയല്ലെന്നു തോന്നുന്നു. മറ്റുവിഷയങ്ങളിലുള്ള ബ്ലോഗുകളെ അപേക്ഷിച്ച് സാങ്കേതിക കാര്യങ്ങള്‍ പറയുന്ന ബ്ലോഗുകളുടെ എണ്ണം കുറവാണെന്നല്ലേയുള്ളൂ? ഇതിനു പല കാരണങ്ങള്‍ ഉണ്ട്. ഒന്നാമത് സാങ്കേതിക കാര്യങ്ങള്‍‍ അവതരിപ്പിക്കുന്നതിനു അധ്വാനം വളരെ കൂടുതലാണ്. എഴുത്തുകാരന്‍ ആ വിഷയത്തില്‍ നല്ല അറിവുവേണം. അതിനായി നല്ലവായന ആവശ്യമുണ്ട്. രണ്ടാമത് അത് വെട്ടിയൊതുക്കി മലയാളഭാഷയില്‍ അവതരിപ്പിക്കുവാനുള്ള പ്രയാസങ്ങള്‍‍. മൂന്നാമതായി വായനക്കാരുടെ കുറവ്. ഒരു പ്രത്യേകവിഷയത്തില്‍‍ താല്പര്യമുള്ള വായനക്കാര്‍‍ മാത്രമേ ഇത്തരം ബ്ലോഗുകളില്‍ നിത്യസന്ദര്‍ശകരായി ഉണ്ടാവൂ. ഗോമ്പറ്റീഷനിലെപ്പോലെ കമന്റുകള്‍ ആഗ്രഹിച്ചുകൊണ്ട് മലയാളം ബ്ലോഗില്‍ സാങ്കേതികം കൈകാര്യംചെയ്താല്‍ നിരാശയായിരിക്കും ഫലം. ഒന്നും ആഗ്രഹിക്കാതെ എഴുതുക എന്നതാണ് അഭികാമ്യം.
ഇഷ്ടപ്പെട്ട വാഹനം ഏതാണു് ? (philosophy പറഞ്ഞു ഓവറാക്കണ്ട)	അംബാസഡറും മാരുതിയും ഒഴികെയുള്ള കാറുകളാണ്‍ എനിക്കിഷ്ടം. കാറുമാത്രമല്ല, ഗള്‍ഫിലൊക്കെ കാണുന്നതുപോലെയുള്ള നല്ല റോഡും വേണം എങ്കിലല്ലേ കാറുകൊണ്ടുപ്രയോജനമുള്ളൂ! ഹല്ല, അതിനിപ്പോ നല്ലറോഡ് പണക്കാര്‍ക്കു വേണ്ടിയുള്ളതല്ലേ... അതിനാല്‍‍ കേരളത്തിന് അതൊരിക്കലും ആവശ്യമില്ലല്ലോ അല്ലേ ! പാവപ്പെട്ടവന്റെ പണം കൊണ്ട് പണക്കാരന്‍ അങ്ങനെ സുഖിക്കേണ്ട!
മാവോയിസം വീട്ടിൽ ഇന്തു് സംഭവിച്ചു?	ലോറി കേറിപ്പോയി.. അല്ലാതെന്നാ സംഭവിക്കാനാ!
കഷണ്ടിക്ക് മരുന്നു കണ്ടുപിടിച്ചാൽ നിങ്ങൾ എന്തു ചെയ്യും?	ഇങ്ങനെയൊരു മരുന്ന് കണ്ടുപിടിക്കുമെന്ന് വിശ്വാസമില്ല. ഇനി കണ്ടുപിടിച്ചാല്‍ ഈ കണ്ടുപിടിത്തത്തിന്റെ സത്യാവസ്ഥ അറിയുവാന്‍ ഇന്റര്‍നെറ്റില്‍‍ പരതി കിട്ടാവുന്ന സകല വിവരവും ശേഖരിക്കും. കഷണ്ടി എങ്ങനെയാണുണ്ടാകുന്നതെന്നും ഈ മരുന്ന് എങ്ങനെയാണ്‍ അതിനെ പ്രതിരോധിക്കുന്നതെന്നും കണ്ടുപിടിക്കും. സത്യമാണെങ്കില്‍ ഒരു സാമ്പിള്‍‍ വരുത്തി കുറുമാന്റെ കഷണ്ടിത്തലയില്‍ പുരട്ടി പരീക്ഷിക്കും. ആദ്യം പുരട്ടുമ്പോള്‍ മുതല്‍ മുടികിളിര്‍ക്കുന്നതുവരെയുള്ള സകല സ്റ്റെപ്പുകളും ചേര്‍ത്ത് ഒരു ബ്ലോഗ് പോസ്റ്റും പ്രതീക്ഷിക്കാം - ചിത്രങ്ങള്‍ സഹിതം.
കെ. എസ്. കോപാലകൃഷ്ണൻ എന്തുകൊണ്ടു്, അടൂർ ഗോപാലകൃഷ്ണനെ പോലെയും, പദ്മരാജന പോലെയും സിനിമ എറ്റുക്കുന്നില്ല?	അടൂരിന്റെയും പത്മരാജന്റെയും പ്രേക്ഷകരെയല്ല തിയേറ്ററില്‍ കെ.എസ്. പ്രതീക്ഷിക്കുന്നത്. അതുകൊണ്ടുതന്നെ.
ഇപ്പോൾ ഉള്ള "ഭ്രാന്തു്" ഒരു പകർച്ച വ്യാതിയാണോ? താങ്കളെ തൊടുന്നവർക്ക് അത് പകരുമോ?	ഭ്രാന്തുകളും ആ‍പേക്ഷികമായ ഒരു സംഗതിയാണ്‍. വ്യക്തികള്‍ക്കനുസരിച്ച് കൂടിയും കുറഞ്ഞും വരാം. ഒരാളുടെ ഭ്രാന്ത് മറ്റൊരാള്‍ക്ക് ഒരു കഴിവായും വേറെ ഒരാള്‍ക്ക് നട്ടപ്പിരാന്തായും തോന്നുകയും ചെയ്യാം. എന്റെ ഇപ്പോഴത്തെ ഭ്രാന്ത് ഇതില്‍ വന്നുപെടുന്നവര്‍ക്കും പകരുമെന്ന് തോന്നുന്നു..
ഗായകന്‍, അദ്ധ്യാപകന്‍, കുശിനിക്കാരന്‍, ആശാരി, കോമാളി എന്നീ അഞ്ചു തൊഴിലുകളേ ലഭ്യമുള്ളു എന്നു വന്നാല്‍ താങ്കള്‍ ഏതു തിരഞ്ഞെടുക്കും?	ഇതിന്റെ ഉത്തരമല്ലേ അല്പം മുമ്പ് പറഞ്ഞത്.... ? മനുഷ്യന്റെ ക്ഷമ പരീക്ഷിക്കല്ലേ.
നിങ്ങളുടെ തൊഴിൽ മേഖല ഏത് ഗണത്തിൽ പെടും. ഉല്പാതനം കച്ചവടം ജന സേവനം വിനിമയം വിദ്യാഭ്യാസം	ഉല്പാദനം
ഇന്നു നമ്മുടെ നഗരങ്ങളിൽ യുവാക്കൾ നേരിടുന്ന ഏറ്റവും വലിയ പ്രശ്നം എന്താണു്?	നഗരമായാലും നാട്ടിന്‍പുറമായാലും യുവാക്കളുടെ പ്രധാനപ്രശ്നം ലക്ഷ്യബോധമില്ലായ്മയാണ് എന്നെനിക്കുതോന്നുന്നു‍. അതെങ്ങനെ, ഒരു മൊബൈല്‍ ഫോണും ഒരു ബൈക്കും ഒരു ലാപ്ടോപ്പും കുറേ പൈസയും - അതിലപ്പുറം ഒരു ലോകമില്ലല്ലോ പലര്‍ക്കും:-) Initiative ഉള്ളവര്‍ക്ക് ഒന്നും ഒരു പ്രശ്നമോ തടസ്സമോ ആവില്ല.
മലയാള ഭാഷ വളരുകയാണോ, രൂപാന്തരപ്പെടുകയാണോ, വഷളാവുകയാണോ?	ഏതായാലും തളരുകയും വഷളാവുകയുമല്ല. ഇതൊക്കെ ഒരു രൂപാന്തരം മാത്രമല്ലേ.... തള്ളേണ്ടതു തള്ളുക, കൊള്ളേണ്ടതു കൊള്ളുക. അത്രതന്നെ.
മനുഷ്യവാസമില്ലാത്ത ഒരു ദ്വീപിലേക്ക് നിങ്ങളെ ജീവപര്യന്തം നാടുകടത്തപ്പെടാൻ പോവുകയാണെന്നു സങ്കല്പ്പിക്കുക. നിങ്ങൾക്ക് വായിക്കാൻ രണ്ടു പുസ്തകങ്ങൾ കൂടെ കൊണ്ടുപോകാൻ അനുവതിക്കുന്നു. ഏതു് പുസ്തകങ്ങൾ കൊണ്ടുപോകും?	ഐതിഹ്യമാലയും ഷെര്‍ലക് ഹോംസിന്റെ കഥകളും കൂടെക്കൊണ്ടുപോകും.ഒരു ലാപ്ടോപ്പും ഇന്റര്‍നെറ്റ് കണക്ഷനുംകൂടി അനുവദിച്ചുകിട്ടിയിരുന്നെങ്കില്‍ നന്നായിരുന്നു.
കേരളത്തിൽ ഇപ്പോൾ ടിവി. പ്രേക്ഷരുടെ ഹരമായ റിയാലിറ്റി ഷോ എന്നറിയപ്പെടുന്ന അനേകം മത്സര പരമ്പരകളുണ്ടു്. താങ്കൾക്ക് ഒരു സാമാന്യം ഭേതപ്പെട്ട ഗായിക/ഗായകൻ ആണെന്നു സങ്കൽപ്പിക്കുക. താങ്കൾ ഈ മത്സരങ്ങളിൽ പങ്കെടുക്കുമോ? എന്തുകൊണ്ടു?	പങ്കെടുക്കുക പോയിട്ട് കാണുകപോലുമില്ല. അറിഞ്ഞുകൊണ്ട് മറ്റുള്ളവര്‍‍ നമ്മെ വിഡ്ഡികളാക്കന്‍ ഇരുന്നുകൊടുക്കുകയാണ് റിയാലിറ്റി ഷോ കാണുന്നവര്‍ ചെയ്യുന്നത്.ആ സമയം കൊണ്ട് എന്തൊക്കെ 'വിക്കാം' ! അതുവഴി അഞ്ചാററിവുകള്‍ കൂട്ടാമല്ലോ.
ചിത്ര രചന തുടങ്ങിയിട്ട് എത്ര കാലമായി? തുടരുമോ?	ബ്രഷുകൊണ്ടുള്ള ചിത്രരചന എനിക്ക് വശമില്ല.
നിങ്ങളുടേ മുന്നിൽ മൂന്നു buttonകളു ഉണ്ട്. അമർത്തിയാൽ ഈ ലോകത്തിലുള്ള ഏകാധിപതികൾ എല്ലാം നിന്ന നിൽപ്പിൽ തന്നെ ചത്തു് വീഴും. അമർത്തിയാൽ മലയാള മനോരമ പത്രം ഒറ്റ് രാത്രികൊണ്ടു Unicodeലേക്ക് മാറും. അമർത്തിയാൽ (ഇടിവാളിന്റെ ആഗ്രം സഫലമാകും) ബ്ലോഗിൽ ഉള്ള ഓർമ്മ കുറിപ്പിസ്റ്റുകൾക്കെല്ലാം "Amoniasia" വന്നു് എല്ലാം മറന്നു പോകും. ഇതിൽ ഒന്നുമാത്രമെ അമർത്താൻ കഴിയുകയുള്ളു. നിങ്ങൾ ഏതമർത്തും.? എന്തുകൊണ്ടു?"	ഏകാതിപധി എന്നാല്‍ ദുഷ്ടന്‍ എന്നൊരു അര്‍ത്ഥമുണ്ടോ? ആദ്യത്തേതും അവസാനത്തേതും ദൂരവ്യാപകങ്ങളായ അപകടങ്ങള്‍ വരുത്തിവയ്ക്കുന്നവയാണ്‍. രണ്ടാമത്തേത് പ്രത്യേകിച്ച് ഒരു പ്രയോജനവും ഇല്ലാത്തതും. ഒരു ബട്ടണും അമര്‍ത്തേണ്ടതില്ല എന്നാണെന്റെ തീരുമാനം.
ഇവരിൽ താങ്കൾക്ക് ആരെയാണു് കൂടുതൽ ബഹുമാനം: K. കരുണാകരൻ, EMS, AKG, സി.എച്ച്. മുഹമ്മദ്കോയ, മന്നത്ത് പത്മനാഭൻ, പാണക്കാട് സയ്യിദ് മുഹമ്മദലി ഷിഹാബ് തങ്ങൾ. Dr. പല്പ്പു. വെള്ളാപ്പള്ളി നടേശൻ	എ.കെ.ജി
ഒരു് സംഘം അന്യ ഗ്രഹ ജീവികൾ നക്ഷ്ത്ര സഞ്ചാരത്തിനിടയിൽ നിങ്ങളുടേ വീട്ടുമുറ്റത്ത് പേടകം നിർത്തുന്നു. ഈ അവസരം നിങ്ങൾ എങ്ങനെ പ്രയോചനപ്പെടുത്തും? നിങ്ങൾ അവരോടു് എന്തു ചോദിക്കും? ഭൂമിയിൽ മനുഷ്യ പുരോഗമനത്തിന്റെ എന്തെല്ലാം അവർക്ക് കാണിച്ചുകൊടുക്കും?	അവരോട് ചോദിക്കാനാണെങ്കില്‍ ഒരുപാടു ശാസ്ത്രകാര്യങ്ങളുണ്ട്. നക്ഷത്ര രാശികളെപ്പറ്റിയും, പള്‍സാറുകളെപ്പറ്റിയും, സൂപ്പര്‍‍ നോവകളെപ്പറ്റിയും, നക്ഷത്രങ്ങളുടെ ഉത്ഭവത്തെപ്പറ്റിയും ചോദിക്കും. ഡ്രേക്ക് സമവാക്യത്തിന്റെ സത്യാവസ്ഥയെപ്പറ്റി അന്വേഷിക്കും. ന്യൂട്ടണ്‍ നിര്‍വചിച്ച ചലന നിയമങ്ങള്‍ക്കനുസൃതമായാണോ ഇവരുടെ സഞ്ചാരം എന്നതും ചോദിക്കും. മനുഷ്യപുരോഗതിയെപ്പറ്റി ചുരുക്കത്തില്‍ വിവരിക്കാനാവില്ലല്ലോ. അതിനാല്‍ ഭൂമിയില്‍ നിന്ന് അവരുടെ ഗൃഹത്തിലേക്ക് ഒരു ഹൈസ്പീഡ് ഇന്റര്‍നെറ്റ് കണക്ഷനും, ഗൂഗിള്‍ സേര്‍ച്ച് എഞ്ചിനും, ഓക്സ്ഫോഡ് ഡിക്ഷണറിയും കൊടുക്കും. ഡിക്ഷണറിയില്‍ നോക്കി ഓരൊ നാമപദങ്ങളും നോക്കി ഗൂഗിളില്‍ അത് സേര്‍ച്ച് ചെയ്ത് വായിച്ചു പഠിച്ചുകൊള്ളാന്‍ പറയും.
ഇന്ത്യയുടേയും ചൈനയുടേയും സാമ്പത്തീക മുന്നേറ്റത്തിൽ ഇവിടങ്ങളിലെ ഉയർന്ന ജനസംഖ്യയും ഒരു ഘടകമാണെന്ന് താങ്കൾ വിശ്വസിക്കുന്നുവോ?	സാമ്പത്തിക വിഷയത്തില്‍ ഞാന്‍ പിന്നിലാണ്.ജനസംഖ്യകൊണ്ട് ഒരു ഗുണമുണ്ട്. വില്പനക്കാര്‍ക്ക് നല്ലൊരു വിപണികിട്ടും.
എന്താണു് വിലമതിക്കാനാവത്തതു്?	രണ്ടുകാര്യങ്ങള്‍ വിലമതിക്കാനാവാത്തതാണെന്നു ഞാന്‍ കരുതുന്നു. ആദ്യത്തേത് നമുക്ക് ലഭിക്കുന്നതാണ് - നല്ല അച്ഛനമ്മമാര്‍.രണ്ടാമത്തേത് നാം നേടുന്നതാണ് - അറിവ്. ഒരുവന്റെ ജീവിതത്തില്‍ കിട്ടാവുന്ന ഏറ്റവും നല്ലതും വിലമതിക്കാനാവാത്തതുമാണ് ഈ രണ്ടുകാര്യങ്ങള്‍ എന്നാണെനിക്ക് തോന്നുന്നത്‍‍.
നിങ്ങൾ ഒരു ദിവസത്തേക്ക് പ്രധാന മന്ത്രിയാകുന്നു. എന്തു ചെയ്യും?	ടി.എന്‍‍. ശേഷനെ പ്രസിഡന്റാക്കും. എന്നിട്ട് രാജ്യത്ത് പ്രസിഡന്റ് ഭരണം ഏര്‍പ്പെടുത്തി പാര്‍ലമെന്റും പിരിച്ചുവിട്ടതിനു ശേഷം രാജിവച്ച് വീട്ടില്‍‍ വന്ന് സ്വസ്ഥമായിരിക്കും.ബാക്കി പുള്ളിക്കാരന്‍ നോക്കിക്കൊള്ളൂം :-)
നിങ്ങൾക്ക് മൂന്നു വരം കിട്ടുന്നു എന്തെല്ലാം അവശ്യപ്പെടും? (കൂടുതൽ വരം കുട്ടാനുള്ള വരം ഇപ്പോൾ stockൽ ഇല്ല. അതു ചോദിച്ച് ചളമാക്കരുതു്)	1. ഇന്ത്യയിലെ എല്ലാ ജനങ്ങള്‍ക്കും ഒറ്റരാത്രികൊണ്ട് വിവരവും, പക്വമായ രാഷ്ട്രീയാവബോധവും ഉണ്ടാവണം. 2. ആഗോള താപനം Undo ചെയ്ത് ഭൂമിയുടെ അന്തരീക്ഷം 5000 കൊല്ലം മുമ്പുള്ള അവസ്ഥയിലെത്തിക്കണം. 3.മനുഷ്യരുടെ മനസില്‍ നിന്ന് വൈരം, പക എന്നീ വികാരങ്ങള്‍ എടുത്തുമാറ്റാമോ എന്നു ചോദിക്കും.
internetൽ നിന്നും ചിത്രങ്ങളും ലേഖനങ്ങളും അടിച്ചു മാറ്റുന്നവരെ എന്തു ചെയ്യണം?	എന്തുചെയ്യാനാ? പോയതു പോയി.എന്നിരുന്നാലും പ്രസിദ്ധീകരിച്ചയാളുടെ അനുവാദമില്ലാതെ ചിത്രങ്ങളും ലേഖനങ്ങളും കവിതകളും അടിച്ചു മാറ്റുന്നത് വളരെ സഭ്യമായി പറഞ്ഞാല്‍ ചെറ്റത്തരമാണ്. ഇങ്ങനെ ചെയ്യുന്നവരെ എന്തെങ്കിലും ചെയ്യാനാവുമോ എന്ന് എനിക്കറിയില്ല. ഒരു കരിവാരം വേണമെങ്കില്‍ ആചരിക്കാം.
1 Billion US$ നിങ്ങൾക്ക് ലഭിക്കുന്നു എന്തു ചെയ്യും	തിരുവനന്തപുരത്തുനിന്ന് കാസര്‍ഗോഡ് വരെ നീളത്തില്‍ സ്വന്തമായി ഭൂമിവാങ്ങും (എന്തുവിലയും കൊടുക്കും എന്നു കൂട്ടിക്കോളൂ). എന്നിട്ട് അതില്‍കൂടി ഒരു എക്സ്പ്രസ് വേ പണിയും. പിന്നീട് അതുപയോഗിച്ച് എന്തൊക്കെചെയ്യാം എന്നാലോചിക്കും :-) പറ്റിയാല്‍ പത്തുകാശും ഉണ്ടാക്കും. .
പ്രാവാസ ജീവിതത്തിൽ എന്തെങ്കിലും നഷടമായിട്ടുണ്ടോ?	താമസിക്കുന്ന നാടിനെയും സ്വന്തം നാടുപോലെ കരുതുക എന്നതാണെന്റെ നയം! നല്ലത് ഏതു നാട്ടില്‍ കണ്ടാലും ഞാനതിനെ appreciate ചെയ്യും. എന്റെ കേരളം ഒരിക്കലും ഇങ്ങനെ ആവുകയില്ലല്ലോ (നാട്ടാരുടെ കൈയ്യിലിരിപ്പും മന‍സ്സിലിരിപ്പും കൊണ്ട്) എന്ന് കുണ്ഠിതപ്പെടുകയും ചെയ്യും. എങ്കിലും പ്രവാസജീവിതത്തില്‍‍ മിസിംഗ് ആയി തോന്നുന്നത് നാട്ടിലെ മഴയും എന്റെ കുടുംബാംഗങ്ങളേയുമാണ്.
Nostalgia-mania-dingolapi എന്ന അതിഭീകരവും ഭയാനകവുമായ രോഗം ബാദിച്ച മലയാളി ചേട്ടന്മാരെ എങ്ങനെ ചികിത്സിക്കും? ഇവരെ ബീമ പള്ളിയിൽ കൊണ്ടുപോയി ചങ്ങലക്കിടുന്നതിനെ കുറിച്ച് എന്താണു് അഭിപ്രായം.	നൊസ്റ്റാള്‍ജിയ മോശമാണെന്ന് എനിക്ക് അഭിപ്രായമില്ല, എന്നാല്‍ അധികമായാല്‍ അമൃതും വിഷം! മാറ്റങ്ങളെ എപ്പോഴും ഉള്‍ക്കൊള്ളുക. നൊസ്റ്റാള്‍ജിയയും ഓര്‍മ്മകളും ഒരേ ത്രാസില്‍ ഞാന്‍ തൂക്കുന്നില്ല. രണ്ടും രണ്ട്. അനുഭവങ്ങളാണ് ജീവിതത്തിന്റെ ഊടും പാവും നെയ്യുന്നത്? അവയെപ്പറ്റിയുള്ള ഓര്‍മ്മകള്‍ എന്നും ഉണ്ടായിരിക്കണം. ബ്ലോഗുകളില്‍ക്കൂടി ഓര്‍മകളുടെ ചെപ്പുകള്‍ തുറക്കുന്നവരെയാണ്‍ ഒരു വായനക്കാരന്‍ എന്നനിലയില്‍‍ എനിക്ക് കൂടുതല്‍ ‍ ഇഷ്ടം.അതുപോലെ ബ്ലോഗില്‍ എന്റെ അനുഭവങ്ങള്‍ എഴുതുവാനും എനിക്ക് ഇഷ്ടമാണ്.
നിങ്ങൾ ഇപ്പോൾ ഇരിക്കുന്ന സ്ഥലത്തുള്ള ജനാലയിൽ നിന്നും പുറത്തേക്ക് നോക്കുക. അവിടെ കാണുന്ന ദൃശ്യം 100 വാക്കിൽ കുറയാതെ വിവരിക്കുക.	ജനാലയിലൂടെ പുറത്തേക്ക് നോക്കുമ്പോള്‍ താഴെ റോഡ് കാണുന്നുണ്ട്. നടുക്കുള്ള ഡിവൈഡറില്‍ ഒരു ഈത്തപ്പനയുണ്ട്. വണ്ടികള്‍ വരിവരിയായി പോകുന്നു. അല്പം മുമ്പിലായുള്ള സിഗനല്‍ ലൈറ്റ് ചുവപ്പായതിനാലാവാം ആ വശത്തെക്കുള്ള വാഹനങ്ങള്‍ ഇപ്പോള്‍ നില്‍ക്കുകയാണ്. റോഡിന് എതിര്‍വശത്തായി വിശാലമായ ഒരു മൈതാനമുണ്ട്. അതിനു ചുറ്റും വീടുകളാണ്. എതിര്‍വശത്തെ ബാല്‍ക്കണിയില്‍ ഒരു ചേട്ടന്‍ നിന്ന് സിഗററ്റ് വലിക്കുന്നുണ്ട്. ഇടക്കിടെ അകത്തെക്ക് ഒളിഞ്ഞുനോക്കുന്നുമുണ്ട്. ആരെങ്കിലും കാണാതെ വലിക്കുകയാണോ എന്തൊ. മൈതാനത്തിനും അപ്പുറത്തായി ഒരു മുസ്ലിംപള്ളികാണാം. ബാങ്ക് വിളിയും കേള്‍ക്കാം.
ബ്ലോഗിൽ അവസാനമായ എഴുതിയ post എന്തിനെഴുതി? ഇനിയും എഴുതുമോ?	ഒരു കൊച്ചുപെട്ടിയുടെ കഥയാണത്. ഇത്തിരിവെട്ടത്തിനു കയറാന്‍ ഒരു കൊച്ചുവാതായനം മാത്രമുള്ള ഒരു കൊച്ചുപെട്ടി. എന്തിനെഴുതി എന്നുചോദിച്ചാല്‍, എഴുതാന്‍ ഇഷ്ടമായതുകൊണ്ട്. ഇനിയും എഴുതണം.
ബ്ലോഗിൽ അവസാനമായി വായിച്ച ലേഖനം ഏതാണു്?	രോഗങ്ങള്‍‍ വരുമ്പോള്‍‍ നമ്മളില്‍ പലരും കാണിക്കുന്ന ഒരു ദുഃ‍സ്വഭാവത്തെപ്പറ്റിയാണ്‍ ഞാന്‍ അവസാനം വായിച്ചത്.
ബ്ലോഗിൽ അവസാനമായി വായിച്ച കവിത ഏതാണു്?	കവിതകളോട് എനിക്കുവലിയ പ്രതിപത്തിയില്ല; എങ്കിലും പരിചയമുള്ളവരുടെ കവിതകള്‍ കണ്ടാല്‍ നോക്കാറുമുണ്ട്. ചന്ദ്രകാന്തത്തിന്റെ കുടം‌പുളി എന്ന കവിതയാണ് അവസാനം വായിച്ചത്.
ഒരു hotelൽ രണ്ടു blog meet നടക്കുന്നു. അതിൽ ഒരു barൽ ബ്ലോഗ് കവികളും വേറൊരു barൽ ബ്ലോഗ് ഓർമ്മക്കുറുപ്പ്istകളും ഉണ്ടു്. നിങ്ങൾ ഏതു barൽ കയറും.	ഞാന്‍ ബാറുകളില്‍ കയറാറില്ല. പരിചയക്കാരെ കണ്ടാല്‍ ഒരു സലാം പറയും:-)
നിങ്ങൾ കൈപ്പള്ളിയെ കണ്ടു മുട്ടുന്നു. എന്തു ചോദിക്കും?	പത്തു കഥകളി മുദ്രകള്‍ കാണിക്കാമോ എന്നു ചോദിക്കും.
ഒരു International blog meet വിളിച്ചു കൂട്ടുന്നു. അതിനായി താഴെ പറയുന്നവരിൽ നിന്നും കാര്യപരിപാടികൾ അവതരിപ്പിക്കാൻ ആരെയെല്ലാം ഉൾപെടുത്തും? എന്തെല്ലാം പരിപാടികൾ ഉണ്ടായിരിക്കും? ©കുമാർ, Dr. സൂരജ്, Kichu, Prophet of Frivolity, Sul | സുൽ, Zebu Bull::മാണിക്കൻ, അഗ്രജൻ, അഞ്ചൽക്കാരൻ, അനില്‍_ANIL, അപ്പു, അഭിലാഷങ്ങൾ, അമ്പി, അരവിന്ദ്, ആഷ സതീഷ്, ഇഞ്ചിപ്പെണ്ണു്, ഇടിവാൾ, ഇത്തിരിവെട്ടം, ഉന്മേഷ് ദസ്തക്കീര്‍, ഉമേശ്, ഏറനാടന്‍, കരീം മാഷ്, കുറുമാൻ, കുഴൂർ വിൽസൺ, കാപ്പിലാൻ, കേരളഫാര്‍മര്‍, ഗുപ്തൻ, തഥാഗതൻ, തറവാടി, ദില്ബാസുരൻ, ദിവാസ്വപ്നം, ദേവൻ, പ്രിയംവദ, ബെർളിതോമസ്, മുഹമദ് സഗീർ, പണ്ടാരത്തിൽ, യാരിദ്, രാജ് നീട്ടിയത്ത്, രാധേയൻ, വല്ല്യമ്മായി, വിശാല മനസ്കൻ, സുമേഷ് ചന്ദ്രൻ, സിദ്ധാർത്ഥൻ.	ഇങ്ങനൊന്ന് ഒത്തുകിട്ടിയാല്‍ അതൊരു സംഭവം തന്നെയായിരിക്കുമേ...! ഇക്കൂട്ടത്തില്‍ കൈപ്പള്ളിയെ കാണുന്നില്ലല്ലോ. ഈ മഹാബ്ലോഗ് മീറ്റില്‍ ചുമതലകള്‍ ഇനിപ്പറയുന്നവര്‍ക്ക് നല്‍കും. അഗ്രജനും, അപ്പുവും, അഞ്ചല്‍ക്കാരനും കൂടി പബ്ലിക് റിലേഷന്‍സ് വര്‍ക്കുകള്‍ ചെയ്യട്ടെ. സ്ഥലം നിശ്ചയിക്കുക, ബ്ലോഗ് വഴി നോട്ടീസ് വിതരണം അറിയിപ്പ്, ആളുകളെ ക്ഷണിക്കുക തുടങ്ങിയ കലാപരിപാടികള്‍. മാധ്യമ കവറേജ് : കുഴൂര്‍, ബെര്‍ളി തോമസ് ഫോട്ടോഗ്രാഫി: ദിവാസ്വപ്നം, കുമാറേട്ടന്‍ പിന്നെ കാമറകൊണ്ടുവരുന്നവരെല്ലാം. ശാപ്പാട് : കിച്ചു, വല്യമ്മായി , ഉന്മേഷ് ശീതളപാ‍നിയങ്ങള്‍: കുറുമാന്‍ കാര്യപരിപാടികള്‍: അധ്യക്ഷന്‍ : പ്രായത്തില്‍ മുമ്പനായ കേരള ഫാര്‍മര്‍ ഈശ്വരപ്രാര്‍ത്ഥന: ആഷ, അഭിലാഷ് സ്വാഗതം: വിശാല മനസ്കന്‍ കവിതാപാരായണം : കരീം മാഷ്, സഗീര്‍ പണ്ടാരത്തില്‍ സ്കിറ്റ്: കാപ്പിലാന്‍ ആന്റ് ടീം പ്രബന്ധം 1: ആയുര്‍വേദത്തിലെ ഒറ്റമൂലികള്‍ - ഡോ. സൂരജ് പ്രബന്ധം 2: നാലുകെട്ടുകള്‍ ഉണ്ടാക്കുമ്പോള്‍ ശ്രദ്ധിക്കേണ്ട കോപ്പിറൈറ്റ് നിയമങ്ങള്‍ - ഇഞ്ചിപ്പെണ്ണ് നാടകം: ഏറനാടന്‍ ആന്റ് പാര്‍ട്ടി കഥാപ്രസംഗം : ഇത്തിരിവെട്ടം.... പിന്നണിയില്‍ ഇടിവാള്‍, ദില്‍ബന്‍, രാധേയന്‍ മോണോ ആക്റ്റ്: സുല്ലും അരവിന്ദനും ബ്ലോഗ് സിഗ്നല്‍ ലൈറ്റ് - ഡെമോ: തറവാടി, അനില്‍ കഥകള്‍: സതീശന്‍, ഗുപ്തന്‍ സെക്യൂരിറ്റി ഗാര്‍ഡുകള്‍: യാരിദ്, സുമേഷ് ചന്ദ്രന്‍‍, സിദ്ധാര്‍ത്ഥന്‍. ബാക്കിയെല്ലാവരും കാണികള്‍. കൃതജ്ഞത: ദേവന്‍ മതിയോ?
ബ്ലോഗിൽ ആരംഭിക്കുന്ന സൌഹൃദങ്ങളെ താങ്കൾ എങ്ങനെ കാണുന്നു?	ഓര്‍ക്കുട്ട് സ്ക്രാപ് സൌഹൃദങ്ങളല്ല,ആത്മാര്‍ത്ഥതയുള്ള സൌഹൃദങ്ങളെ ഞാന്‍ സീരിയസായി തന്നെ കാണുന്നു. ബ്ലോഗ് വഴി പരിചയപ്പെട്ടതോ അല്ലയോ എന്നതില്‍ കാര്യമില്ല.ബ്ലോഗിലൂടെ അനവധി സുഹൃത്തുക്കളെ എനിക്ക് ലഭിച്ചിട്ടുണ്ടെന്നതിന് എന്റെ മൊബൈലിന്റെ അഡ്രസ് ബുക്ക് സാക്ഷി. അങ്ങ് കിഴക്ക് ഓസ്ട്രേലിയ മുതല്‍ പടിഞ്ഞാറ് അമേരിക്ക വരെ എനിക്ക് അടുത്ത സുഹൃത്തുക്കളുണ്ട്, മിക്കവരും ബ്ലോഗില്‍ നിന്ന് കിട്ടിയവര് :-) .
ഈ പറയുന്ന എഴുത്തുകാരിൽ ആരെയാണു് കൂടുതൽ ഇഷ്ടം: മാധവികുട്ടി, എം. മുകുന്ദൻ, സാറ ജോസഫ്, സക്കറിയ, ഓ.വി. വിജയൻ, ബഷീർ, ആനന്ദ്, വി.കെ.എൻ, തകഴി, എം.ടി വാസുദേവൻ നായർ, പെരുമ്പടവം.	തകഴിയുടെ വരികളിലൂടെ പഴയകാലത്തേക്ക് പോകാന്‍ ഇഷ്ടമാണ്‍.
ആന മെലിഞ്ഞാല്‍ തൊഴുത്തില്‍ കെട്ടുന്നതില്‍ തെറ്റുണ്ടോ?	കെട്ടരുത്. ഓരോരുത്തര്‍ക്കും ഓരോ നിലയും വിലയുമൊക്കെ ഇല്ലേ. മെലിഞ്ഞെന്നു കരുതി ആന ആനയാല്ലാതാവുന്നില്ല. ആനയല്ലാതായെന്ന് ആന വിചാരിക്കേണ്ട കാര്യവുമില്ല. പുറമേയുള്ള കാഴ്ചയിലല്ലകാര്യം, ഒരു വ്യക്തിയുടെ വ്യക്തിത്വത്തിലാണ്. അതുപോലെ കാക്ക കുളിച്ചാല്‍ കൊക്കാവുകയുമില്ല!
ആരുടേയും ബ്ലോഗുകൾ വേണമെങ്കിലും താങ്കൾക്ക് ഡിലീറ്റ് ചെയ്യാം എന്നൊരു അവകാശം ലഭിച്ചാൽ ആദ്യം താങ്കൾ ഡിലീറ്റ് ചെയ്യുന്ന 5 ബ്ലോഗുകളുടെ പേരു പറയുക?	ചോദ്യങ്ങളുടെ സ്റ്റോക്ക് തീര്‍ന്ന് കഷ്ടപ്പെടുകയാണെന്നു തോന്നുന്നു :-) ഒന്നും ഡിലീറ്റ് ചെയ്യില്ല. കാക്കയ്ക്കും തന്‍‌കുഞ്ഞ് പൊന്‍‌കുഞ്ഞ് എന്നല്ലേ പ്രമാണം!
വാർത്തകൾ ഇല്ലായിരുന്നെങ്കിൽ മാധ്യമങ്ങളെന്തു ചെയ്യുമായിരുന്നു?	ഇപ്പോള്‍ മാധ്യമങ്ങള്‍ വാര്‍ത്തകള്‍ ഉണ്ടാക്കുകയല്ലേ ചെയ്യുന്നത്. ഉദാഹരണം, "നിഷാദ് കൈപ്പള്ളി എന്ന ഇസ്ലാം മതവിശ്വാസിയായ യുവാവ് ബൈബിള്‍‍ യൂണിക്കോഡിലാക്കി ഇന്റര്‍നെറ്റില്‍ ചരിത്രം ‍ സൃഷ്ടിച്ചിരിക്കുന്നു" (യൂണിക്കോഡ് എന്താണെന്ന് അവരോട് ചോദിക്കരുത് ... പ്ലീസ്). ഇതുപോലെ അവര്‍‍ വാര്‍ത്തകള്‍ ഉണ്ടാക്കിക്കൊള്ളും.പോരാത്തതിന് രാഷ്ട്രീയക്കാരുള്ളിടത്തോളം വാര്‍ത്തകള്‍ക്ക് പഞ്ഞവുമുണ്ടാകില്ല.