27 - രാജ് നീട്ടിയത്ത്

ചോദ്യങ്ങൾ	ഉത്തരങ്ങൾ
എന്താണു ദൈവം	ആരെയാണോ പേടിക്കേണ്ടത് അവരൊക്കെ ദൈവം. പിണറായി വിജയൻ മുതലങ്ങോട്ട് എല്ലാവരും.
കടമ, ദൈവം, മതം, കുടുംബം, സ്വത്ത്. നിങ്ങൾക്ക് തോന്നുന്ന പ്രാധാന്യമനുസരിച്ച് ക്രമത്തിൽ എഴുതുക.	സ്വത്ത്, കുടുംബം, കടമ, ദൈവം, മതം
വംശനാശ ഭീഷണി നേരിടുന്ന ഒരു മൃഗത്തെ സംരക്ഷിക്കുന്നതിനായി രണ്ടിടങ്ങളിൽ ഒന്നു തിരഞ്ഞെടുക്കാൻ നിങ്ങളെ ചുമതലപ്പെടുത്തുന്നു. തിരഞ്ഞെടുക്കുന്ന സ്ഥലം പൂർണ്ണമായും ഇടിച്ചു നിരത്തുകയും ചെയ്യും. 1) ഒരു മത വിഭാഗത്തിന്റെ ആരാധനാലയം 2) 10,000 തൊഴിലാളികൾ ജോലി ചെയ്യുന്ന ഒരു വ്യവസായ സ്ഥാപനം.. ഇതിൽ ഏതു തിരഞ്ഞെടുക്കു? എന്തുകൊണ്ടു്?	വംശനാശഭീഷണി നേരിടുന്ന “മൃഗം” മനുഷ്യനാണെങ്കിൽ ആരാധനാലയം തിരഞ്ഞെടുക്കും. വംശനാശഭീഷണി അതോടെ തീരും.
ഗായകന്‍, അദ്ധ്യാപകന്‍, കുശിനിക്കാരന്‍, ആശാരി, കോമാളി എന്നീ അഞ്ചു തൊഴിലുകളേ ലഭ്യമുള്ളു എന്നു വന്നാല്‍ താങ്കള്‍ ഏതു തിരഞ്ഞെടുക്കും?	അദ്ധ്യാപകൻ. പെൺകുട്ടികളുടെ ചെവിക്ക് നുള്ളുന്നത് ശീലിച്ചുപോയി.
നിങ്ങൾക്ക് 20 വർഷം പുറകോട്ടു് നീക്കാൻ അവസരം കിട്ടിയാൽ എന്തു ചെയ്യും	മൂന്നാം ക്ലാസിലെ ശ്രീലേഖയെ ഒന്നൂടെ പ്രേമിക്കും.
കുട്ടിയായിരുന്നപ്പോള്‍ ആയിത്തീരണമെന്ന് ആഗ്രഹിച്ചതിനുമപ്പുറത്ത്‌ താങ്കളുയര്‍ന്നോ? എങ്കില്‍ അതില്‍ സന്തോഷിക്കുന്നുണ്ടോ?	കുട്ടി ആയിരുന്നപ്പോൾ ഒന്നും ആഗ്രഹിച്ചില്ല. ആഗ്രഹിക്കാനുള്ള പ്രായമായപ്പോൾ സ്വപ്നം കണ്ടു. സ്വപ്നം കണ്ടാൽ ആഗ്രഹിച്ചത് സ്വപ്നത്തിൽ മാത്രമല്ലേ കിട്ടുകയുള്ളൂ.
കപ്പയും മീനും, പറോട്ട ബീഫ് ഫ്രൈ, BK Double Whopper, KFC Family bucket, Foie gras, പീത്സ, Kabsa (Middle Eastern Biriyani) ഇതിൽ ഏതു ഭക്ഷണമാണു് ഇഷടം. എന്തുകൊണ്ടു്	പീത്സ. അഞ്ചപ്പത്തിൽ നിന്ന് അയ്യായിരം പേരെ ഊട്ടിയവനെ ഓർമ്മവരുന്നതുകൊണ്ട്.
ഇഷ്ടപ്പെട്ട വാഹനം ഏതാണു് ?	കെ.എസ്.ആർ.റ്റി.സി വോൾവോ ഗരുഡ ഡീലക്സ് എക്സ്‌പ്രസ്സ്
കഷണ്ടിക്ക് മരുന്നു കണ്ടുപിടിച്ചാൽ നിങ്ങൾ എന്തു ചെയ്യും?	എനിക്ക് ആവശ്യമുണ്ട്, എന്നാലും ഞാനത് ഉപയോഗിക്കുകയില്ല.
കെ. എസ്. കോപാലകൃഷ്ണൻ എന്തുകൊണ്ടു്, അടൂർ ഗോപാലകൃഷ്ണനെ പോലെയും, പദ്മരാജന പോലെയും സിനിമ എറ്റുക്കുന്നില്ല?	ഇത്തറയും വൈവിധ്യമേറിയ സിനിമകൾ എടുത്ത ആ മനുഷ്യനെ നിങ്ങൾക്കെന്താണുഹേ ഒരു വിലയുമില്ലാത്തത്? ഒന്നില്ലെങ്കിലും തൃശൂർ ഗിരിജ, ഗുരുവായൂർ ബാലകൃഷ്ണ, കുന്ദംകുളം ജവഹർ എന്നിവിടങ്ങളിലൊക്കെ ലുങ്കിമടക്കിക്കുത്തി നിന്ന കാലം മറക്കരുത്.
ഭ്രാന്തു് ഒരു പകർച്ച വ്യാതിയാണോ?	പമ്മന്റെ ഭ്രാന്ത് ഒരു പകർച്ചവ്യാധിയാണ്. എന്റേന്ന് ഒരുത്തൻ പകർത്തിക്കൊണ്ടുപോയിട്ട് തിരിച്ച് തന്നിട്ടില്ല.
നിങ്ങളുടെ തൊഴിൽ മേഖല ഏത് ഗണത്തിൽ പെടും. ഉല്പാതനം കച്ചവടം ജന സേവനം വിനിമയം വിദ്യാഭ്യാസം	വിനിമയം, കച്ചവടം
ഇന്നു നമ്മുടെ നഗരങ്ങളിൽ യുവാക്കൾ നേരിടുന്ന ഏറ്റവും വലിയ പ്രശ്നം എന്താണു്?	എറണാകുളത്താണെങ്കിൽ കൊതുകടി. തൃശൂരാണെങ്കിൽ തേക്കിൻ കാട് മൈതാനം. ദുബായിലാണെങ്കിൽ അസ്റ്റോറിയ ഹോട്ടൽ, നെയ്ഫ് റോഡ് ഇത്യാദികൾ.
മമ്മൂട്ടി എന്തു തരം കഴിവുകള്‍ കൊണ്ടാണ്‌ സൂപ്പര്‍സ്റ്റാര്‍ ആയി അറിയപ്പെടുന്നത്‌?	അഥർവ്വത്തിൽ സിൽക്ക് സ്മിതയെ മുന്നിലിരുത്തി പൂജിച്ചിട്ടും മച്ചൂന്റെ കണ്ട്രോള് വിട്ടില്ല. അതാണ് പ്രധാന കഴിവ്. ലാലേട്ടന് അതില്ലല്ലോ :(
മലയാള ഭാഷ വളരുകയാണോ, രൂപാന്തരപ്പെടുകയാണോ, വഷളാവുകയാണോ?	ഇവിടെ ഞെക്കുക എന്നു മലയാളം കമ്പ്യൂട്ടർ വിശാരദന്മാർ തർജ്ജമതുടങ്ങിയതോടെ “വഷളനായി”
എന്താണു് സമൂഹിക പ്രതിബദ്ധത?	പൊതുവാഹനങ്ങളിൽ സഞ്ചരിക്കുമ്പോൾ മൊബൈൽ ഫോണിന്റെ സ്പീക്കറിലിട്ട് പാട്ടു കേൾക്കാതിരിക്കുക
കേരളത്തിൽ ഇപ്പോൾ ടിവി. പ്രേക്ഷരുടെ ഹരമായ റിയാലിറ്റി ഷോ എന്നറിയപ്പെടുന്ന അനേകം മത്സര പരമ്പരകളുണ്ടു്. താങ്കൾക്ക് ഒരു സാമാന്യം ഭേതപ്പെട്ട ഗായിക/ഗായകൻ ആണെന്നു സങ്കൽപ്പിക്കുക. താങ്കൾ ഈ മത്സരങ്ങളിൽ പങ്കെടുക്കുമോ? എന്തുകൊണ്ടു?	പങ്കെടുക്കും. എല്ലാവരേയും കരയിപ്പിക്കുവാൻ എനിക്കിഷ്ടമാണ്.
നിങ്ങളുടേ മുന്നിൽ മൂന്നു buttonകളു ഉണ്ട്. അമർത്തിയാൽ ഈ ലോകത്തിലുള്ള ഏകാധിപതികൾ എല്ലാം നിന്ന നിൽപ്പിൽ തന്നെ ചത്തു് വീഴും. അമർത്തിയാൽ മലയാള മനോരമ പത്രം ഒറ്റ് രാത്രികൊണ്ടു Unicodeലേക്ക് മാറും. അമർത്തിയാൽ (ഇടിവാളിന്റെ ആഗ്രം സഫലമാകും) ബ്ലോഗിൽ ഉള്ള ഓർമ്മ കുറിപ്പിസ്റ്റുകൾക്കെല്ലാം "Amoniasia" വന്നു് എല്ലാം മറന്നു പോകും. ഇതിൽ ഒന്നുമാത്രമെ അമർത്താൻ കഴിയുകയുള്ളു. നിങ്ങൾ ഏതമർത്തും.? എന്തുകൊണ്ടു?"	ആരെ അമർത്തുന്നതാണ് ഇടിവാളിന്റെ ആഗ്രഹം? ഞാൻ ആ ബട്ടൺ എങ്ങാൻ അമർത്തിയിട്ട് പിണറായി വിജയനോ കൊടിയേരിയോ മയ്യത്താ‍യാൽ എന്നെ ആർ.എസ്.എസ് എന്നു വിളിച്ചു കളിയാക്കാൻ അല്ലേ. ആ പൂതി മനസ്സില് വെച്ചാൽ മാത്രം മതി.
ഇവരിൽ താങ്കൾക്ക് ആരെയാണു് കൂടുതൽ ബഹുമാനം: K. കരുണാകരൻ, EMS, AKG, സി.എച്ച്. മുഹമ്മദ്കോയ, മന്നത്ത് പത്മനാഭൻ, പാണക്കാട് സയ്യിദ് മുഹമ്മദലി ഷിഹാബ് തങ്ങൾ. Dr. പല്പ്പു. വെള്ളാപ്പള്ളി നടേശൻ	പിറവി കണ്ടതിനു ശേഷം കരുണാകരൻ എന്നോർക്കുമ്പോൾ അസഹ്യമായ വെറുപ്പുതോന്നാറുണ്ട്. എ.കെ.ജി ഡോ.പല്പു എന്നിവരോട് ബഹുമാനമുണ്ട്.
ഒരു് സംഘം അന്യ ഗ്രഹ ജീവികൾ നക്ഷ്ത്ര സഞ്ചാരത്തിനിടയിൽ നിങ്ങളുടേ വീട്ടുമുറ്റത്ത് പേടകം നിർത്തുന്നു. ഈ അവസരം നിങ്ങൾ എങ്ങനെ പ്രയോചനപ്പെടുത്തും? നിങ്ങൾ അവരോടു് എന്തു ചോദിക്കും? ഭൂമിയിൽ മനുഷ്യ പുരോഗമനത്തിന്റെ എന്തെല്ലാം അവർക്ക് കാണിച്ചുകൊടുക്കും?	ഞാനവർക്ക് മഹാഭാരതകഥ വായിച്ചു കേൾപ്പിക്കും. ദില്ലി-6 -ലെ പാട്ടുകൾ കേൾപ്പിച്ചു കൊടുക്കും. അവരുടെ നാട്ടിൽ ചെഗുവേരെ എന്ന പൈങ്കിളി വിപ്ലവകാരിയുണ്ടോ എന്നു ചോദിക്കും. മനുഷ്യപുരോഗതിയുടേതായി അവർക്കൊരു ജിമെയിൽ ഇൻ‌വൈറ്റ് അയച്ചുകൊടുക്കും :-)
ഇന്ത്യയുടേയും ചൈനയുടേയും സാമ്പത്തീക മുന്നേറ്റത്തിൽ ഇവിടങ്ങളിലെ ഉയർന്ന ജനസംഖ്യയും ഒരു ഘടകമാണെന്ന് താങ്കൾ വിശ്വസിക്കുന്നുവോ?	ക്വാന്റിറ്റി != ക്വാളിറ്റി.
നിങ്ങൾ ഒരു ദിവസത്തേക്ക് പ്രധാന മന്ത്രിയാകുന്നു. എന്തു ചെയ്യും?	പൊതുസ്ഥലങ്ങളിൽ മതപരമായ വസ്തുതകൾ പ്രദർശിപ്പിക്കുന്നതു നിരോധിക്കും.
നിങ്ങൾക്ക് മൂന്നു വരം കിട്ടുന്നു എന്തെല്ലാം അവശ്യപ്പെടും?	1. ഇതിനു താഴെയുള്ള ചോദ്യത്തിൽ ഒരു ബില്യൺ യു.എസ് ഡോളർ ലഭിക്കുന്നു എന്നു കരുതാൻ പറഞ്ഞിട്ടുണ്ട്. അത് സത്യമാവണം. 2. ഒരു ദിവസം പ്രധാനമന്ത്രിയാക്കണം 3. സ്വിച്ചിട്ടാൽ ഇൻ‌വിസിബിൾ മാൻ ആവാൻ കഴിയുന്ന എന്തെങ്കിലും വരം ചോദിക്കും.
കേരളത്തിൽ beef നിരോധിച്ചാൽ നിങ്ങൾ എന്തു് ചെയ്യും?	ബീഫ് എന്നു പറയുമ്പോൾ വലിയ കൺഫ്യൂഷനുണ്ട്. മൂരി അതായത് നന്ദിയുടെ നാടൻ അളിയൻ അതോ പോത്ത് അതായത് കാലന്റെ വാ‍ഹനം എന്നതിൽ ഏതൊക്കെയാണ് നിരോധിക്കുക എന്നറിഞ്ഞാൽ കൊള്ളാം. തമാശകൾ മാറിയിരിക്കട്ടെ, നിരോധനം എന്ന വാക്ക് പേടിപ്പെടുത്തുന്നതാണ്. അധികാരം അതിന്റെ തൊട്ടുപിന്നിലുണ്ടല്ലോ. കഴിയാവുന്നത്ര ജനാധിപത്യപരമായി ചെറുത്തുനിൽക്കാൻ ശ്രമിക്കും.
1 Billion US$ നിങ്ങൾക്ക് ലഭിക്കുന്നു എന്തു ചെയ്യും	സഹ്യപർവ്വതം വിലയ്ക്ക് വാങ്ങും
പ്രാവാസ ജീവിതത്തിൽ എന്തെങ്കിലും നഷടമായിട്ടുണ്ടോ?	ശുക്ലം
കടലിലെ മത്സ്യങ്ങൾക്ക് ദാഹിക്കുമോ?	കടൽ വെള്ളം വറ്റിച്ചാൽ ഉപ്പായി മാറുമോ?
നിങ്ങൾ ഇപ്പോൾ ഇരിക്കുന്ന സ്ഥലത്തുള്ള ജനാലയിൽ നിന്നും പുറത്തേക്ക് നോക്കുക. അവിടെ കാണുന്ന ദൃശ്യം 100 വാക്കിൽ കുറയാതെ വിവരിക്കുക.	രണ്ട് കൊറോളാ, ഒരു മിസ്തുബിഷി പജേറൊ, നിസ്സാൻ റ്റിഡാ മൂന്ന് എണ്ണം, സി ക്ലാസ് ബെൻസ് ഒരെണ്ണം, ലാൻസർ ഒന്ന്, കാമ്രി റ്റാക്സി ആയി ഓടുന്നത് ഒന്ന് അല്ലാത്തത് രണ്ട്...
മലമുകളിൽ നിന്നും കല്ല് ഉരുട്ടിയിട്ട ശേഷം നാറാണത്തു ഭ്രാന്തനെ കണ്ടുമുട്ടുന്നു്. എന്തെല്ലാം ചോദിക്കും?	അടുത്ത കല്ല് ഉരുട്ടിക്കയറ്റി വന്നശേഷം പ്ലീസ് എനിക്ക് ഉന്തിയിടാൻ തരണംട്ടോ എന്ന്
ബ്ലോഗിൽ അവസാനമായ എഴുതിയ post എന്തിനെഴുതി? ഇനിയും എഴുതുമോ?	വാൽമീകി രാമായണത്തിലെ ഒരു കഥാപാത്രം തന്നെയാണ്. വ്യാസൻ ഭാരതത്തിലെ കഥാപാത്രവുമാണ്. രാമനെ ഒന്നു പൊട്ടിക്കാൻ വാൽമീകിക്കോ ധൃതരാഷ്ട്രരെ ഒന്ന് പൊട്ടിക്കാൻ വ്യാസനോ കഴിയാത്തോണ്ടാണല്ലോ അവരു ഈ രാമായണവും ഭാരതവുമൊക്കെ എഴുതിയത്. അതുപോലെയൊക്കെ തന്നെയിഷ്ടാ ഇമ്മടെ കാര്യവും.
ബ്ലോഗിൽ അവസാനമായി വായിച്ച ലേഖനം ഏതാണു്?	ശശി തരൂരിന്റെ സ്ഥാനാർതിത്വത്തെചൊല്ലിയുള്ളത്. മെർകുഷ്യോയുടെ ബ്ലോഗിൽ
ബ്ലോഗിൽ അവസാനമായി വായിച്ച കവിത ഏതാണു്?	അബ്ദുവിന്റെ കവിത.
ഒരു hotelൽ രണ്ടു blog meet നടക്കുന്നു. അതിൽ ഒരു barൽ ബ്ലോഗ് കവികളും വേറൊരു barൽ ബ്ലോഗ് ഓർമ്മക്കുറുപ്പ്istകളും ഉണ്ടു്. നിങ്ങൾ ഏതു barൽ കയറും.	ഓർമ്മക്കുറിപ്പിസ്റ്റുകൾ സ്വന്തം ചെലവിൽ മദ്യംവിളമ്പി ഓർമ്മക്കുറിപ്പ് വായിച്ചു കേൾപ്പിക്കും എന്ന ദുരന്തമുണ്ട്, കവികൾ നമ്മളെ മുക്കി ഓസിന് കുടിക്കുമെന്ന വേറെദുരന്തവും. മദ്യദുരന്തം എന്നാൽ ഇതൊക്കെ ആണല്ലോ! അതുകൊണ്ട് ഇക്കൂട്ടത്തിൽ ഡാൻസ് ഉള്ള ബാറിൽ പോകും. അതാണെങ്കിൽ ലാഭം സുനിശ്ചിതം.
നിങ്ങൾ കൈപ്പള്ളിയെ കണ്ടു മുട്ടുന്നു. ഒരു ചോദ്യം ചോദിക്കാൻ അവസരം തരുന്നു. എന്തു ചോദിക്കും?	ഈ മത്സരവും മറ്റുമായി നടന്ന് കൈപ്പള്ളി ആളാകെ തമാശക്കാരനായ മട്ടുണ്ട്. അല്ലെങ്കിൽ ഇങ്ങേര് “തമാശ പരിപാടിയാണെന്നുള്ളതു് എല്ലാവരും ഓർക്കുക. എന്നെ എന്തു പറഞ്ഞാലും ഞാൻ ക്ഷമിക്കും.“ ഇങ്ങനെയൊക്കെ എഴുതുമോ? എന്തായാലും കിട്ടിയ അവസരത്തിൽ കൈപ്പള്ളിയെ ചാടുകേറ്റാൻ ഇതുപോലെ വേറെ എന്തെങ്കിലും മത്സരം പ്ലാൻ ചെയ്യുന്നുണ്ടോ എന്നു ചോദിക്കും (കാറ്റാടി യന്ത്രത്തിൽ നിന്നും വൈദ്യുതിയുണ്ടാക്കുന്നതു പോലെ കൈപ്പള്ളി സംസാരിക്കുന്നതിൽ നിന്നും വൈദ്യുതി ഉണ്ടാക്കാൻ പറ്റുന്ന യന്ത്രം വേണം)
ബ്ലോഗിൽ ആരംഭിക്കുന്ന സൌഹൃദങ്ങളെ താങ്കൾ എങ്ങനെ കാണുന്നു?	ബോറായി കാണുന്നു.
ഒരു ദിവസം ശ്രീ പെരുമ്പടവം Dostoevsky കണ്ടുമുട്ടുന്നു്, എന്തു സംഭവിക്കും?	ദസ്തയോവ്സ്കി അങ്ങേരെ ഓടിച്ചിട്ട് അടിക്കും. പറ്റിയാൽ ഞാൻ പിടിച്ചു നിർത്തിക്കൊടുക്കും. നന്നായി പെരുമാറട്ടെ അങ്ങട്ട്.
ഈ പറയുന്ന എഴുത്തുകാരിൽ ആരെയാണു് കൂടുതൽ ഇഷ്ടം: മാധവികുട്ടി, എം. മുകുന്ദൻ, സാറ ജോസഫ്, സക്കറിയ, ഓ.വി. വിജയൻ, ബഷീർ, ആനന്ദ്, വി.കെ.എൻ, തകഴി, എം.ടി വാസുദേവൻ നായർ, പെരുമ്പടവം.	യങ് കമലയുടെ വലിയ ആരാധകൻ ആണ് ഞാൻ. മലയാളി വായിച്ച് വായിച്ച് ബഷീറിനെ ഇല്ലാതാക്കി. എന്നാലും അനുരാ‍ഗത്തിന്റെ ദിനങ്ങളും നീലവെളിച്ചവും ബാല്യകാലസഖിയും എനിക്ക് മലയാണ്മയാണ്. തകഴി, പെരുമ്പടവം, എം.മുകന്ദൻ ഒഴികെ മറ്റെല്ലാവരേയും പലകാലങ്ങളിൽ പലപ്പോഴായും മറ്റുള്ളവരേക്കാൾ കൂടുതൽ ഇഷ്ടപ്പെട്ടിട്ടുണ്ട്. ഇപ്പോൾ ഇഷ്ടം ആനന്ദിനെ.
ആന മെലിഞ്ഞാല്‍ തൊഴുത്തില്‍ കെട്ടുന്നതില്‍ തെറ്റുണ്ടോ?	കുറേനാൾ തൊഴുത്തിൽ കെട്ടിയാൽ ഗോമൂത്രം പോലെ ആനമൂത്രം പുണ്യാഹമാവില്ലെങ്കിൽ ഓക്കേയ്.
ആരുടേയും ബ്ലോഗുകൾ വേണമെങ്കിലും താങ്കൾക്ക് ഡിലീറ്റ് ചെയ്യാം എന്നൊരു അവകാശം ലഭിച്ചാൽ ആദ്യം താങ്കൾ ഡിലീറ്റ് ചെയ്യുന്ന 5 ബ്ലോഗുകളുടെ പേരു പറയുക?	“വരവേല്പ്” സിനിമയിലെ മുരളിയെ പോലെ സംസാരിക്കുന്ന എല്ലാ ഇടതുപക്ഷ ബ്ലോഗന്മാരെയും.
വാർത്തകൾ ഇല്ലായിരുന്നെങ്കിൽ മാധ്യമങ്ങളെന്തു ചെയ്യുമായിരുന്നു?	വാർത്തകൾ ഉണ്ടാക്കും.