4 - രാധേയൻ

പരസ്പരവിരുദ്ധമായി സംസാരിക്കാറുണ്ടോ?

കൂടുതലും അങ്ങനെയാണ്.അഫിപ്രായം ഇരുമ്പുലക്കയല്ലെന്ന് പറഞ്ഞ് സി വി കുഞ്ഞിരാമനാണ് നമ്മുടെ ഗുരു.അല്ലെങ്കില്‍ തന്നെ പ്രപഞ്ചം എന്ന റിലേറ്റിവിറ്റിയില്‍ ഞാന്‍ മാത്രം എന്തിന് സ്തംഭം കുഴിച്ചിട്ട പോലെ നില്‍ക്കണം

എന്താണ്‌ സൌന്ദര്യം?

നമ്മുടെ സങ്കല്‍പ്പങ്ങള്‍ക്കൊത്ത് വഴങ്ങി തരുന്ന മറ്റൊരു അനുഭവം.വെളുത്ത് കൊലുന്നനേയുള്ള ഐശ്വര്യാ റായില്‍ ദര്‍ശിക്കാത്ത സൌന്ദര്യം എന്തു കൊണ്ട് കറുത്ത് തടിച്ച കജോളില്‍ ഞാന്‍ കാണുന്നു.കറുത്ത് തടിച്ച് നിറനിതംബിനിയായ താടകയാണ് ആര്യയായ സീതയെക്കാള്‍ എന്നെ ഉത്തേജിപ്പിച്ചത്.ഒന്നുണ്ട്,സ്വഭാവം സൌന്ദര്യം കൂട്ടുന്ന ഒട്ടനവധി പേരുണ്ട്.കാഴ്ച്ചയുടെ ലക്ഷണശാസ്ത്രങ്ങളെ അപ്രസക്തമാക്കുന്ന പെരുമാറ്റത്തിന്റെ ജാലവിദ്യ.ഒരുദാഹരണം പറഞ്ഞാല്‍ ... അല്ലേല്‍ വേണ്ട ക്ലൂ ആയാലോ

എന്താണ്‌ ദൈവം?

ദൈവം-വിശ്വസിക്കുന്നവന് ആശ്വാസവും,വിശ്വസിക്കാത്തവന് അതില്ല എന്നു തെളിയിക്കാനുള്ള തലവേദനയും നല്‍കുന്ന അല്‍ഭുത പ്രതിഭാസം.ശങ്കറ് സിമന്റിനെ പോലെ തകര്‍ക്കാന്‍ കഴിയാത്തതാണ് വിശ്വാസം.മറ്റേ കൊളൈഡര്‍ ഇനി എന്തു തന്നെ തെളിയിച്ചാലും.യുക്തി കൊണ്ടോ ശാസ്സ്ത്രം കൊണ്ടോ ദൈവത്തെ ഇല്ല എന്നു തെളിയിക്കാന്‍ കഴിയില്ല.കാരണം ഇവയൊന്നും പണവിട ചേര്‍ക്കാതെ ആണ് ദൈവം എന്ന വിശ്വാസം രൂപപ്പെട്ടിരിക്കുന്നത്.ലോകത്തെ സമസ്ത ദുരിതങ്ങളും ഭീഷണികളും സംഘര്‍ഷങ്ങളും ചൂഷണവും അവസാനിക്കുന്നതിന്റെ അന്ന് ദൈവം മരിക്കും അലേല്‍ ഈ പണി രാജി വെയ്ക്കും...

കായംകുളം കൊച്ചുണ്ണി, വെള്ളായണി പറമു, മുളമൂട്ടില്‍ അടിമ, ഇത്തിക്കര പക്കി, ജംബുലിംഗം തുടങ്ങിയവര്‍ ധനികരെ കവര്‍ന്ന് പാവങ്ങള്‍ക്കു നല്‍കുകയും നാട്ടുനീതി നടപ്പാക്കുകയും ചെയ്തിരുന്നു എന്ന വീരചരിതങ്ങള്‍ ഇഷ്ടമാണോ?

ഉവ്വ്,നീതി നിഷേധിക്കപ്പെറ്റുന്നതിലും നല്ലത് അനീതിയിലൂടെ എങ്കിലും നീതി സ്ഥാപിക്കപ്പെടുകയല്ലേ,പിന്നെ വീര കഥകള്‍ ആര്‍ക്കാണ് ഇഷ്ടമല്ലാത്തത്.

കുയിലിനെയോ കൊറ്റിയേയോ കൂടുതലിഷ്ടം?

വെടിയിറച്ചി ആണെങ്കില്‍ കൊറ്റി നല്ലത്.പശ്ചാത്തലസംഗീതത്തിന് കുയില്‍ നല്ലത്.

ഈയിടെയായി ഒറ്റയ്ക്കിരിക്കുമ്പോള്‍ ഒരു ഏകാന്തത അനുഭവപ്പെടാറുണ്ടെന്ന് തോന്നുന്നു?

ഒറ്റക്കിരിക്കുമ്പോളല്ലാതെ ആള്‍കൂട്ടത്തിലിരിക്കുമ്പോള്‍ ഏകാന്തത അനുഭവപ്പെടുമോ കൈപ്പള്ളി സാറേ(ഭീട് മേ സബ് സേ ജുദാ രഹ്താ ഹൈ എന്നൊക്കെ ഗസല്‍ പാടുമെങ്കിലും).ഒറ്റക്കിരിക്കാന്‍ ഇഷ്ടമാണ്.കടല്‍ തീരത്ത് അല്ലെങ്കില്‍ മലമുകളില്‍ ഒക്കെ.ഏറ്റവും ഇഷ്ടമുള്ള പഴയ ഒരു വിനോദം ആകാശത്തേക്ക് നോക്കി നക്ഷത്രങ്ങളെ എണ്ണി കിടക്കുകയാണ്.

കഷ്ടകാലം എന്നാലെന്താണ്‌?

അങ്ങനെ ഒരു കാലം വന്നിട്ടില്ല.(വിനയന്റെ സിനിമയില്‍ കണ്ടത് വേണേല്‍ പറയാം.).എന്നും നല്ലതും ചീത്തയും ഒക്കെ കലര്‍ന്ന ഒരേ കാലത്തിലാണ് എന്റെ ജീവിതത്തിന്റെ അഷ്ടപദി കൊട്ടിപ്പാടുന്നത്.നേരത്തെ പറഞ്ഞത് പോലെ ഇവയൊക്കെ അപേക്ഷികമല്ലേ

മോഹന്‍ലാല്‍ എന്തു തരം കഴിവുകള്‍ കൊണ്ടാണ്‌ സൂപ്പര്‍സ്റ്റാര്‍ ആയി അറിയപ്പെടുന്നത്‌?

ലാലയിരിക്കാന്‍ ലാലിന് വേഗം കഴിയും.ഏത് കഥാപാത്രത്തെയും ലാലായി മാറ്റാന്‍ മോഹന്‍ലാലിനു കഴിയും.ലാലിന്റെ മാനറിസങ്ങള്‍,കുസൃതികള്‍,ചിരി,കണ്ണിറുക്ക്,തലകുത്തി മറിയല്‍ ഇവയെ എല്ലാം കഥാപാത്രത്തിലേക്ക് കയറ്റും.ഇതൊക്കെയാണ് അദ്ദേഹത്തെ സ്റ്റാറാക്കുന്നത്.പക്ഷെ ഒരുഭാസക്കര പട്ടേലരെ ആഖ്യായനം ചെയ്യാന്‍ അദ്ദേഹത്തിനു ബുദ്ധിമുട്ടാണെന്നല്ല,തീരെ കഴിയില്ല തന്നെ.കഥാപാത്രമായി ജീവിക്കാന്‍ ലാല്‍ നല്ലത്, ഒരു കഥാപാത്രാത്തെ ആവിഷ്ക്കരിക്കാന്‍ മോശം.

ബ്ലോഗിൽ അവസാനമായ എഴുതിയ post എന്തിനെഴുതി?

ഒട്ടു മിക്ക പോസ്റ്റുകളും സാമൂഹികപ്രശ്നങ്ങള്‍ എന്നില്‍ ഉണര്‍ത്തുന്ന അലയൊലികളുടെ ഭാഗമായി എഴുതുന്നതാണ്.അതിന് അങ്ങനെ വലിയ ലക്ഷ്യങ്ങളൊന്നുമില്ല.ചില കാര്യങ്ങള്‍ ഉറക്കെ പറയാഞ്ഞാല്‍ ചങ്ക് കഴപ്പ് അനുഭവപ്പെടും,പ്പറഞ്ഞു കഴിഞ്ഞാല്‍ അപ്പിയിട്ടതിനേക്കാള്‍ സുഖമാണ്.(പിന്നെ ആ അമേധ്യം വായിക്കുന്നവന്റെ പ്രശ്നമായി എന്നല്ലേ നിങ്ങള്‍ ഇപ്പോള്‍ ആലോചിച്ചത്)

മോതിരം, മാല, വാച്ച്‌, ബ്രേസ്‌ലെറ്റ്‌ തുടങ്ങിയവ ധരിക്കാന്‍ ഇഷ്ടമാണോ?

മോതിരമിട്ടാല്‍ കൈ ചൊറിയും,ബ്രേസ്‌ലെറ്റ് ഇഷ്ടമല്ല.വാച്ച് അങ്ങനെ ധരിക്കാറില്ല.മാല ധരിക്കാറുണ്ട്.ഇഷ്ടാ‍നുഷ്ടങ്ങളെക്കാള്‍ ചില ശരീരപ്രകൃതവുമായാണ് അതിന് ബന്ധം

ആന മെലിഞ്ഞാല്‍ തൊഴുത്തില്‍ കെട്ടുന്നതില്‍ തെറ്റുണ്ടോ?

വലിയ തൊഴുത്താണെങ്കില്‍ മെലിഞ്ഞില്ലെങ്കിലും കെട്ടുന്നതില്‍ എനിക്ക് വിരോധമില്ല.ആനയോട് ചൊദിച്ചിട്ട് ചെയ്യണം.വെളുപ്പാന്‍ കാലത്ത് കൊമ്പനാനയെ കറക്കാന്‍ ചെല്ലരുതെന്ന് കറവക്കാരനോട് പറഞ്ഞേക്കണം.വെറുതെ എന്തിനാ മോന്ത മോഹന്‍ലാലിന്റെ പോലെ ആക്കുന്നത്?

ഏറ്റവും വലുതെന്താണ്‌?

ശ്രീവിദ്യയുടെ (അല്ലെങ്കില്‍ വേണ്ട,മരിച്ചവരെ കുറിച്ച് വേണ്ടാതീനം പറയുന്നില്ല) അമ്പാസിഡര്‍ കാറിന്റെ ഡിക്കി.

കാശ്മീരസന്ധ്യകളേ കൊണ്ടുപോരൂ എന്റെ ഗ്രാമസുന്ദരിക്കൊരു നീലസാരി എന്താ ഈവരിയുടെ അര്‍ത്ഥം?

ഗ്രാമസുന്ദരി തോട്ടില്‍ കുളിക്കാനിറങ്ങിയിരിക്കുകയാണ്.കാശ്മീര സന്ധ്യ നീലസാരി കൊണ്ടു വന്നിട്ട് വേണം കരയില്‍ കയറാന്‍

പാമ്പിന്റെ രത്നം, കൊതിയന്റെ വിത്തം, സതീകുചം, കേസരി തന്റെ കേശം. തങ്കളുടെ അഭിപ്രായത്തില്‍ ഈ ഗണത്തില്‍ പെടുന്ന ഒരു മൂന്നെണ്ണം കൂടി പറയാമോ?

വേറെ മൂന്നു കൊള്ളാവുന്ന അന്യസ്ത്രീകളുടെ കുചം

അല്ലാ, പൂച്ച ഏതു നിറമായാലും എലിയെപ്പിടിച്ചാല്‍ പോരേ?

ഇരുട്ടത്ത് വരുമ്പോള്‍ എലിക്ക് ദൂരേന്ന് കണ്ണില്‍ പിടിക്കുന്ന ഫ്ലൂറസന്റ് കളറിലെ പൂച്ചയാണെങ്കില്‍....... നിറം ഒരു പ്രശ്നമാണ് മാഷേ

പാലുകുടിക്കുമ്പോള്‍ പൂച്ച കണ്ണടയ്ക്കുന്നതെന്തിനാണ്‌?

ഞാന്‍ സ്മോളടിക്കുമ്പോള്‍ കണ്ണട്ക്കുകയും ചിറി കോട്ടുകയുമൊക്കെ ചെയ്യുന്നത് എന്തിനാണെന്ന് തന്നെ എനിക്ക് പിടിയില്ല പിന്നാണ് പൂച്ചയുടെ കാര്യം.ചൊട്ടയിലെ ശീലമാ ചേട്ടാ, കൊണ്ടേ പോകൂ

പൂച്ചക്ക്‌ പൊന്നുരുക്കുന്നിടത്ത്‌ കാര്യമുണ്ടോ?

പൂച്ചയെന്താ കൈപ്പള്ളിയുടെ അളിയനോ മറ്റോ ആണോ?ഫുള്‍ പൂച്ച.പൊന്നുരുക്കുന്നിടത്തിരിക്കുന്ന പൂച്ചയെകുറിച്ച് മാത്രമേ പ്രിയദര്‍ശന്‍ ഹിന്ദിയിലും മലയാളത്തിലും സിനിമയെടുക്കൂ

മാര്‍ജ്ജാരപ്രണയമോ ഹംസലീലയോ കൂടുതല്‍ മനോഹരം?

ഞാന്‍ ആ ടൈപ്പല്ല,കണ്ടവന്റെയൊക്കെ ****സീന്‍ എത്തി നോക്കാന്‍.മനുഷ്യന്റെ തന്നെ കാണാന്‍ സമയമില്ല.(എന്നാലും ആനയുടെ ****സീനൊന്നു കണ്ടാല്‍ കൊള്ളാമെന്നൊണ്ട്

മലയാളം പത്രത്തില്‍ റവന്യൂ സൂപ്രണ്ട്‌ എന്ന ഇംഗ്ലീഷ്‌ പദവിക്കു പകരം ജമാബന്ദിശിരസ്തദാര്‍ എന്നെഴുതേണ്ടതുണ്ടോ? എക്സൈസ്‌ എന്നെഴുതുന്നതോ പിറവക എന്നെഴുതുന്നതോ കൂടുതല്‍ അഭികാമ്യം?

കൈപ്പള്ളിയുടെ പദമുദ്രക്ക് ഡിമാന്‍ഡ് കുറഞ്ഞാല്‍ ഇങ്ങനെ പലതും തോന്നും....നിഘണ്ടുവും കൊണ്ട് പോകേണ്ടി വരും സര്‍ക്കാരാപ്പീസില്‍,ക്ഷമിക്കണം ഭരണകാര്യാലയങ്ങളില്‍...

കുട്ടിയായിരുന്നപ്പോള്‍ ആയിത്തീരണമെന്ന് ആഗ്രഹിച്ചതിനുമപ്പുറത്ത്‌ താങ്കളുയര്‍ന്നോ? എങ്കില്‍ അതില്‍ സന്തോഷിക്കുന്നുണ്ടോ?

ഓരോ കാലത്ത് ഓരോ മോഹമായിരുന്നു.കുട്ടികാലത്ത് സിനിമാനടന്‍ ജയനാകണമെന്നായിരുന്നു.പിന്നെ സിവില്‍ സര്‍വ്വന്റ് ആകണമെന്ന് ആഗ്രഹിച്ചു. രാഷ്ട്രീയക്കാരന്‍,മാധ്യമക്കാരന്‍,തിരക്കഥാകൃത്ത് അങ്ങനെ കൊഴിഞ്ഞതും കൊഴിയാത്തതുമായ മോഹങ്ങള്‍ ഇനിയും ധാരാളം.ഒന്നുമായില്ലെങ്കിലും സന്തോഷത്തിനു കുറവില്ല.

എന്താണ്‌ ശരിയല്ലാത്തത്‌?

എല്ലാം ശരി തന്നെ,ചെയ്യുന്നവന്റെ കണ്ണില്‍.എങ്കിലും നിയമവ്യവസ്ഥ അനുസരിച്ച് ജീവിക്കുന്നിടത്തോളം നിയമം വിലക്കിയതൊന്നും ചെയ്യുന്നത് ശരിയല്ല.നിയമവ്യവസ്ഥയോട് കലഹിക്കാന്‍ തീരുമാനിച്ചു കഴിഞ്ഞാല്‍ പിന്നെ ഇത് ബാധകമല്ല(ഗാന്ധിജിയുടെ സിവില്‍ നിയമലംഘനസമരം പോലെ).ഒരു വ്യക്തിയുടെ മനസാക്ഷിക്ക് നിരക്കാത്ത കര്‍മ്മമാണ് ശരിയല്ലാത്തത്.വ്യക്തിയുടെ മനസാക്ഷി നിയമങ്ങള്‍ പിന്നീട് സമൂഹത്തിന്റെ മനസ്സക്ഷി നിയമമാകുകയും പിന്നീട് അത് വ്യവസ്ഥിതിയുടെ അംഗീകൃതനിയമസംഹിതയുടെ ഭാഗമാവുകയുമാണ് നടപ്പ് രീതി.എങ്കിലും യോജിക്കാത്ത പല നിയമങ്ങളുമുണ്ട്.ഉദാഹരണം നമ്മുടെ നാട്ടിലെ ഇമ്മോറല്‍ ട്രാഫിക്ക് നിയമങ്ങള്‍.

എന്താണ്‌ സന്തോഷം?

ആത്മപുച്ഛമില്ലാതെ ചെയ്യുവാന്‍ കഴിയുന്ന പ്രവര്‍ത്തികള്‍ കൊണ്ടു തരുന്ന ഒരു അനുഭവമാണ് സന്തോഷം.സ്വന്തം മനസാക്ഷിയെ കേട്ട് മുന്നോട്ട് പോകുമ്പോള്‍ മാത്രമേ അത് കിട്ടൂ.പണമാണ് സന്തോഷം,സെക്സാണ് സന്തോഷം,നാറ്റില്‍ പോകലാണ് സന്തോഷം,നല്ല ആഹാരമാണ് സന്തോഷം,കരുണകാട്ടലാണ് സന്തോഷം,ബ്ലോഗ് ചെയ്യലാണ് സന്തോഷം, പാട്ടു കച്ചേരി കേള്‍ക്കലാണ് സന്തോഷം,ഇതൊന്നുമല്ല സന്തോഷം,പക്ഷെ ഇതിലെല്ലാം എന്റെ സന്തോഷങ്ങള്‍ ഉണ്ട്.

ആധുനിക കവിതകളെ കുറിച്ച് എന്താണു അഭിപ്രായം

നല്ലതു ചീത്തയുമായ അഭിപ്രായങ്ങള്‍.വൃത്തത്തിന്റെയും അലങ്കാരത്തിന്റെയും സാമ്പ്രദായികത വിട്ടൊഴിഞ്ഞത് ആശയത്തിന് കൂടുതല്‍ പ്രാധാന്യം നല്‍കാന്‍ സാധിക്കും.ഇത് മലയാളത്തിലേക്ക് പുതിയ ആശയങ്ങള്‍ കൊണ്ടുവരാന്‍ സഹായിക്കേണ്ടതാണ്.ദോഷം വാള്‍ എടുത്തവനെല്ലാം(എടുത്തവളെല്ലാം) വെളിച്ചപ്പാട് തുള്ളുന്നത് നാം സഹിക്കേണ്ടി വരുന്നു.ആര്‍ത്തവം,രതി,മൈഥുനം തുടങ്ങിയ ചില വാക്കുകള്‍ അവിടെയും ഇവിടെയും തിരുകി ഒരു കൌപീനക്കെട്ടിലെ പേരും നല്‍കിയാല്‍ ആര്‍ക്കും കവിയാകാം.അച്ചടിക്കുമ്പോള്‍ ആര്‍ക്കും തിരിയാത്ത ഒരു പടവും വരപ്പിച്ച് പുറം ചട്ടയിലിടണം.

ബ്ലോഗിൽ ഓർമ്മക്കുറിപ്പുകൾ എഴുതുന്നതിനെ കുറിച്ച് എന്താണു് അഭിപ്രായം

ഓര്‍മ്മക്കുറിപ്പുകള്‍ നല്ലത് തന്നെ,പക്ഷെ നൊസ്റ്റാള്‍ജിയ ചെടിക്കും.കാരണം ഗ്രാമങ്ങളിലോ ഇടത്തരം പട്ടണങ്ങളിളോ താമസിച്ച 90% ബ്ലോഗറുമാരുടെയും കുട്ടിക്കാലത്തിലെ അനുഭവങ്ങളും സമാനമായിരിക്കണം.അപ്പോള്‍ പിന്നെ ഒന്നുകില്‍ എഴുത്തിലൂടെ അതിന് പുതിയ ഭാവുകത്വങ്ങള്‍ നല്‍കണം,അല്ലെങ്കില്‍ വിശാലനെ പോലെ രസിപ്പിക്കുന്ന ഒരു ഭാഷ വേണം.പക്ഷെ എല്ലാ ഓര്‍മ്മക്കുറിപ്പുകളെയും ഈ വിഭാഗത്തില്‍ പെടുത്താന്‍ ആവില്ല.ഉദാഹരണത്തിന് പി.സായ്‌നാഥ് തന്റെ പത്രപ്രവര്‍ത്തനത്തിന്റെ ഭാഗമായി നടത്തിയ യാത്രകളെ കുറിച്ച് ഒരു ഓര്‍മ്മക്കുറിപ്പെഴുതിയാല്‍ അത് വായിക്കപ്പെടുക തന്നെ വേണം.കാരണം അതില്‍ സമുഹത്തിനായി നടത്തിയ ഒരു യജ്ഞത്തിന്റെ കനലുകള്‍ ചാരം പുതഞ്ഞു കിടക്കുന്നുണ്ടാകും

മലയാളം ബ്ലോഗിൽ ഇഷ്ടപ്പെട്ട കവി ആരാണു്.

ശരിക്കും പറഞ്ഞാല്‍ പല കവിതയും വായിച്ച് മുഴുവനാക്കാന്‍ തോന്നാറില്ല. പരമ ബോറാണ്.എങ്കിലും വില്‍‌സന്റെ ചില കവിതകള്‍ വളരെ നന്നായി തോന്നിയിട്ടുണ്ട്

മലയാളം ബ്ലോഗിൽ ഇഷ്ടപ്പെട്ട ഓർമ്മ കുറുപ്പ്ist ആരാണു്

വിശാലന്‍,ഇടിവാള്‍,കൊച്ചു ത്രേസ്യ... ഇവരൊക്കെ എഴുതുന്നത് ഓര്‍മ്മക്കുറിപ്പുകളാണെങ്കില്‍.പിന്നെ പ്രദീപ് എന്നോ മറ്റോ പേരുള്ള ഒരു ബ്ലോഗര്‍ എഴുതുന്ന രതി സ്മരണകള്‍ ഇഷ്ടമായിരുന്നു.പക്ഷെ അധികം പറഞ്ഞ് അയാള്‍ തന്നെ ബോറാക്കി.

39881.71119