5 - അഞ്ചൽക്കാരൻ

പരസ്പരവിരുദ്ധമായി സംസാരിക്കാറുണ്ടോ?

ഏയ് ഞാനത്തരക്കാരനല്ല, ഒന്നു ചിന്തിയ്ക്കും. മറ്റൊന്നു പ്രവര്‍ത്തിയ്ക്കും. വേറൊന്നു പറയും. അഥവാ: ചിന്തിയ്ക്കുന്നതൊന്നും പ്രവര്‍ത്തിയ്ക്കില്ല, പറയുന്നതൊന്നും ചിന്തിയ്ക്കില്ല,

എന്താണ്‌ സൌന്ദര്യം?

കണ്ടാല്‍ അറപ്പുണ്ടാകാത്തത്. വീണ്ടും കാണാന്‍ ആഗ്രഹം ജനിപ്പിയ്ക്കുന്നത്. കണ്ടു കൊണ്ടേയിരിയ്ക്കണമെന്നു തോന്നുന്നത്. കണ്ടിട്ടും കണ്ടിട്ടും മതിയാവാത്തത്,

ഗായകന്‍, അദ്ധ്യാപകന്‍, കുശിനിക്കാരന്‍, ആശാരി, കോമാളി എന്നീ അഞ്ചു തൊഴിലുകളേ ലഭ്യമുള്ളു എന്നു വന്നാല്‍ താങ്കള്‍ ഏതു തിരഞ്ഞെടുക്കും?

ആദ്യം പാടി നോക്കും. കേള്‍വിക്കാര്‍ തല്ലിയോടിയ്ക്കും. പിന്നെ പഠിപ്പിയ്കാന്‍ നോക്കും. അക്ഷരം അറിയാത്തതു കൊണ്ട് വിദ്യാര്‍ത്ഥികള്‍ പഠിപ്പിച്ചു തുടങ്ങും. അങ്ങിനെ അദ്ധ്യാപനവും ഒഴിവാക്കും. പിന്നെ ഏതെങ്കിലും അടുക്കളയില്‍ ചേക്കേറും. പാചകം അറിയാത്തതുകൊണ്ട് അവിടുന്നും ചവിട്ടി പുറത്താക്കും. ആശാരിയാകന്‍ കൊട്ടൂടി വേണ്ടെ? കൊട്ടൂടി എടുക്കാന്‍ മറന്നു. അപ്പോ പിന്നെ എന്താ ചെയ്ക? ഇപ്പോ ചെയ്തു കൊണ്ടിരിയ്ക്കുന്ന പണിയങ്ങു തുടരും. കോമാളിയായി വീണ്ടും ജീവിയ്ക്കും!

എന്താണ്‌ ദൈവം?

കണ്ണുകാണാതെ നില്‍ക്കുമ്പോള്‍ കൈ നല്‍കുന്നവന്‍. കൈവിട്ടു പോയതിനെ പോറൊലൊന്നുമേല്‍ക്കാതെ തിരിച്ച് നല്‍കുന്നവന്‍. ജീവിത പാതയിലെപ്പോഴും കൂട്ടായി നില്‍ക്കുന്നവന്‍.

കായംകുളം കൊച്ചുണ്ണി, വെള്ളായണി പറമു, മുളമൂട്ടില്‍ അടിമ, ഇത്തിക്കര പക്കി, ജംബുലിംഗം തുടങ്ങിയവര്‍ ധനികരെ കവര്‍ന്ന് പാവങ്ങള്‍ക്കു നല്‍കുകയും നാട്ടുനീതി നടപ്പാക്കുകയും ചെയ്തിരുന്നു എന്ന വീരചരിതങ്ങള്‍ ഇഷ്ടമാണോ?

ഇതെന്നാ ചോദ്യം സര്‍. പത്തൊമ്പതാം നൂറ്റാണ്ടില്‍ ചോയിയ്ക്കേണ്ട ചോദ്യം ഇപ്പോഴാ ചോദിയ്ക്കുന്നത്? അന്നാണ് ഈ ചോദ്യമെങ്കില്‍ ഒരുത്തരം തരാന്‍ ശ്രമിയ്ക്കാമായിരുന്നു. ഇപ്പോള്‍ മേല്‍ സൂചിപ്പിച്ചവരൊക്കെയല്ലേ ധനികന്മാര്‍. തട്ടിപ്പറിയ്ക്കണമെങ്കില്‍ അവരുടെ കയ്യിമ്മേന്നു തട്ടിപ്പറിയ്ക്കണം. അതൊരു കടും കയ്യായിരിയ്ക്കും. അതു കൊണ്ട് ഈ ചോദ്യം അസാധുവാക്കണം.

കുയിലിനെയോ കൊറ്റിയേയോ കൂടുതലിഷ്ടം?

കുയിലിനെ. എങ്ങിനെ ജീവിയ്ക്കണമെന്നു കുയിലില്‍ നിന്നും പഠിയ്ക്കണം. ഒറ്റക്കാലില്‍ തപസ്സു ചെയ്തതു കൊണ്ടൊന്നും ഇക്കാലത്ത് ജീവിയ്ക്കാന്‍ പറ്റൂല്ല. അതിനു കുയിലിന്റെ തന്ത്രങ്ങളും കുതന്ത്രങ്ങളും ഒക്കെ പരീക്ഷിയ്ക്കേണ്ടി വരും. ഇതു ടോപ്പ് സീക്രട്ടാ. ഞാനിങ്ങനെ പറഞ്ഞെന്ന് ആരോടും പറയല്ലേ. അപ്പോ വീടെവിടാ‍ന്നാ പറഞ്ഞേ?

ഈയിടെയായി ഒറ്റയ്ക്കിരിക്കുമ്പോള്‍ ഒരു ഏകാന്തത അനുഭവപ്പെടാറുണ്ടെന്ന് തോന്നുന്നു?

ബാത്ത് റൂമിലല്ലേ? അതു ശരിയാണ്. ബാത്ത് റൂമില്‍ കേറുമ്പോഴൊക്കെ ഒരു ഏകാന്തത അനുഭവപ്പെടാറുണ്ട്. അപ്പോ അവിടിരുന്നു പാടിയാണ് ഏകാന്തത മാറ്റാറ്.

കഷ്ടകാലം എന്നാലെന്താണ്‌?

വിചാരിയ്ക്കുന്നതൊന്നും സംഭവിയ്ക്കാതിരിയ്ക്കുന്ന കാലം. വഴിയേ പോകുന്ന വയ്യാവേലി തലയില്‍ വലിഞ്ഞു കേറുന്ന കാലം. സംഭവിയ്ക്കുന്നതെല്ലാം പ്രതീക്ഷകള്‍ക്ക് വിപരീതമാകുന്ന കാലം.

മോഹന്‍ലാല്‍ എന്തു തരം കഴിവുകള്‍ കൊണ്ടാണ്‌ സൂപ്പര്‍സ്റ്റാര്‍ ആയി അറിയപ്പെടുന്നത്‌?

മറ്റൊരു മോഹന്‍ലാല്‍ ഉയര്‍ന്നു വരുന്നതിനെ തടയാനുള്ള അദ്ദേഹത്തിന്റെ കഴിവു കൊണ്ട്.

വിവാഹം ഒന്നിനും പരിഹാരമല്ല എന്നു ഞാന്‍ കരുതുന്നു. പിന്നെന്തിനു ആളുകള്‍ വിവാഹം കഴിയ്ക്കുന്നു.?

വിവാഹം ഒന്നിനും പരിഹാരമല്ല എന്നുള്ള താങ്കളുടെ നിലപാട് വ്യക്തിപരമാണ്. വിവാഹം എല്ലാത്തിനും പരിഹാരം അല്ലാ എങ്കിലും ഒരു സ്തീയുടേയും പുരുഷന്റേയും ജീവിതത്തില്‍ അതിനു പലതിനും പരിഹാരം ആകാന്‍ കഴിയും. വിവാഹം എന്നാല്‍ ഒരു തരത്തിലുള്ള പങ്കു വെയ്ക്കലാണ്. സുഖവും ദുഃഖവും എല്ലാം ഒരു പോലെ ഷെയര്‍ ചെയ്യാന്‍ ഒരാള്‍ക്കു ഒരു ഇണയെ കിട്ടുക എന്നാല്‍ അതില്‍ പരം സൌഭാഗ്യം മറ്റെന്തുണ്ട്? ഒരു കരാറാണ് വിവാഹത്തിലൂടെ വധുവും വരനും ഒപ്പിടുന്നത്. ഒന്നിച്ചു ജീവിച്ചു കൊള്ളാമെന്നുള്ള കരാര്‍. വ്യവസ്ഥകള്‍ ഒന്നും എഴുതിയിട്ടില്ലാത്ത ആ കരാര്‍ ജീവിതത്തിന്റെ അടിസ്ഥാന പ്രമാണമാക്കിയാല്‍ വൈവാഹിക ജീവിതം ഒരു മഹാഭാഗ്യമാകും.

മോതിരം, മാല, വാച്ച്‌, ബ്രേസ്‌ലെറ്റ്‌ തുടങ്ങിയവ ധരിക്കാന്‍ ഇഷ്ടമാണോ?

ബീടര്‍ക്ക് മോതിരം വല്യ ഇഷ്ടമാണ്. എനിയ്ക്ക് ആഭരണങ്ങളോട് തീരെ താല്പര്യമില്ല. ചിരിയ്ക്കുന്ന മുഖമാണ് ഏറ്റവും നല്ല ആഭരണം എന്നതാണ് എന്റെ തത്വശാസ്ത്രം.

പുരുഷന്മാര്‍ മാര്‍സില്‍ നിന്നും സ്ത്രീകള്‍ വീനസില്‍ നിന്നുമുള്ളവരാണെന്ന് വിശ്വസിക്കുന്നോ?

അസംബന്ധം. പുരുഷന്‍ ദൈവത്തിന്റെ പ്രതിരൂപവും സ്തീ അവന്റെ വാരിയെല്ലില്‍ നിന്നും സൃഷ്ടിയ്ക്കപ്പെട്ടവളും ആണ്.

ആന മെലിഞ്ഞാല്‍ തൊഴുത്തില്‍ കെട്ടുന്നതില്‍ തെറ്റുണ്ടോ?

ആന മെലിഞ്ഞാലും ഉയരം കുറയുമോ? തടിയല്ലേ കുറയുള്ളൂ. അതിനാല്‍ ആനയ്ക്ക് നില്‍ക്കാനും ഇരിയ്ക്കാനും പിണ്ടമിടാനും സൌകര്യമുള്ള തൊഴുത്താണേല്‍ തൊഴുത്തില്‍ കെട്ടുന്നതു കൊണ്ട് ബുദ്ധിമുട്ടൊന്നും ഇല്ല. ആല്ലേല്‍ ചിലപ്പോള്‍ പ്രശ്നമാകും.

ഏറ്റവും വലുതെന്താണ്‌?

മണ്ണിലും വിണ്ണിലും തൂണിലും തുരുമ്പിലും എന്തിനു ഒരോ നിശ്വാസത്തിലും കുടിയിരിയ്ക്കുന്ന സര്‍വ്വേശ്വരന്‍.

കാശ്മീരസന്ധ്യകളേ കൊണ്ടുപോരൂ എന്റെ ഗ്രാമസുന്ദരിക്കൊരു നീലസാരി എന്താ ഈവരിയുടെ അര്‍ത്ഥം?

ഇതൊക്കെ വിവരവും വിദ്യാഭ്യാസവും ഉള്ള ആരോടെങ്കിലും ചോയിയ്ക്കു ബായി. ഹല്ല പിന്നെ. ഒരോന്നും എഴുന്നുള്ളീച്ചോണ്ട് വന്നോളും...ആളെ കൊഴപ്പിയ്കാന്‍. വേറെ ചോദ്യമൊന്നുമില്ലേ താങ്കളുടെ കയ്യില്‍?

പാമ്പിന്റെ രത്നം, കൊതിയന്റെ വിത്തം, സതീകുചം, കേസരി തന്റെ കേശം. തങ്കളുടെ അഭിപ്രായത്തില്‍ ഈ ഗണത്തില്‍ പെടുന്ന ഒരു മൂന്നെണ്ണം കൂടി പറയാമോ?

സ്പോണ്‍സറുടെ കയ്യിലിരിയ്ക്കുന്ന നമ്മുടെ പാസ്പോര്‍ട്ട്. ബ്ലോഗുവായിയ്ക്കുന്നോന്റെ കമന്റ്. ഗൂഗിളിന്റെ ആഡ്സാന്‍സ് ചെക്ക്.

അല്ലാ, പൂച്ച ഏതു നിറമായാലും എലിയെപ്പിടിച്ചാല്‍ പോരേ?

എലിയെ കണ്ടാല്‍ പേടിച്ചോടുന്ന പൂച്ചയായിരിയ്ക്കരുത്. അഥവാ മൂന്നാറില്‍ തുറന്നു വിട്ട പൂച്ചകളെ പോലെ ആയിരിയ്കരുത് എന്ന്.

പാലുകുടിക്കുമ്പോള്‍ പൂച്ച കണ്ണടയ്ക്കുന്നതെന്തിനാണ്‌?

പാവം പൂച്ചകുട്ടികള്‍. അവര്‍ പാലു കുടിച്ചോട്ടെ. സാധുക്കളല്ലേ. കണ്ണടച്ചു കൊണ്ടു പാലു കുടിയ്ക്കാനാണ് അവര്‍ക്ക് ഇഷ്ടം. നമ്മള്‍ തടസ്സപ്പെടുത്തേണ്ട.

പൂച്ചക്ക്‌ പൊന്നുരുക്കുന്നിടത്ത്‌ കാര്യമുണ്ടോ?

ദേ...ദേണ്ടെ വീണ്ടും പൂച്ച. എടോ അഭിമുഖക്കാരാ താങ്കള്‍ക്ക് പൂച്ചയില്‍ ആരേലും കൈവിഷം തന്നിട്ടുണ്ടോ? മേലത്തെ ഉത്തരം തന്നെ ഒപ്പിച്ച പാട് എനിയ്ക്കറിയാം.

മാര്‍ജ്ജാരപ്രണയമോ ഹംസലീലയോ കൂടുതല്‍ മനോഹരം?

ഹംസയും ലീലയും ചേര്‍ന്നതായിരിയ്ക്കും വളരെ മനോഹരമാകുന്നത്.

മലയാളം പത്രത്തില്‍ റവന്യൂ സൂപ്രണ്ട്‌ എന്ന ഇംഗ്ലീഷ്‌ പദവിക്കു പകരം ജമാബന്ദിശിരസ്തദാര്‍ എന്നെഴുതേണ്ടതുണ്ടോ? എക്സൈസ്‌ എന്നെഴുതുന്നതോ പിറവക എന്നെഴുതുന്നതോ കൂടുതല്‍ അഭികാമ്യം?

ആളുകള്‍ക്ക് മനസ്സിലാക്കാനാണ് ഭാഷ. അല്ലാതെ ഞാന്‍ ഹിന്ദി സിനിമാ കാണാന്‍ പോകുമ്പോള്‍ അടുത്തിരിയ്ക്കുന്ന സുഹൃത്തിനോട് ഇപ്പോ പറഞ്ഞതെന്താ ഇപ്പോ പറഞ്ഞതെന്താ എന്നു ചോദിയ്ക്കുന്നതു പോലെ കേട്ടാല്‍ ആ പറഞ്ഞതെന്താണെന്ന് അടുത്ത് നില്‍ക്കുന്നവനോട് ചോദിയ്ക്കേണ്ടി വരുന്നത് ഭാഷയല്ല. എന്താ ഈ ജമാബന്ദിശിരസ്കദാര്‍?

കുട്ടിയായിരുന്നപ്പോള്‍ ആയിത്തീരണമെന്ന് ആഗ്രഹിച്ചതിനുമപ്പുറത്ത്‌ താങ്കളുയര്‍ന്നോ? എങ്കില്‍ അതില്‍ സന്തോഷിക്കുന്നുണ്ടോ?

കുട്ടിയായിരുന്നപ്പോള്‍ എന്തായിതീരണമെന്നാണ് ആഗ്രഹിച്ചിരുന്നത് എന്നതിനെ കുറിച്ചോര്‍ക്കുകയായിരുന്നു. ഓര്‍മ്മ വരുന്നില്ല. സോറി.

എന്താണ്‌ സന്തോഷം?

ദുഃഖം പകുത്തെടുക്കുന്ന നല്ല പാതിയുടെ സാമീപ്യം. ഉള്ളതു കൊണ്ട് ഓണമാക്കുന്ന മക്കളുടെ സ്നേഹം. അരക്ഷിതമല്ലാത്ത അടുത്ത നിമിഷം....