17 - സതീഷ് മാക്കോത്ത്

ചോദ്യങ്ങൾ	ഉത്തരങ്ങൾ
എന്താണു ദൈവം	മനുഷ്യന് അതീതമായ ഒരു ശക്തി.
കടമ, ദൈവം, മതം, കുടുംബം, സ്വത്ത്. നിങ്ങൾക്ക് തോന്നുന്ന പ്രാധാന്യമനുസരിച്ച് ക്രമത്തിൽ എഴുതുക.	കുടുംബം, കടമ, സ്വത്ത്, ദൈവം, മതം
ഗായകന്‍, അദ്ധ്യാപകന്‍, കുശിനിക്കാരന്‍, ആശാരി, കോമാളി എന്നീ അഞ്ചു തൊഴിലുകളേ ലഭ്യമുള്ളു എന്നു വന്നാല്‍ താങ്കള്‍ ഏതു തിരഞ്ഞെടുക്കും?	ഗായകനാകാൻ ഇഷ്ടമാണ്. പക്ഷേ ആൾക്കാർക്ക് അസൂയ ആണ്. ഓസിനൊരു ഫ്ലാറ്റൊപ്പിക്കാമെന്ന് വെച്ചാൽ അവർ സമ്മതിക്കേലന്നുള്ളത് നൂറ്‌ ശതമാനം ഷുവർ. പിന്നെയുള്ളത് ആശാരിപ്പണിയാണ്. പണി തെറ്റിപ്പോയാൽ തടീടെ വളവാണന്ന് പറയാല്ലോ. അദ്ധ്യാപക പണിക്ക് എന്തായാലും പോകില്ല. പണ്ടൊരിക്കൽ കുരുത്തംകെട്ട പിള്ളാരെ പഠിപ്പിച്ചതിന്റെ അനുഭവം ഉണ്ട്. പിള്ളാരെന്നു പറയുന്നതും ശരിയല്ല. നല്ല കൊമ്പൻ മീശയുള്ള ചേട്ടന്മാർ. മീശമുളയ്ക്കാത്ത സാറ്. . . ക്ലാസ്സിന്റെ പുറകിൽ നിന്നും കിളിയും വിമാനവുമൊക്കെ പൊങ്ങിപറന്നു. പക്കവാദ്യമായ് വിസിലടിയും. തലകറങ്ങിവീണ സാറിനെ താങ്ങിക്കൊണ്ടുപോകുന്ന ഗുരുഭക്തരായ ശിഷ്യഗണങ്ങൾ. . . അന്നോടെ സുല്ലിട്ടു. ഇനി കാശ് ഡോളറീ തന്നാ പോലും ആ പണിക്കില്ല. കട്ടായം.
നിങ്ങൾക്ക് 20 വർഷം പുറകോട്ടു് നീക്കാൻ അവസരം കിട്ടിയാൽ എന്തു ചെയ്യും	തീർച്ചയായിട്ടും തിരിക്കും. എന്നിട്ട് സുന്ദരസുരഭിലമായ ആ കോളേജ് ജീവിതം ഒന്നുകൂടി ആസ്വദിക്കും. പിന്നെ ചെയ്യാനാഗ്രഹിക്കുന്ന കാര്യങ്ങൾ അല്ലെങ്കിൽ ചെയ്തകാര്യങ്ങൾ മുഴുവൻ ഇപ്പോ പറയാൻ പറ്റുമോ? എന്തിനാ വെറുതേ കുടുമ്മകലഹം.
കുട്ടിയായിരുന്നപ്പോള്‍ ആയിത്തീരണമെന്ന് ആഗ്രഹിച്ചതിനുമപ്പുറത്ത്‌ താങ്കളുയര്‍ന്നോ? എങ്കില്‍ അതില്‍ സന്തോഷിക്കുന്നുണ്ടോ?	മോഹങ്ങള്‍ക്ക് ഒരിക്കലും ഒരു കുറവും സം‌ഭവിച്ചിട്ടില്ല. കാലത്തിനനുസരിച്ച് അതിങ്ങനെ മാറിക്കൊണ്ടിരുന്നുവെന്ന് മാത്രം. കണ്ടുവന്ന ആളുകളെ അനുസരിച്ച്, ജീവിച്ച് വന്ന സാഹചര്യത്തിനനുസരിച്ച്, അടുത്തിടപഴകിയ കൂ‍ട്ടുകാരെയനുസരിച്ച്, കടന്നു പോന്ന പ്രായത്തിനനുസരിച്ച് അതിങ്ങനെ മാറിമറിഞ്ഞുകൊണ്ടിരുന്നുവെന്ന് മാത്രം. ചെറുപ്പത്തില്‍ ഒരു ശാസ്ത്രജ്ഞനാകാനായിരുന്നു ആഗ്രഹം. വെറും ശാസ്ത്രജ്ഞനല്ല. ഒരു വാനനിരീക്ഷകന്‍! ആകാശത്തെ നോക്കി ആകാശത്തിലെ നക്ഷത്രങ്ങളെ നോക്കി, അതിന്റെ ഗതിവിഗതികളെ നോക്കി പഠിക്കുന്ന ഒരു ശാസ്ത്രജ്ഞന്‍! ടെലസ്കോപ്പും വെച്ചനന്തമായ ആകാശത്തിന്റെ ഉള്ളറകളുടെ രഹസ്യം കണ്ടുപിടിക്കുന്ന ഒരു വലിയ ശാസ്ത്രജ്ഞന്‍! പിന്നെ ബസ് കണ്ടക്ടർ, തബലിസ്റ്റ്, ആനക്കാരൻ, ചെണ്ടക്കാരൻ അങ്ങനെ. . . അങ്ങനെ. . അങ്ങനെ. . . ആഗ്രഹിച്ചതൊന്നും ആയില്ലങ്കിലും ഇപ്പോൾ സന്തോഷിക്കുന്നു. പഴയ ആ അഗ്രഹങ്ങളുടെ ഓർമ്മ തന്നെ സന്തോഷത്തിനുള്ള വകയാണ്. അതൊക്കെ ഓർത്ത് ഒറ്റയ്ക്കിരുന്ന് ചിരിക്കുമ്പോൾ ചിലപ്പോഴൊക്കെ ചോദ്യം വന്നിട്ടുണ്ട്. “വട്ടാണോയെന്ന്. ” ആരാണ് ചോദിക്കുന്നതെന്ന് മാത്രം പറയില്ല.
എന്താണു് സമൂഹിക പ്രതിബദ്ധത?	നമ്മുടെ രാഷ്ട്രീയക്കാർക്കില്ലാത്തത്. അല്ലങ്കിൽ സമൂഹത്തെ പ്രതിസ്ഥാനത്ത് നിർത്താനായുള്ള ഓരോരുത്തരുടെ ബദ്ധപ്പാട്. അതിൽ രാഷ്ട്രീയക്കാരുണ്ടാകാം, സിനിമാക്കാരുണ്ടാകാം, കലാകാരന്മാരുണ്ടാകാം, സാഹിത്യകാരന്മാരുണ്ടാകാം
നിങ്ങളുടെ തൊഴിൽമേഖല ഏത് ഗണത്തിൽപെടും. ഉല്പാതനം കച്ചവടം ജന സേവനം വിനിമയം വിദ്യാഭ്യാസം	കച്ചവടമല്ല. ജനസേവനവുമല്ല. വിനിമയം ഒട്ടുമല്ല. വിദ്യാഭ്യാസം അല്ലന്ന് മനസ്സിലായിക്കാണുമല്ലോ. പിന്നെയുള്ളതെന്താണ്? അദെ. അദ്ന്നെ.
നിങ്ങൾ ഒരു ദിവസത്തേക്ക് പ്രധാന മന്ത്രിയാകുന്നു. എന്തു ചെയ്യും?	പ്രധാനമന്ത്രിയും മനുഷ്യനല്ലേ. എല്ലാരും ചെയ്യുന്നതുപോലെ തന്നെ(എല്ലാരും ചെയ്യുന്നതല്ലേൽ ഷമീര്) രാവിലെ എണീക്കും, പല്ലുതേക്കും, കുളിക്കും, വല്ലതും വയറ് നിറച്ച് ഫുഡടിച്ചോണ്ട് ഓഫീസിൽ പോകും. ഒറ്റ ദിവസം കൊണ്ട് തേനും പാലുമൊക്കെ ഒഴുക്കാൻ പറ്റുമെന്ന് ഈ പ്രധാനമന്ത്രി വിശ്വസിക്കുന്നില്ല.
നിങ്ങൾക്ക് മൂന്നു വരം കിട്ടുന്നു എന്തെല്ലാം അവശ്യപ്പെടും?	വരം നമ്പർ വൺ- വാ തുറന്നാൽ ‘കരയാതെ. . കരയാതെ. . ’ എന്ന് പറയുന്ന ഭാര്യേടെ വാ‍യടപ്പിക്കാനായ് പാട്ടു പാടാനുള്ള തൊണ്ട ചോദിക്കും. വരം നമ്പർ ടു- ഒറ്റ സ്വിച്ചിൽ നാട്ടിലെ വീട്ടിൽ പോയി വരാൻ പറ്റുന്ന ഒന്നാന്തരം ഒരു അത്യന്താധുനിക മെഷീൻ ചോദിക്കും. (ബോസ്സിന് ലീവെന്ന് കേൾക്കുന്നതേ അലർജിയാ. അല്ലാ പിന്നെ!) വരം നമ്പർ ത്രീ- മേൽ പ്രസ്താവിച്ച രണ്ട് വരങ്ങളും സ്റ്റേ ചെയ്യാനുള്ള അധികാരം ആർക്കും നൽകരുതെന്ന്. അതിന്റെ പേറ്റന്റ് എന്റെ സ്വന്തം.
1 Billion USനിങ്ങൾക്ക്ലഭിക്കുന്നു എന്തു ചെയ്യും	ഓ. എല്ലാം കൊതിപ്പിക്കുന്ന ചോദ്യങ്ങൾ തന്നെ അണ്ണാ. പ്രധാനമന്ത്രി, വരം, ദാ പിന്നെ 1 ബില്ല്യൺ. . . ആദ്യം അതെല്ലാം മുറിയിൽ കൂട്ടിയിട്ട് 1 ബില്ല്യന്റെ വലിപ്പമെത്രയുണ്ടന്ന് മനസ്സിലാക്കും. (ഒരു മുറിയിൽ കൊള്ളുമോ ആവോ!) പിന്നെ ജീവനും സ്ഥിരബുദ്ധിയുമുണ്ടങ്കിൽ എന്തു ചെയ്യണമെന്ന് ആലോചിക്കാം. വെറുതെ കൊതിപ്പിക്കാതെ മനുഷ്യാ. ആനകൊടുത്താലും ആശകൊടുക്കരുതെന്നാരോ പറഞ്ഞിട്ടുണ്ട്.
പ്രാവാസ ജീവിതത്തിൽഎന്തെങ്കിലും നഷടമായിട്ടുണ്ടോ?	ഗ്രാമം. ഗ്രാമീണത. വായനശാല വെളിയിലെ മണലിൽ മലർന്ന് കിടന്നുള്ള നക്ഷത്രമെണ്ണൽ!ഒരു കാര്യം പറയാൻ വിട്ടു. ലാമ്പി സ്കൂട്ടർ. പണ്ടൊരപ്പൂപ്പനെ മുട്ടി കാല് പൊട്ടിച്ചതിന് കായ് അയ്ഞ്ഞൂറ് പോയതാ. അന്ന് ശമ്പളം എണ്ണൂറ്.
ബ്ലോഗിൽ അവസാനമായി വായിച്ച ലേഖനം ഏതാണു്?	ജീവിതത്തിന്റെ നല്ലൊരു ഭാഗം മുംബൈയിൽ കഴിച്ച്, കുറച്ചു വർഷങ്ങളായി ബഹറിനിൽ കഴിയുന്ന, മനസ്സത്ര ശുദ്ധമല്ലാത്ത ഒരു സാധാരണക്കാരൻ പ്രവാസിയെഴുതിയ സുന്ദരമായ ലേഖനം.
ബ്ലോഗിൽ അവസാനമായി വായിച്ച കവിത ഏതാണു്?	കവിത വായന കുറവാണ്. പണ്ട് സ്കൂളിൽ പരീക്ഷയ്ക്കായി കാണാതെ പഠിക്കേണ്ടി വന്നതിന്റെ കഷ്ടപ്പാടോർക്കുമ്പോൾ ഇപ്പോഴും അസ്ഥിയിലൊരു വൈബ്രേഷൻ! എന്റെ കവിതാജ്ഞാനത്തെ പരീക്ഷിക്കരുതേ. . . പ്ലീസ്.
നിങ്ങൾ കൈപ്പള്ളിയെ കണ്ടു മുട്ടുന്നു. ഒരു ചോദ്യം ചോദിക്കാൻ അവസരം തരുന്നു. എന്തു ചോദിക്കും?	മാഷേ, ഈ ഐഡിയാസൊക്കെ എബടന്നൂന്നെന്ന്. ബൂലോകം മൊത്തം ഒറ്റബ്ലോഗിൽ നിർത്താനുള്ള ശ്രമമാണോന്ന്.
ഈ പറയുന്ന എഴുത്തുകാരിൽ ആരെയാണു് കൂടുതൽ ഇഷ്ടം: മാധവികുട്ടി, എം. മുകുന്ദൻ, സാറ ജോസഫ്, സക്കറിയ, ഓ. വി. വിജയൻ, ബഷീർ, ആനന്ദ്, വി. കെ. എൻ, തകഴി, എം. ടി വാസുദേവൻ നായർ, പെരുമ്പടവം.	ബഷീർ തന്നെ
നിങ്ങൾ Dinnerനു് ഈ പട്ടികയിൽ കൊടുത്തിരിക്കുന്ന രണ്ടു പേരിൽ ആരെ ക്ഷണിക്കും? അവർക്ക് എന്തു ഭക്ഷണം കൊടുക്കും? അവരോടു എന്തെല്ലാം ചോദിക്കും? Amithabh Bachan Pierce Brosnan Che Guevara മമ്മൂട്ടി ബഷീർ Pres. Barack Obama Adoor Gopalaksrihsnan Jackie chan Nelson Mandela Khalil Gibran Salman Khan സലീം കുമാർ വി ഡി രാജപ്പൻ(കാഥികൻ) K. J. Yesudas Jayalalitha (ex TN CM) വള്ളതോൾ Robert Mugabe K. Karunakaran വിശാല മനസ്കൻ (സജീവ് ഇടത്താടൻ) ഇഞ്ചിപ്പെണ്ണു്	ബഷീർ, വിശാലൻ കഥയുടെ സുൽത്താനുമുന്നിൽ മണ്ടത്തരങ്ങൾ ചോദിക്കാൻ എന്നെക്കൊണ്ടാവില്ല. (അല്ലാതൊന്നും എന്റെ നാവിൽ നിന്നും വരില്ല. ) വയറ് നിറച്ച് കഞ്ഞീം പയറും കൊടുക്കും കഴിക്കുമെങ്കിൽ. പിന്നെ പറയുന്നത് മുഴുവൻ കേൾക്കും. ദേവിയോട് പറഞ്ഞ വാക്കുകൾ സുൽത്താൻ എന്നോടും ആവർത്തിച്ചിരുന്നെങ്കിൽ എന്നൊരാഗ്രഹമുണ്ട്. “മേലിൽ ദേവി എഴുതുമ്പോൾ അനുഭവം വെച്ചുകൊണ്ടുവേണം എഴുതുവാൻ. ഇതു മറക്കരുത്. സ്വന്തം ജീവിതത്തിലേക്കൊന്ന് തിരിഞ്ഞ് നോക്കുക. വേദനാജനകവും അവിസ്മരണീയവുമായ ചില സംഭവങ്ങളില്ലേ ജീവിതത്തിൽ? അതിനെ ഭംഗിയായി ചിത്രീകരിക്കുക. ആവേശത്തോടെ. വികാരത്തിന്റെ ചൂടുമാറാതെ. ” അടുത്തത് വിശാലൻ. അവിടെ ചോദ്യങ്ങളേ ഉള്ളൂ. പണ്ടെഴുതിയ ഒരു കത്തിലെ ചോദ്യങ്ങൾക്ക് മറുപടി ഇതേവരെ കിട്ടിയിട്ടില്ല. ഒന്നുകൂടി ആ കത്തെടുത്ത് പൊടി തട്ടി നിവർത്തിയിടും. ഉത്തരം കഴിഞ്ഞിട്ട് മതി ആശാനേ കഞ്ഞീം പയറും എന്ന് പറയും.
വെള്ളയിൽ മഞ്ഞ ഡിസൈനുള്ള സാരിയെ എന്തുവിളിക്കും?	ശ്രീനിയോട് ചോദിക്കേണ്ടി വരും.
പാമ്പ് നക്കിയ ആൾ ഇപ്പോൾ എവിടെയാണു്?	നാട്ടിലുണ്ട്. ഇന്റർനെറ്റും, ബ്ലോഗുമൊന്നുമില്ലാത്ത ഒരു ഗ്രഹത്തിലോട്ട് അവനെ കയറ്റി വിട്ടാൽ സ്വസ്ഥമായിട്ടൊന്ന് നാട്ടിൽ പോകാമായിരുന്നു. ആള് പെശകാ. എന്തിനാ തടികേടാക്കുന്നതിനിടയാക്കുന്നത്!