മത്സരം 28 - കപില്‍ ദേവ്

ശരിയുത്തരം : കപില്‍ ദേവ് കപില്‍ ദേവ് രാം‌ലാല്‍ നിഖന്‍‌ജ് എന്നാണ് കപില്‍ദേവിന്റെ പൂര്‍ണ്ണ നാമം. 1959 ജനുവരി 6 നാണ് അദ്ദേഹം ജനിച്ചത്. ലോകംകണ്ട എക്കാലത്തേയും മികച്ച ക്രിക്കറ്റ് ഓള്‍‌റൌണ്ടര്‍മാരിലൊരാളാണ് കപില്‍. 1983-ല്‍ ഇന്ത്യന്‍ ക്രിക്കറ്റ് ടീം ലോകകപ്പ് ക്രിക്കറ്റ് കിരീടം നേടിയപ്പോള്‍ ടീമിന്റെ നായകനായിരുന്നു അദ്ദേഹം. “കപിലിന്റെ ചെകുത്താന്മാര്‍“ എന്നായിരുന്നു ആ ടീമിന് ക്രിക്കറ്റ് ലോകം നല്‍കിയ ഓമനപ്പേര്. ആവശ്യമായ സന്ദര്‍ഭങ്ങളിലൊക്കെ ടീമിനെ ആപത്തുകളില്‍ നിന്ന് കരകയറ്റാന്‍ അദ്ദേഹത്തിനു പ്രത്യേക സിദ്ധിതന്നെയുണ്ടായിരുന്നു. “ഹരിയാനയുടെ കൊടുങ്കാറ്റ്” എന്നായിരുന്നു അദ്ദേഹത്തിന്റെ ഇരട്ടപ്പേര്. ടെസ്റ്റ് ക്രിക്കറ്റില്‍ 400 വിക്കറ്റുകളും 5000 റണ്ണുകളും എന്ന നേട്ടം അദ്ദേഹത്തിനു സ്വന്തം. കളിയില്‍ നിന്നും വിരമിച്ച ശേഷം കുറച്ചു കാലം ഇന്ത്യയുടെ പരിശീലകനായും സേവനമനുഷ്ഠിച്ചിരുന്നു. ഇന്ത്യയില്‍ ഏറ്റവുമധികം ആരാധകരുള്ള ക്രിക്കറ്റ് താരങ്ങളുടെ ഗണത്തിലുള്ള കപില്‍ ദേവിനെയാണ് നൂറ്റാണ്ടിലെ ഇന്ത്യന്‍ ക്രിക്കറ്റ് താരമായി വിസ്ഡന്‍ മാസിക തിരഞ്ഞെടുത്തത്. 2008 സെപ്തംബറില്‍ ഇന്ത്യന്‍ ടെറിട്ടോറിയല്‍ ആര്‍മിയില്‍ ഓണററി ലഫ്റ്റനന്റ് കേണല്‍ ആയി കപില്‍ ദേവിന് സ്ഥാനം നല്‍കി. പഞ്ചാബ് റജിമെന്റിലെലെ 150 ഇന്‍ഫന്ററി ബറ്റാലിയനിലാണ് ചുമതല. യുവജനങ്ങള്‍ക്കിടയില്‍ സൈന്യത്തിന്റെ അംബാസിഡറായി അദ്ദേഹം സേവനം ചെയ്യും. സ്വന്തം ജോലി നിലനിര്‍ത്തിക്കൊണ്ട് രാജ്യരക്ഷാ സേവനം ചെയ്യാന്‍ പൗരന്മാര്‍ക്കുള്ള സംവിധാനമാണ് ടെറിട്ടോറിയല്‍ ആര്‍മി. കപില്‍ ദേവിന് ലഭിച്ചിട്ടുള്ള പ്രധാന അവാര്‍ഡുകള്‍ * 1979-80 - അര്‍ജുന അവാര്‍ഡ് * 1982 - പത്മശ്രീ * 1983 - വിസ്ഡന്‍ ക്രിക്കറ്റര്‍ ഓഫ് ദി ഈയര്‍ * 1991 - പത്മഭൂഷണ്‍ * 2002 - വിസഡന്‍ നൂറ്റാണ്ടിലെ ഇന്ത്യന്‍ ക്രിക്കറ്റര്‍