51 - അലിഫ്

ചോദ്യങ്ങൾ	ഉത്തരങ്ങൾ
എന്താണു ദൈവം	ഉണ്ടന്നോ ഇല്ലന്നോ പറയാൻ പറ്റാത്ത ഒരു പ്രതിഭാസം അഥവാ വിശ്വാസം. (എന്റെ നാട്ടിലെ മഞ്ഞപിത്ത ചികിത്സകനായിരുന്ന ഒരു നാട്ടുവൈദ്യൻ എന്നും പറയാം, അങ്ങോരുടെ പേര്‌ ദൈവം എന്നായിരുന്നു -ദൈവത്തിന്റെ ഒറ്റമൂലി ഒറ്റയിറക്കിനു കുടിച്ചാൽ മഞ്ഞപിത്തം പമ്പകടക്കില്ലെങ്കിലും കല്ലടയാറു കടക്കുമായിരുന്നു ;ഒരുപാട്‌ പേരെ ചികിത്സിച്ച്‌ ഭേദമാക്കിയിട്ടുള്ള കഥകൾ കുട്ടികാലത്ത്‌ കേട്ടിട്ടുണ്ട്‌)
എന്താണു് വിലമതിക്കാനാവത്തതു്?	നൽകിയ വാക്ക്‌
കടമ, ദൈവം, മതം, കുടുംബം, സ്വത്ത്. നിങ്ങൾക്ക് തോന്നുന്ന പ്രാധാന്യമനുസരിച്ച് ക്രമത്തിൽ എഴുതുക.	കടമ ,കുടുംബം , സ്വത്ത്‌, ദൈവം, ............... മതം
വംശനാശ ഭീഷണി നേരിടുന്ന ഒരു മൃഗത്തെ സംരക്ഷിക്കുന്നതിനായി രണ്ടിടങ്ങളിൽ ഒന്നു തിരഞ്ഞെടുക്കാൻ നിങ്ങളെ ചുമതലപ്പെടുത്തുന്നു. തിരഞ്ഞെടുക്കുന്ന സ്ഥലം പൂർണ്ണമായും ഇടിച്ചു നിരത്തുകയും ചെയ്യും. 1) ഒരു മത വിഭാഗത്തിന്റെ ആരാധനാലയം 2) 10,000 തൊഴിലാളികൾ ജോലി ചെയ്യുന്ന ഒരു വ്യവസായ സ്ഥാപനം.. ഇതിൽ ഏതു തിരഞ്ഞെടുക്കു? എന്തുകൊണ്ടു്?	ഇപ്പോഴത്തെ കാലഘട്ടത്തിന്റെ പ്രത്യേകത വെച്ച്‌ ഒരു മത വിഭാഗത്തിന്റെ ആരാധനാലയം ഇടിച്ച്‌ നിരത്തുകയെന്നാൽ അത്‌ ആ പ്രദേശത്തെയെങ്കിലും കുറേ 'മനുഷ്യന്മാരുടെ നാശത്തിനും കാരണമാകുമെന്ന് ഉറപ്പ്‌, അത്‌ കൊണ്ട്‌ മറ്റൊരു നിവൃത്തിയുമില്ലാത്ത സാഹചര്യത്തിൽ തീർച്ചയായും വ്യവസായ സ്ഥാപനത്തെ ഇടിച്ച്‌ നിരത്തും മുൻപ്‌ മറ്റൊരു സ്ഥലത്തേക്ക്‌ മാറ്റി സ്ഥാപിക്കാൻ ആവശ്യപ്പെടും. (നുമ്മടെ ഏതെങ്കിലുമൊക്കെ സഹവർത്തികൾക്ക്‌ ഒരു പണിയാകുകയും ചെയ്യും)
ഗായകന്‍, അദ്ധ്യാപകന്‍, കുശിനിക്കാരന്‍, ആശാരി, കോമാളി എന്നീ അഞ്ചു തൊഴിലുകളേ ലഭ്യമുള്ളു എന്നു വന്നാല്‍ താങ്കള്‍ ഏതു തിരഞ്ഞെടുക്കും?	പാട്ട്‌ കേൾക്കാനിഷ്ടം,ആസ്വദിക്കും പക്ഷേ ഗായകൻ -പറ്റില്ല. ഉടക്കാൻ വരുന്നവരോട്‌ 'നിന്നെ ഞാനൊരു പാഠം പഠിപ്പിക്കുമെടാ' എന്നൊക്കെ പറഞ്ഞിട്ടുണ്ടെങ്കിലും പഠിപ്പീര്‌ കഠിനം കോമാളിത്തരം ഞാൻ പറഞ്ഞാൽ പലപ്പോഴും പലർക്കും സുഖിക്കില്ലന്ന് തോന്നീടുള്ളതിനാൽ അതും വിടുന്നു കുശിനിപ്പണി 'ഇപ്പോൾ' ഇഷ്ടമാണെങ്കിലും അത്ര വിദഗ്ദ്ധൻ ആയിട്ടില്ല; ആരുടെയെങ്കിലും വയറ്‌ ശാപം ഏറ്റുവാങ്ങാനാവും വിധി തൊഴിൽ മേഖലയുമായി ബന്ധമുള്ളതിനാലും പഠനഭാഗമായി ഒന്നു കൈവെച്ച്‌ നോക്കിയിട്ടുള്ളതിനാലും നാട്ടിൽ പണിക്ക്‌ ആളെകിട്ടാതെ വല്ലാതെ ബുദ്ധിമുട്ടിയിട്ടുള്ളതിനാലും (ഒരുവിധം ഉളി പിടിക്കാനറിയാവുന്നവരൊക്കെ ഗൾഫിലല്ലേ) മറ്റ്‌ ഒരു രക്ഷയില്ലെങ്കിൽ ആശാരിപ്പണി നോക്കും.
ഈയിടെയായി ഒറ്റയ്ക്കിരിക്കുമ്പോള്‍ ഒരു ഏകാന്തത അനുഭവപ്പെടാറുണ്ടെന്ന് തോന്നുന്നു?	'ഏകാന്തതയുടെ അപാര തീരം' എന്ന് പാട്ട്‌ മൂളാൻ തോന്നാറുണ്ട്‌
താങ്കളെ വീണ്ടും അഞ്ചുവര്‍ഷത്തേക്ക് കോളേജ് ജീവിതത്തിലേക്ക് തിരികെ വിടുന്നു എന്നു സങ്കല്‍പ്പിക്കുക. ഏതുവിഷയം തെരഞ്ഞെടുക്കും? എന്തുകൊണ്ട്?	എന്നെ പഴയ ക്ലാസ്സിൽ തന്നെ ഇരുത്തുകയും (പഴയ സഹപാഠികളുടെ ഒപ്പം) ഒക്കെ ചെയ്യാമെന്ന് സമ്മതിച്ചാൽ ഇപ്പോൾ പഠിച്ചിരിക്കുന്ന പാഠഭാഗങ്ങൾ ഒരിക്കൽ കൂടി നോക്കാൻ ഒരു മടിയുമില്ല, കാരണം ഈ പഠനവിഭാഗം അത്ര മികച്ചതാണെന്ന് ഞാൻ കരുതുന്നു, മാത്രവുമല്ല പ്രവേശനപരീക്ഷക്കൊപ്പം അഭിരുചി പരീക്ഷകൂടി നടത്തപ്പെടുന്ന മറ്റൊരു പഞ്ചവത്സര പ്രൊഫഷണൽ കോഴ്‌സും കേരളത്തിൽ ഇല്ല എന്നും തോന്നുന്നു (എനിക്ക്‌ ഒരിക്കൽ കൂടി പ്രണയിക്കാം, അവളെ തന്നെ കെട്ടാം, ഒന്നൂടെ ആദ്യരാത്രി ഘോഷിക്കാം എന്നൊക്കെയുള്ള ബോണസ്‌ ഞാൻ ആലോചിച്ചിട്ടേയില്ല..!)
എന്താണു് മലയാളിയുടെ അശ്ലീലത്തിന്റെ വ്യാഖ്യാനം?	ഈ ഇന്റർനെറ്റ് യുഗത്തിൽ അശ്ലീലത്തെ പറ്റി അമിതമായി ഉത്കണ്ഠപെടേണ്ടതോ വ്യാഖ്യാനിക്കപെടേണ്ടതോ ഇല്ലന്നാണ് എന്റെ പക്ഷം. അശ്ലീലം വ്യക്തികൾക്കധിഷ്ഠിതമാണ്
കുട്ടിയായിരുന്നപ്പോള്‍ ആയിത്തീരണമെന്ന് ആഗ്രഹിച്ചതിനുമപ്പുറത്ത്‌ താങ്കളുയര്‍ന്നോ? എങ്കില്‍ അതില്‍ സന്തോഷിക്കുന്നുണ്ടോ?	കുട്ടിയായിരുന്നപ്പോൾ കുറച്ച്‌ കൂടി വല്യകുട്ടിയാകണമെന്നായിരുന്നു ആഗ്രഹമെന്ന് പറഞ്ഞാൽ അത്‌ ആശയപരമായ പാപ്പരത്തം മായി തോന്നാം , സത്യമതാണെങ്കിലും. കുന്നോളം ആഗ്രഹിച്ചാലെ കുന്നികുരുവോളം കിട്ടൂ എന്നല്ലേ ആഗ്രഹങ്ങളുടെ വഴിയെ വളരെ പതുക്കെ മാത്രം പോകുന്ന ഒരു യാത്രക്കാരൻ എന്ന് കരുതിയാൽ മതി; ഒപ്പം ഇതുവരെയുള്ള നേട്ടങ്ങളിൽ അഭിമാനവും സന്തോഷവും സംതൃപ്തിയും ഉണ്ട്‌
ഇഷ്ടപ്പെട്ട ഭക്ഷണം ഏതാണു്? എന്തുകൊണ്ടു്? സ്വന്തമായി പാകം ചെയ്യാൻ അറിയാമോ?	പുട്ടും ബീഫും; എല്ലുംകപ്പ എന്ന് പറയുന്ന കപ്പ-ബീഫ്‌ വിഭവം , അമ്മായിയമ്മ ഉണ്ടാക്കിതരുന്ന കൈപ്പത്തിരിയും ആടുകറിയും ഒരു ചായ പോലും വെക്കാനറിയാതെ വന്നിട്ടിപ്പോ അത്യാവശ്യം പാചക വേലത്തരങ്ങൾ കാട്ടുന്നുണ്ട്‌, മേൽപറഞ്ഞ വിഭവങ്ങൾ ഉൾപ്പെടെ -'എന്റെ പാചക വിധി' അല്ലാണ്ടെ എന്ത്‌ പറയാനാ(ഇവിടുള്ള എന്റെ കൂട്ടുകാരുടെയും)
ഇഷ്ടപ്പെട്ട വാഹനം ഏതാണു് ? (philosophy പറഞ്ഞു ഓവറാക്കണ്ട)	ഒരു സംശയവുമില്ല, ഓട്ടോറിക്ഷാ തന്നെ..ഇവിടുന്നങ്ങോട്ട്‌ പോയാൽ രണ്ട്‌ മൂന്ന് ദിവസം യാത്രമുഴുവൻ ആ ശകടത്തിലാണ്‌, എന്താ രസം. പിന്നെ സ്വന്തം വാഹനം അത്‌ ഏതായാലും ഇഷ്ടമാണ്‌ - ഇരുചക്രൻ (കൈനെറ്റി ഹോണ്ട-പഴയ മോഡൽ) കാർ -മാരുതി സെൻഗുപ്ത.
ചിന്താഭാരം ഉണ്ടായാൽ എന്തു സംഭവിക്കും? അപ്പോൾ ലോറി എവിടെയായിരുന്നു?	കുറച്ചൊക്കെ വീതം വെച്ച്‌ കൊടുക്കും;വീതം വെച്ച്‌ പാഴ്സലാക്കി അയക്കാൻ നോക്കിയപ്പോൾ 'ലോറി കേടായിരിക്കുകയായിരുന്നു'
പരസ്യങ്ങള്‍ താങ്കളെ സ്വാധീനിക്കാറുണ്ടോ? ഉണ്ടേങ്കില്‍ ഏതുവിധത്തില്‍?	പരസ്യങ്ങൾ ശ്രദ്ധിക്കാറുണ്ട്‌; അവയുടെ അവതരണരീതികൾ വിശദമായി നോക്കാറുണ്ട്‌-ക്രീയേറ്റീവ്‌ അക്കാദമിക്‌ താത്പര്യത്തോടെ. തൊഴിൽ പരമായി പുതിയ ഉത്‌പന്നങ്ങൾ മാർക്കറ്റിലെത്തുന്നത്‌ ശ്രദ്ധിക്കേണ്ടതുണ്ട്‌, അതിനു നല്ലൊരു മാർഗ്ഗം പരസ്യങ്ങൾ തന്നെയാണ്‌.
പുതിയ blog എഴുത്തുകാർ മലയാളം ബ്ലോഗിലേക്ക് വരുമ്പോൾ എന്തെല്ലാം ചിട്ടകളാണു് സ്വീകരിക്കേണ്ടതു്. അങ്ങനെ ചിട്ടകൾ പാലിക്കേണ്ടതായിട്ടുണ്ടോ?	എഴുത്തിൽ അങ്ങിനെ ചിട്ടവട്ടങ്ങൾ പാലിക്കേണ്ട ഒരിടമാണ്‌ ബ്ലോഗ്‌ എന്ന് തോന്നീട്ടില്ല, അപ്പോൾ പിന്നെ അച്ചടി മാദ്ധ്യമവുമായ്‌ ഇതിനെന്ത്‌ വ്യത്യാസം. സംവദിക്കുന്നയിടങ്ങളിൽ സാമാന്യ മര്യാദയും പ്രതിപക്ഷ ബഹുമാനവും ഉണ്ടായിരുന്നാൽ കൊള്ളാം എന്ന് തോന്നീട്ടുണ്ട്‌.
ഒരു ഗ്രാമത്തിൽ ഒരു വിഗ്രഹം കണ്ടെടുത്തു. രണ്ടാം നാൾ ആ വിഗ്രഹത്തിന്റെ വായിൽ (അടുത്തുള്ള ഒരു വിട്ടിൽ വാറ്റിയ) പട്ടചാരായം വെച്ചു കൊടുത്താൽ, ആ വിഗ്രഹം കുടിക്കുന്നതായ മഹ അത്ഭുതം നിങ്ങൾ അറിയുന്നു. പത്രങ്ങൾ ആ വാർത്ത front page ആക്കുന്നു. ജനങ്ങൾ ആ വീട്ടിലേക്ക് തടിച്ചു കൂടുന്നു. നിങ്ങൾ എന്തു ചെയ്യും. 1) ഉടൻ ആ വിട്ടിൽ പോയി നാലു കുപ്പി വിശുദ്ധ പട്ടചാരായം വാങ്ങി വിഗ്രഹത്തിനു് കൊടുക്കാനായി queue നിൽക്കുന്നു. 2) ഇന്ത്യൻ constitution അനുസരിച്ചുള്ള secularism ഉയർത്തിപ്പിടിക്കാനും, വിശ്വാസികളുടെ സ്വാതന്ത്ര്യം അനുവതിച്ചുകൊടുക്കാനുമായി ആ വിട്ടിൽ വിശുദ്ധ പട്ടചാരായം വാറ്റാനുള്ള അവകാശത്തിനു വേണ്ടി, ഇന്ത്യൻ constitution ബഹുമാനിക്കുന്ന ഒരു ഭാരതീയൻ എന്ന നിലയിൽ നിങ്ങൾ പ്രവർത്തിക്കുന്നു. 3) നാലു കന്നാസ് വിശുദ്ധ പട്ടചാരായം വാങ്ങി ഒരു 100ml വിഗ്രഹത്തിനു കൊടുക്കും. ഒരു കന്നാസ് സ്വന്തം വിട്ടിൽ കൊണ്ടു പോകും, ബാക്കി blackൽ വില്കും. 4) ആ വീട്ടിലേക്ക് വിശുദ്ധ പട്ടചാരായം supply ചെയ്യാനായി തൊട്ടടുത്ത് ഒരു distillery തുടങ്ങും. 5) ഇതൊരു തട്ടിപ്പാണെന്നു നിങ്ങൾ വിശ്വസിക്കുന്നു. വിശ്വാസികളായ നാട്ടുകാരുടേ അടി പേടിച്ച്, ഒന്നും ചെയ്യില്ല 6) ഇതൊരു തട്ടിപ്പാണെന്നു നിങ്ങൾ വിശ്വസിക്കുന്നു. പത്രത്തിൽ ഇതേകുറിച്ച് എഴുതും.	വിഗ്രഹത്തിന്റെ വായിലൊഴിക്കാനാണെങ്കിലും പട്ടചാരായം ഉൽപാദിപ്പിക്കുന്നത്‌ നിരോധിച്ചിരിക്കുന്ന കാര്യമല്ലേ (സംഭവ സ്ഥലം കേരളമാണെന്നു വിചാരിക്കുന്നു)അത്‌ എതിർക്കപ്പെടേണ്ട സാമൂഹിക പ്രതിഭാസമാണെങ്കിലും ഇത്തരത്തിൽ ചാരായമൊക്കെ ഉണ്ടാക്കുന്നവർ ഭയങ്കരന്മാരും പത്ര മാദ്ധ്യമങ്ങളുമായി അവിശുദ്ധ ബന്ധം തീർച്ചയായിട്ടും ഉണ്ടാകിനിടയുണ്ടെന്നുള്ളസാമാന്യ ബോധം വെച്ച്‌ ആഗ്രഹമുണ്ടെങ്കിലും അവസാനത്തെ ഓപ്ഷൻ നടപ്പില്ല, ഞാൻ ബ്ലോഗിൽ പോസ്റ്റിടും; അത്രയൊക്കെയേ പറ്റൂ.
ബ്ലോഗിൽ കാണുന്ന പാചക കുറിപ്പുകൾ പരീക്ഷിച്ച് നോക്കിയിട്ടുണ്ടോ? അതിനു് ഇരയാവരുടേ അഭിപ്രായം എന്തായിരുന്നു.	ഇല്ലാതില്ല; ആരുടെ പാചകകുറിപ്പുകളെയും അതേപടി അനുകരിക്കാൻ തോന്നാറില്ല, എന്നാൽ നിരീക്ഷിക്കാറുണ്ട്‌, ചിലത്‌ എഴുതിയോ മറ്റോ സൂക്ഷിക്കാറുമുണ്ട്‌. പാചകം വളരെ ക്രീയേറ്റീവ്‌ ആയി ചെയ്യേണ്ട ഒന്നാണെന്നാണ്‌ ഇക്കഴിഞ്ഞ മൂന്ന് വർഷത്തെ പാചകപാഠം.( ഭാര്യ ഓൺലൈൻ ട്യൂഷൻ തരാൻ തയ്യാറാവുന്നതിനാൽ ഇതുവരെ മോശം അഭിപ്രായം ഉണ്ടായിട്ടില്ല: അനുഭവിച്ചവർ ജീവിച്ചിരിക്കുന്നുണ്ട്‌..!)
ആകെ മൊത്തം 35 million മലയാളികളിൽ മാത്രമാണു് ലോകത്ത് ഉള്ളതു്. ഭൂമിയിൽ എല്ലാ കോണിലും ഉണ്ടെന്നുള്ള സ്ഥിരം കേൾക്കാറുള്ള Mythൽ വിശ്വസിക്കുന്നുണ്ടോ? മറ്റു പ്രവാസ സമൂഹങ്ങളെ കാൾ വിത്യസ്തമായി മലയാളിക്ക് എന്താണുള്ളതു്?	അങ്ങിനെ സ്ഥിരം കേൾക്കുന്ന മിത്തിനെ കുറിച്ച്‌ അറിവില്ല. മറ്റ്‌ പ്രവാസ സമൂഹങ്ങളേക്കാൾ മലയാളിക്ക്‌ ഇത്തിരി ദുരഭിമാനം കൂടുതൽ ഉണ്ട്‌ എന്ന് തോന്നീട്ടുണ്ട്‌.പിന്നെ ഒരു നാലു കൈലി (ലുങ്കി, പേശ (തിരുവന്തൊരം) എന്നൊക്കെ പറയും..!) ആവശ്യത്തിനും അനാവശ്യത്തിനും തലയിൽ കെട്ടാനും അഴിക്കാനുമായി ഒരു തോർത്ത്‌, നാട്ടിൽ പോകുമ്പോൾ ലഗേജ്‌ കെട്ടാൻ കുറേ ചരടുകളും കാണും എന്ന് തോന്നുന്നു
കെ. എസ്. കോപാലകൃഷ്ണൻ എന്തുകൊണ്ടു്, അടൂർ ഗോപാലകൃഷ്ണനെ പോലെയും, പദ്മരാജന പോലെയും സിനിമ എറ്റുക്കുന്നില്ല?	കെ.എസ്‌.ജിയുടെ കായലും കയറും അത്ര മോശം സിനിമയാണോ; ചിത്തിരതോണിയിൽ അക്കരെ പോയി ശരറാന്തൽ തിരി താഴ്ത്തിയതൊക്കെ മറക്കാൻ പറ്റുമോ.അടൂരാനെ അത്ര പിടുത്തമില്ല, പത്മരാജനെ പെരുത്തിഷ്ടവും; സിനിമയും കഥകളും.
മലയാള സിനിമയിൽ നിങ്ങളുടെ സ്വഭാവവുമായി സാമ്യമുള്ള കഥാപാത്രം ഏതാണു്	എന്തായാലും 'തളത്തിൽ ദിനേശൻ' അല്ല..!!
ജിവിതം മൊത്തം കേരളത്തിൽ ജിവിച്ചിട്ട് രണ്ടു മാസം അമേരിക്കയിൽ ചുറ്റിതിരിഞ്ഞിട്ടു് തിരികെ നാട്ടിൽ വന്ന ശേഷം "മലയാലം കൊരച് കൊരച് പരയുന്ന"വരെ കണ്ടാൽ എന്തു ചെയ്യും?	ആശ്വാസം, അവർ രണ്ട്‌ മാസമെങ്കിലും ശീമേലായിരുന്നല്ലോ.. അടുത്ത പഞ്ചായത്ത്‌ വരെ പോലും പോയിട്ടില്ലാത്ത ചില ഐറ്റങ്ങൾ കൊരച്ച്‌ കൊരച്ച്‌ സംസാരിക്കുന്നതാണു അസഹനീയം; ഡാബറിന്റെ കഫ്‌ സിറപ്പ്‌ കൊണ്ട്‌ എന്തേലും പ്രയോജനമുണ്ടാവുമോ..?!
നിങ്ങളുടെ തൊഴിൽ മേഖല ഏത് ഗണത്തിൽ പെടും. ഉല്പാതനം കച്ചവടം ജന സേവനം വിനിമയം വിദ്യാഭ്യാസം	നിർമ്മാണ മേഖല ഇതിൽ ഉൾപെടുത്തിയിട്ടില്ലത്തതിനാൽ പറയുക വിഷമമാണ്‌.
ഇന്നു നമ്മുടെ നഗരങ്ങളിൽ യുവാക്കൾ നേരിടുന്ന ഏറ്റവും വലിയ പ്രശ്നം എന്താണു്?	യുവാക്കൾക്ക്‌ മാത്രമായി അങ്ങിനെ വല്ല പ്രശ്നവും ഇപ്പോൾ നഗരങ്ങളിൽ ഉണ്ടെന്ന് തോന്നുന്നില്ല ; ഇടയ്ക്കിടെ പാൻപരാഗ് കിട്ടാതാവുന്ന ഒരു പ്രശ്നം പണ്ടുണ്ടായിരുന്നു..!
മലയാള ഭാഷ വളരുകയാണോ, രൂപാന്തരപ്പെടുകയാണോ, വഷളാവുകയാണോ?	രൂപാന്തരീകരണത്തിലൂടെ വളർന്ന് വഷളാവുകയാണെന്ന് ഞാൻ പറയില്ല!
മനുഷ്യവാസമില്ലാത്ത ഒരു ദ്വീപിലേക്ക് നിങ്ങളെ ജീവപര്യന്തം നാടുകടത്തപ്പെടാൻ പോവുകയാണെന്നു സങ്കല്പ്പിക്കുക. നിങ്ങൾക്ക് വായിക്കാൻ രണ്ടു പുസ്തകങ്ങൾ കൂടെ കൊണ്ടുപോകാൻ അനുവതിക്കുന്നു. ഏതു് പുസ്തകങ്ങൾ കൊണ്ടുപോകും?	ടൈം സേവർ സ്റ്റാൻഡാർഡ്‌സിന്റെ രണ്ട്‌ വാല്യം, മറ്റൊന്നിനുമല്ല , തലയ്ക്ക്‌ വെച്ച്‌ കിടന്നുറങ്ങാൻ ഉയരം കറക്റ്റായിരിക്കും
കേരളത്തിൽ ഇപ്പോൾ ടിവി. പ്രേക്ഷരുടെ ഹരമായ റിയാലിറ്റി ഷോ എന്നറിയപ്പെടുന്ന അനേകം മത്സര പരമ്പരകളുണ്ടു്. താങ്കൾക്ക് ഒരു സാമാന്യം ഭേതപ്പെട്ട ഗായിക/ഗായകൻ ആണെന്നു സങ്കൽപ്പിക്കുക. താങ്കൾ ഈ മത്സരങ്ങളിൽ പങ്കെടുക്കുമോ? എന്തുകൊണ്ടു?	റിയാലിറ്റി ഷോ പരിപാടികൾ കേരളത്തിൽ മാത്രമല്ലല്ലോ, ആഗോളപ്രതിഭാസമല്ലേ..കേരളത്തിലേതിൽ താത്പര്യമില്ല, ബിഗ്ബ്രദർ പരിപാടിപോലെ വല്ലതുമാണേൽ നോക്കാം; ഗായകൻ എന്ന് സങ്കൽപ്പിക്കാൻ പോലും നാണമാകുന്നു.
നിങ്ങളുടേ മുന്നിൽ മൂന്നു buttonകളു ഉണ്ട്. അമർത്തിയാൽ ഈ ലോകത്തിലുള്ള ഏകാധിപതികൾ എല്ലാം നിന്ന നിൽപ്പിൽ തന്നെ ചത്തു് വീഴും. അമർത്തിയാൽ മലയാള മനോരമ പത്രം ഒറ്റ് രാത്രികൊണ്ടു Unicodeലേക്ക് മാറും. അമർത്തിയാൽ (ഇടിവാളിന്റെ ആഗ്രം സഫലമാകും) ബ്ലോഗിൽ ഉള്ള ഓർമ്മ കുറിപ്പിസ്റ്റുകൾക്കെല്ലാം "Amoniasia" വന്നു് എല്ലാം മറന്നു പോകും. ഇതിൽ ഒന്നുമാത്രമെ അമർത്താൻ കഴിയുകയുള്ളു. നിങ്ങൾ ഏതമർത്തും.? എന്തുകൊണ്ടു?"	രണ്ടാമത്തെ ബട്ടൺ അമർത്താൻ നോക്കും; മാത്തുകുട്ടിച്ചായൻ സമ്മതിക്കില്ലന്നുറപ്പുള്ളത്‌ കൊണ്ട്‌.
ഇവരിൽ താങ്കൾക്ക് ആരെയാണു് കൂടുതൽ ബഹുമാനം: K. കരുണാകരൻ, EMS, AKG, സി.എച്ച്. മുഹമ്മദ്കോയ, മന്നത്ത് പത്മനാഭൻ, പാണക്കാട് സയ്യിദ് മുഹമ്മദലി ഷിഹാബ് തങ്ങൾ. Dr. പല്പ്പു. വെള്ളാപ്പള്ളി നടേശൻ	ഇ.എം.എസ്‌ ; കറക്റ്റ്‌ സമയത്ത്‌ തട്ടിപ്പോയതിനാൽ ഉഗ്രൻ ബക്കറ്റ് കളക്ഷനും പിന്നെ ഒരു ഇ.എം.എസ്‌ അക്കാദമിയുമുണ്ടായി.
ഏറ്റവും ഭാഗ്യവാനായ മനുഷ്യന്‍ ആരാണ്?	നല്ല സൗഹൃദങ്ങൾ കാത്ത്‌ സൂക്ഷിക്കുന്നവൻ
നിങ്ങളെ അടുത്തറിഞ്ഞ സുഹൃത്തുക്കൾ എങ്ങനെ കരുതുന്നു. 1) ഒരു പാവം 2) കൊച്ചു ഗള്ളൻ 3) പുലി 4) പാമ്പ് 5) തമാശക്കാാാാാാാരൻ 6) തണ്ണിച്ചായൻ 7) കുൾസ് 8) പൊടിയൻ 9) തടിയൻ ഇതിൽ പെടാത്ത ഏതെങ്കിലും പേരുണ്ടെങ്കിൽ അതും എഴുതാം.	ഞാൻ ഒരു ഭാഗ്യവാനായ മനുഷ്യൻ ആണന്ന് (റെഫർ: മുകളിലത്തെ ഉത്തരം)
ഇന്ത്യയുടേയും ചൈനയുടേയും സാമ്പത്തീക മുന്നേറ്റത്തിൽ ഇവിടങ്ങളിലെ ഉയർന്ന ജനസംഖ്യയും ഒരു ഘടകമാണെന്ന് താങ്കൾ വിശ്വസിക്കുന്നുവോ?	ചൈനയുടെ കാര്യം അറിഞ്ഞൂടാ, ഇന്ത്യയുടെ കാര്യത്തിൽ അങ്ങിനെ ആവണം. ജനസംഖ്യ വർദ്ധിച്ചതിനാൽ ജോലിസാധ്യത കുറഞ്ഞു; പലരും വിദേശങ്ങളിൽ ജോലിതേടാൻ തുടങ്ങി, പ്രവാസികളുടെ പണം ഇന്ത്യയുടെ സമ്പദ്ഘടനയിൽ ചെറുതല്ലാത്ത സ്വാധീനം ചെലുത്തുന്നുണ്ട്‌ എന്ന് ഞാൻ കരുതുന്നു. പ്രവാസം നാട്ടിലെ പ്രസവത്തെ വല്ലാതെ കുറച്ചിട്ടുണ്ടെന്നതും കൂടി കൂട്ടിവായിക്കുമ്പോൾ ജനസംഖ്യയും സാമ്പത്തിക മേഖലയും തമ്മിൽ ചില കൊടുക്കൽ വാങ്ങൽ ബന്ധമുണ്ട്‌ എന്ന് കരുതാം.
ബ്ലോഗിൽ പോട്ടങ്ങൾ പിടിക്കുന്ന ഏതെങ്കിലും അണ്ണന്റെ ഫോട്ടോ നിരൂപണങ്ങൾ കേട്ട ശേഷം അദ്ദേഹത്തിന്റെ തലയിൽ കാമറ തല്ലി പോട്ടിക്കാൻ തോന്നിയിട്ടുണ്ടോ? (തല്ലിപ്പോട്ടിക്കാൻ ഉദ്ദേശിച്ച camera, lense, എന്നീ വിവരങ്ങൾ കൂടി വിശതീകരിക്കുക)	ചില പോട്ടങ്ങൾ കണ്ട് അസൂയ തോന്നീട്ടുണ്ട്‌ എന്നത്‌ സത്യമാണ്‌,അതിനു തെളിവുമുണ്ട്; പക്ഷേ ക്യാമറകൊണ്ട്‌ തന്നെ തല തല്ലിപൊട്ടിക്കാനൊന്നും തോന്നീട്ടില്ല -അതിന്‌ വേറെ എന്തെല്ലാം നല്ല മാർഗ്ഗങ്ങൾ ഉണ്ട്‌..!
നിങ്ങൾ പ്രധാന മന്ത്രിയാകുന്നു. എന്തു ചെയ്യും?	അതാണു നിയോഗമെങ്കിൽ ഭരിക്കും, അല്ലാതെ എന്ത്‌ ചെയ്യാനാ (സ്വിസ്‌ ആകണമെന്നില്ല, ഏതെങ്കിലും അക്കൗണ്ട്‌ നമ്പർ തന്നാൽ കുറച്ച്‌ അഡ്ജസ്റ്റ്‌ ചെയ്യാം)
നിങ്ങൾക്ക് മൂന്നു വരം കിട്ടുന്നു എന്തെല്ലാം അവശ്യപ്പെടും? (കൂടുതൽ വരം കുട്ടാനുള്ള വരം ഇപ്പോൾ stockൽ ഇല്ല. അതു ചോദിച്ച് ചളമാക്കരുതു്)	യാത്രയ്ക്ക്‌ ഒരു മാന്ത്രിക പരവതാനി,പരിപൂർണ്ണ ആരോഗ്യത്തോടെയുള്ള നിത്യയൗവനം ,എന്റെ സ്വപ്നങ്ങളെ മറ്റുള്ളവർക്ക്‌ കാണിച്ച്‌ കൊടുക്കാനുള്ള കഴിവ്‌
കേരളത്തിൽ beef നിരോധിച്ചാൽ നിങ്ങൾ എന്തു് ചെയ്യും?	വീൽ ബീഫ് ആണെനിക്ക് കൂടുതൽ പ്രിയം. കേരളത്തിലല്ലേ, എവിടെയെങ്കിലും എങ്ങിനെയെങ്കിലും കിട്ടാതിരിക്കില്ല, പ്രത്യേകിച്ച്‌ നിരോധിക്കുന്ന സാഹചര്യത്തിൽ.
1 Billion US$ നിങ്ങൾക്ക് ലഭിക്കുന്നു എന്തു ചെയ്യും	അന്നേരം നാട്ടിലേക്ക്‌ വണ്ടി കയറും ; ആഗ്രഹം പോലെ കുടുബസമേതം ലോകപര്യടനം നടത്തും, സഹായത്തിനർഹരായവരെ കണ്ടെത്തി സഹായിക്കും- പള്ളി,അമ്പലം, ചർച്ച്‌ പണികൾക്ക്‌ അഞ്ച്‌ പൈസ പോലും സംഭാവന കൊടുക്കില്ല.
പ്രാവാസ ജീവിതത്തിൽ എന്തെങ്കിലും നഷടമായിട്ടുണ്ടോ?	ചില സ്വപ്നങ്ങൾ , കരുതലുകൾ, കാഴ്ചപാടുകൾ ഒക്കെ നഷ്ടമായിട്ടുണ്ട്‌. കോട്ടങ്ങളേക്കാൾ നേട്ടമാണെന്നും പറയാം; തടികൂടി, കുടവയർ ചാടി അങ്ങിനെ എന്തൊക്കെ..!
രാഷ്ട്രീയക്കാരെ ഇഷ്ടമാണൊ? ഈ ഇലക്ഷന്‍ കാലത്ത് താങ്കള്‍ നാട്ടിലുണ്ടെന്നും ഒരു സ്ഥാനാര്‍ത്ഥി വോട്ട് ചോദിച്ച് വീട്ടില്‍ വരുന്നുവെന്നും കരുതുക.എന്തു പറയും?	മൂന്ന് തവണ പ്രിസൈഡിംഗ്‌ ഓഫീസർ ആയി ഇലക്ഷൻ നടത്തുന്നതിൽ ഭാഗമായിടുണ്ട്‌, ആ ദിവസങ്ങളിൽ രാഷ്ട്രീയക്കാരെ ഭയങ്കര ഇഷ്ടമായിരുന്നു; എന്താ സ്നേഹം..! വോട്ട്‌ അങ്ങേർക്ക്‌ തന്നെ കൊടുക്കുമെന്ന് പറയും, വീട്ടിൽ വരുന്നവരെ അപമാനിക്കാൻ പാടില്ലന്നാണ്‌.
Mark Twain, R.K. Narayan, Basheer. ഇവർ മൂന്നുപേരും ഒരു restaurantൽ വെച്ചു കണ്ടു മുട്ടുന്നു. എന്തു സംഭവിക്കും?	ബഷീർ മറ്റ്‌ രണ്ട്‌ പേർക്കും പരിപ്പ്‌ വടയും ചായയും ഓഫർ ചെയ്യുമായിരിക്കും, കാശ്‌ അവരെ കൊണ്ട്‌ കൊടുപ്പിക്കുകയും ചെയ്യും. ഇവരു മൂന്ന് പേരും കൂടി കത്തിയടിച്ചിരുന്ന് ആ റെസ്റ്റാറന്റ്‌ പൂട്ടിക്കാതിരുന്നാൽ മതിയായിരുന്നു.
നിങ്ങൾ Dinnerനു് ഈ പട്ടികയിൽ കൊടുത്തിരിക്കുന്ന രണ്ടു പേരിൽ ആരെ ക്ഷനിക്കും? അവർക്ക് എന്തു ഭക്ഷണം കൊടുക്കും? അവരോടു എന്തെല്ലാം ചോദിക്കും? 1) ഇന്ദിര ഗാന്ധി 2) K.J. Yesudas 3) കാട്ടുകള്ളൻ വീരപ്പൻ 4) മാമുക്കോയ 5) കൊച്ചുത്രേസ്യ 6) അടൂർ ഭാസി 7) Amjad Khan 8) Jimmy Wales 9) Mother Theresa 10) Khalil Gibran 11) Sister Alphonsa 12) കുറുമാൻ 13) കലാഭവൻ മണി 14) സ്റ്റീവ് മൿ-കറി 15) Charles Dickens 16) Kuldip Nayar 17) Arundhati Roy 18) Charlie Chaplin 19) R.K. Lakshman (cartoonist) 20) ഇഞ്ചിപ്പെണ്ണു്	ഇതുവരെ ആരും വിളിച്ചിട്ടില്ലന്ന് തോന്നുന്നതിനാൽ മാമുക്കോയയെ ഞാൻ വിളിക്കും, ഞമ്മന്റെ ആളാ. പിന്നെ ചാർളി ചാപ്ലിൻ , അവരു നല്ല മാച്ച്‌ ആയിരിക്കും. തേങ്ങാപാലൊഴിച്ച നല്ല ചൂട് കഞ്ഞി, പപ്പടം; ചുമ്മാ ട്രൈ ചെയ്യട്ടന്നേ . ഡിന്നറിന്റെ ഇടയ്ക്ക്‌ പുന്നകൈ മന്നനിലെ ചാപ്ലിൻ ചെല്ലപ്പയെ കാണിച്ച്‌ കൊടുത്ത്‌ ഒറിജിനൽ ചാപ്ലിനെ ഒന്ന് ചിരിപ്പിക്കാനും പരിപാടിയുണ്ട്‌.
Nostalgia-mania-dingolapi എന്ന അതിഭീകരവും ഭയാനകവുമായ രോഗം ബാദിച്ച മലയാളി ചേട്ടന്മാരെ എങ്ങനെ ചികിത്സിക്കും? ഇവരെ ബീമ പള്ളിയിൽ കൊണ്ടുപോയി ചങ്ങലക്കിടുന്നതിനെ കുറിച്ച് എന്താണു് അഭിപ്രായം.	Nostalgia-mania-dingolapi ക്ക്‌ മെഡിക്കൽ സയൻസിൽ എന്ത്‌ പറയുമെന്ന് ഏതെങ്കിലും സിനിമയിലെ ഡോക്റ്ററോട്‌ ചോദിച്ചിട്ട്‌ ഇതിനു മറുപടി പറയാം; ബീമാപള്ളിയിൽ ചങ്ങലകൾക്കും ഇങ്ങെനത്തെ എന്തോ അസുഖമാണന്നാണ്‌ കേട്ടിട്ടുള്ളത്‌..!
നിങ്ങൾ ഇപ്പോൾ ഇരിക്കുന്ന സ്ഥലത്തുള്ള ജനാലയിൽ നിന്നും പുറത്തേക്ക് നോക്കുക. അവിടെ കാണുന്ന ദൃശ്യം 100 വാക്കിൽ കുറയാതെ വിവരിക്കുക.	ഹാലജൻ ലാമ്പിന്റെ വെളിച്ചത്തിൽ കുളിച്ച്‌ ചെറുകാറ്റിൽ തലയാട്ടി നിൽക്കുന്ന മൂന്ന് നാല്‌ വാഴകൾ, ഒരു ചെമ്പരത്തി, പിന്നെ ഒരു മുസാന്ത ചെടി , അതിനപ്പുറം വിശാലതയെ കെട്ടി മറച്ച്‌ കോൺക്രീറ്റിന്റെ 4 മീറ്റർ പൊക്കമുള്ള മതിലാണു ഹേ, ഒന്നും കാണാൻ പറ്റില്ല.നേർക്കാഴ്ചയെ മറയ്ക്കുന്നതെങ്കിലും ശബ്ദവീചികളെ തടയാനാവാത്ത ഈ ഇലക്സ്ട്രിഫൈഡ്‌ മതിലിനപ്പുറം വേണമെങ്കിൽ ഊഹിച്ച്‌ പറയാം; കണ്ടൈനറുകൾ കൊണ്ട്‌ പോകുന്ന വലിയ ട്രൈലറുകൾ നിരത്തിലൂടെ നിരനിരയായ്‌ നീങ്ങുന്നുണ്ടാവണം, സ്റ്റെൻഗണ്ണുകൾ പിടിച്ച്‌ കുറേ സെക്യൂരിറ്റികൾ കറങ്ങി നടക്കുന്നുണ്ടാവണം,ലിപ്സ്റ്റിക്കിന്റെ ആവരണത്താൽ ദയനീയത മറച്ച ചിരിയുമായ്‌ കസ്റ്റമേർസ്സിനെ കാത്തു നിൽക്കുന്ന പെണ്ണുങ്ങളുണ്ടാകും, ബീഫ്‌ സൂയ മണക്കുന്ന ബീയറിന്റെ ലഹരി പടരുന്ന ഗോത്ര താളത്തിന്റെ ആരവം ഉയരുന്ന ബുഷ്‌ ബാറുകളിലെ അരണ്ട വെളിച്ചമുണ്ടാകും, അതിനുമപ്പുറം തകരഷീറ്റിന്റെ കൂരയ്ക്ക്‌ കീഴേ ഗാരിയും കസാവയും യാമും കഴിക്കുന്ന കുടുംബങ്ങളിലെ ദാരിദ്രത്തിന്റെ ഇരുണ്ട ചിത്രങ്ങളും ഉണ്ടാകും.
ബ്ലോഗിൽ അവസാനമായ എഴുതിയ post എന്തിനെഴുതി? ഇനിയും എഴുതുമോ?	അത്‌ ഒരു ചെറിയ പോസ്റ്റായിരുന്നു. ഒരു ഫോട്ടം പോസ്റ്റ്‌ കണ്ടപ്പോൾ സമാനതയോ വൈരുധ്യമോ ഒക്കെ തോന്നിയ ഒരു പടം പോസ്റ്റാക്കി, അത്രേയുള്ളൂ.
ബ്ലോഗിൽ അവസാനമായി വായിച്ച ലേഖനം ഏതാണു്?
ബ്ലോഗിൽ അവസാനമായി വായിച്ച അതുന്താധുനിക കവിത വായിച്ച ശേഷം നിങ്ങൾ എന്തു ചെയ്തു? കരഞ്ഞു. ചിരിച്ചോ. തലകറങ്ങി നിലത്തു വീണു്. എഴുതിയവനെ ഫോണിൽ വിളിച്ചു തെറി പറഞ്ഞു. മുകളിൽ പറഞ്ഞ എല്ലാം സംഭവിച്ചു് എന്നു് ഭ്രാന്താശുപത്രിയിൽ എത്തിയപ്പോൾ സുഹൃത്തുക്കൾ പറഞ്ഞു.	അത്യന്താധുനിക കവിതയും കഥകളും വായനാലിസ്റ്റിൽ പെടുത്താറില്ല, ഉള്ള സമയം പാഴാക്കാതെ മനസ്സിലാകുന്ന രീതിയിലുള്ളത് വായിക്കുന്നതാവില്ലേ അഭികാമ്യം. രക്തം, കഫം മലം മൂത്രം തുടങ്ങിയ ക്ലിനിക്കൽ പദങ്ങൾ തിരുകിയാലെ എന്തു എതും അത്യന്താധുനികമാകുകയുള്ളൂ എന്ന് കരുതുന്ന എഴുത്തുകാരോട്‌ അത്ര പ്രതിപത്തിയില്ല.
ഒരു hotelൽ രണ്ടു blog meet നടക്കുന്നു. അതിൽ ഒരു barൽ ബ്ലോഗ് കവികളും വേറൊരു barൽ ബ്ലോഗ് ഓർമ്മക്കുറുപ്പ്istകളും ഉണ്ടു്. നിങ്ങൾ ഏതു barൽ കയറും.	ഓർമ്മ കുറിപ്പിസ്റ്റുകളുടെ കൂട്ടത്തിൽ കയറും; മറ്റേടത്ത്‌ അത്യാധുനികന്മാർ ഉണ്ടായേക്കാം ,(റെഫർ: മുകളിലത്തെ ഉത്തരം)
നിങ്ങൾ കൈപ്പള്ളിയെ കണ്ടു മുട്ടുന്നു. എന്തു ചോദിക്കും? (കാശു്, sandwich, വാച്ച്, മോതിരം, ഫോൺ, ചെരുപ്പ് മുതലായവ ചോദിക്കരുതു്)	പെട്ടെന്ന് ഒന്നും ചോദിക്കാൻ പറ്റുമെന്ന് തോന്നുന്നില്ല, കാരണം ആകെ നേരിൽ കണ്ട്‌ പരിചയപ്പെടണം എന്ന് തോന്നിയിട്ടുള്ള അപൂർവ്വം ബ്ലോഗർ മാരിൽ ഒരാളെ പെട്ടന്ന് കണ്ട്‌ മുട്ടിയാൽ അന്തംവിട്ട്‌ പോകുകയേ ഉള്ളൂ.
ഒരു International blog meet വിളിച്ചു കൂട്ടുന്നു. അതിനായി കാര്യപരിപാടികൾ അവതരിപ്പിക്കാൻ ആരെയെല്ലാം ഉൾപെടുത്തും? എന്തെല്ലാം പരിപാടികൾ ഉണ്ടായിരിക്കും?	International blog meet അല്ലേ,എത്ര പരിശ്രമിച്ചിട്ടും ആകെ ഒരു സെഷൻ ആണു മലയാളവിഭാഗത്തിനു കിട്ടിയത്‌, അതും നാലഞ്ച്‌ പ്രബന്ധങ്ങൾ അവതരിപ്പിക്കാനുള്ള സമയം മാത്രം വരമൊഴി പ്രസംഗം :സിബു ബ്ലോഗിന്റെ മല്ലു എഫ്ക്റ്റ്‌:കൈപ്പള്ളി ഞാനും ബ്ലോഗും അഥവാ വിക്കിയും പട്ടമരപ്പും : കേരളാ ഫാർമർ മലയാളം ബ്ലോഗിന്റെ ജാതിവ്യവസ്ഥ : ചിത്രകാരൻ കരിവാരാഘോഷങ്ങളുടെ കാലികപ്രസക്തി : ഇഞ്ചിപെണ്ണ്‌ ഇതിനു ശേഷം സമയമുണ്ടെങ്കിൽ മലയാള ബ്ലോഗിന്റെ പഞ്ചാംഗശാസ്ത്രം എന്ന വിഷയത്തിൽ ഉമേഷ്‌ അവർകൾ നയിക്കുന്ന ഒരു ഗണിതപ്രശ്നോത്തരി ഉണ്ടായിരിക്കുന്നതാണ്‌.
ബ്ലോഗിൽ ആരംഭിക്കുന്ന സൌഹൃദങ്ങളെ താങ്കൾ എങ്ങനെ കാണുന്നു? (കണ്ണു കൊണ്ടു കാണുന്നു എന്നു പറയരുത്, ബാക്കി എല്ലാവരും മൂക്കു കൊണ്ടാണോ കാണുന്നതു്?)	ബ്ലോഗ്‌ സൗഹൃദങ്ങളെ ബ്ലോഗിൽ തന്നെ ഒതുക്കാതെ മീറ്റിലേക്കും ഈറ്റിലേക്കും ചാറ്റിലേക്കും തിരിച്ച്‌ വിടുന്നതിനെ യോജിക്കുന്നില്ല. മുഖം മൂടിയണിഞ്ഞ അനോണികളേക്കാൾ ഭീകരന്മാരാണ്‌ തലമൂടി കടന്ന് വരുന്ന സൗഹൃദ സംഘങ്ങൾ എന്ന് ഞാൻ പറയും : ഹോ സമാധാനമായ്‌..ഒന്ന് ശ്വാസം വിടട്ടേ
ഈ പറയുന്ന എഴുത്തുകാരിൽ നിങ്ങളെ സ്വാധീനിച്ച എഴുത്തുകാരൻ/കാരി ആരാണു്: മാധവികുട്ടി, എം. മുകുന്ദൻ, സാറ ജോസഫ്, സക്കറിയ, ഓ.വി. വിജയൻ, ബഷീർ, ആനന്ദ്, വി.കെ.എൻ, തകഴി, എം.ടി വാസുദേവൻ നായർ, പെരുമ്പടവം, വിശാലമനസ്ക്കൻ, കുറുമാൻ, ഓ.എൻ.വീ കുറുപ്പ്, കുമാരനാശാൻ.	ഇവരുടെ ഒക്കെ കൃതികൾ വായിച്ചിട്ടുണ്ട്‌ , പക്ഷേ എന്തെങ്കിലും സ്വാധീനം ഏതെങ്കിലും തരത്തിൽ ഉണ്ടായിട്ടുണ്ടെന്ന് കരുതുന്നില്ല; ഈ ലിസ്റ്റിൽ നിന്നും ഏറെ ഇഷ്ടം മാധവികുട്ടി, വി.കെ എൻ എന്നിവരോടാണ്‌.
കാട്ടിലാണോ ഉത്സവപറമ്പിലാണോ ആനകളെ കാണാൻ കൂടുതൽ ഭംഗി?	"കാട്ടാന നാട്ടിലിറങ്ങിയാൽ എന്തൂട്ട്‌ കാട്ടാനാ.." കാട്ടാനകളുടെ വന്യസൗന്ദര്യം ഉത്സവപറമ്പിൽ നെറ്റിപട്ടം കെട്ടി തിടമ്പെഴുന്നെള്ളിച്ച്‌ കൂച്ച്‌ വിലങ്ങിട്ട്‌ നിർത്തിയിരിക്കുന്ന ആനകൾക്കില്ല. കാട്ടാനകളെ വളരെ അടുത്ത്‌ കണ്ടിട്ടുണ്ട്‌.
ആരുടേയും ബ്ലോഗുകൾ വേണമെങ്കിലും താങ്കൾക്ക് ഡിലീറ്റ് ചെയ്യാം എന്നൊരു അവകാശം ലഭിച്ചാൽ ആദ്യം താങ്കൾ ഡിലീറ്റ് ചെയ്യുന്ന 5 ബ്ലോഗുകളുടെ പേരു പറയുക?	അതിരാവിലെ വെറും വയറ്റിൽ എത്ര പാളയംകോടൻ പഴം കഴിക്കാം എന്ന് ചോദിക്കുന്നത്‌ പോലെയാണല്ലോ ഇത്‌. ആദ്യം തന്നെ ഒന്നേ ഡിലീറ്റാൻ പറ്റൂ. അത്‌ മിക്കവാറും സമയവ്യത്യാസം വല്ലാതെ പ്രശ്നമുണ്ടാക്കുന്നതിനാൽ ഒരു മത്സരത്തിൽ പോലും നേരെ ചൊവ്വെ പങ്കെടുക്കാൻ പറ്റാത്ത ദേഷ്യത്തിൽ ഈ ഗോംബറ്റീഷൻ ബ്ലോഗ്‌ തന്നെയാവും ഡിലീറ്റുക - ഇനിയെങ്കിലും സമാധാനം കിട്ടുമോ എന്ന് നോക്കട്ടെ.
അടുത്ത മത്സരത്തിനു് ചോദിക്കേണ്ട ഒരു ചോദ്യം നിർദ്ദേശിക്കു.	ഗോമ്പറ്റീഷനിൽ ഇതുവരെ താങ്കൾക്ക്‌ എത്ര പോയിന്റ്‌ അല്ലെങ്കിൽ പെറ്റി ലഭിച്ചു ; ഉത്തരം എന്തായാലും ഉഗ്രൻ ക്ലൂ ആയിരിക്കും.