48 - കൃഷണ തൃഷ്ണ

ചോദ്യങ്ങൾ	ഉത്തരങ്ങൾ
എന്താണു ദൈവം	സുന്ദരമായ ഏദന്‍തോട്ടത്തിന്റെ നടുവില്‍ പാപത്തിന്റെ വൃക്ഷം നടുകയും അതിലെ പഴം തിന്നരുതെന്നു വിലക്കുകയും ചെയ്ത സ്‌നേഹസമ്പന്നന്‍. സ്വന്തം കല്‍പ്പനകള്‍ ആടു തിന്നപ്പോള്‍ ഒരാടിനെപ്പോലും വരുതിക്കു നിര്‍ത്താന്‍ കരുത്തില്ലാത്ത സര്‍വ്വശക്തന്‍. ഒരു കാട്ടാളന്റെ ശരമുനയുടെ ലക്ഷ്യം തെറ്റിക്കാനാകാത്ത സര്‍വ്വജ്ഞാനി. എന്തിന്, ഒരു പിഞ്ചുകുഞ്ഞിനെ ബോംബ്‌ ഷെല്ലില്‍ നിന്നു രക്ഷിക്കാന്‍ കഴിവില്ലാത്ത കരുണാമയന്‍. മനുഷ്യനെ കള്ളികളിലാക്കാന്‍ മനുഷ്യന്‍ മെനഞ്ഞ കഥകളിലെ നിത്യഹരിതനായകന്‍ !!! ചുരുക്കിപ്പറഞ്ഞാല്‍, ചിലര്‍ക്കു ദൈവം വലിയ ആശ്വാസം. ഇത്തരം ചിലരുള്ളതിനാല്‍‌ വേറെ ചിലര്‍ക്ക്‌ അതിലും വലിയ ആശ്വാസം. അതന്നേ..
കടമ, ദൈവം, മതം, കുടുംബം, സ്വത്ത്. നിങ്ങൾക്ക് തോന്നുന്ന പ്രാധാന്യമനുസരിച്ച് ക്രമത്തിൽ എഴുതുക.	കടമ, കുടുംബം, സ്വത്ത്. മതവും ദൈവവും പ്രാധാന്യമര്‍ഹിക്കുന്നില്ല. കടമയെക്കുറിച്ചു പറയാന്‍ വേറെ ചോദ്യമില്ലാത്തതിനാല്‍ ഇതും കൂടി ഇവിടൊന്നെഴുതി വെക്കുന്നു. പണ്ടു മുത്തശ്ശി പഠിപ്പിച്ചതാണ്‌. ഓഫ് ടോപ്പിക്കെഴുതുന്നതിനു ക്ഷമാപണത്തോടെ. "ജലാശയശ്ച വൃക്ഷാശ്ച വിശ്രാമഗൃഹമധ്വനി സേതു: പ്രതിഷ്ഠിതോ യേന തേന ലോകത്രയം ജിതം." ജലാശയങ്ങള്‍ സൃഷ്ടിക്കുക, വൃക്ഷങ്ങള്‍ വെച്ചുപിടിപ്പിക്കുക, വിശ്രമമന്ദിരങ്ങള്‍ ഉണ്ടാക്കുക, റോഡുകള്‍ വെട്ടിക്കുക, പാലങ്ങള്‍ നിര്‍മ്മിക്കുക എന്നീ കാര്യങ്ങള്‍ ചെയ്യുന്ന മനുഷ്യനെ മൂന്നുലോകങ്ങളേയും കീഴടക്കിയ യോഗികളുടെ ശ്രേണിയില്‍പ്പെടുത്തി ആദരിക്കേണ്ടതാണ്‌. ഈ ശ്രമങ്ങളില്‍ ഭാഗഭാക്കാകുന്നവരാണ്‌ യഥാര്‍ത്ഥ ഭക്തരെന്നു തുടര്‍ശ്ലോകം പറയുന്നു. പൌരാണികത പഠിപ്പിച്ചത് ഇതാണെന്നിരിക്കെ നമ്മുടെ ഭക്തരൊക്കെ ഇതൊന്നും കാണാതെ, യഥാര്‍ത്ഥ കടമകള്‍ മറന്ന്‌, പുണ്യം പ്രസവിപ്പിക്കാന്‍ നേര്‍ച്ചകളുമായി കാവുകളും പള്ളികളും തോറും നടക്കുന്നതു കാണുമ്പോള്‍ നമ്മുടെ പൌരധര്‍മ്മം കപടഭക്തിയുടെ കടലെടുത്തുവല്ലോ എന്ന ഒരു വ്യസനമുണ്ട്.
എന്താണു് വിലമതിക്കാനാവത്തതു്?	മാതൃസ്‌നേഹം. “മാതൃതാഡിതോ ബാലോ, മാതര മേവാനുരോദിതി“ എന്നല്ലേ പ്രമാണം. അമ്മയുടെ കൈയില്‍‌‌ നിന്നും‌ അടി വാങ്ങുന്ന കുട്ടി അമ്മയെത്തന്നെ വിളിച്ചു കരയുന്നു. അടിച്ച കൈകൊണ്ടു തന്നെ അമ്മ ചോറുരുട്ടിക്കൊടുക്കുകയും‌ ചെയ്യുന്നു. ജന്തുക്കളിലും‌ മനുഷ്യരിലും‌ പ്രപഞ്ചത്തിലെ ജീവന്റെ ഓരോ തുടിപ്പിലും‌ കാണുന്ന ഈ മമത വിലമതിക്കാനാവില്ല. പിന്നൊന്നുള്ളത് കലമാന്റെ കൂര്‍‌ത്ത കൊമ്പിന്റെ അറ്റത്ത് കണ്ണു ചൊറിയുന്ന പേടമാനിന്റെ വിശ്വാസമാണ്. ഹൃദയത്തിന്റെ ഉടമ എന്നവകാശപ്പെടുന്ന മനുഷ്യനെപ്പോലും‌ വിസ്‌മയിപ്പിക്കുന്ന വിശ്വാസം.
വംശനാശ ഭീഷണി നേരിടുന്ന ഒരു മൃഗത്തെ സംരക്ഷിക്കുന്നതിനായി രണ്ടിടങ്ങളിൽ ഒന്നു തിരഞ്ഞെടുക്കാൻ നിങ്ങളെ ചുമതലപ്പെടുത്തുന്നു. തിരഞ്ഞെടുക്കുന്ന സ്ഥലം പൂർണ്ണമായും ഇടിച്ചു നിരത്തുകയും ചെയ്യും. 1) ഒരു മത വിഭാഗത്തിന്റെ ആരാധനാലയം 2) 10,000 തൊഴിലാളികൾ ജോലി ചെയ്യുന്ന ഒരു വ്യവസായ സ്ഥാപനം.. ഇതിൽ ഏതു തിരഞ്ഞെടുക്കു? എന്തുകൊണ്ടു്?	രണ്ടും ചെയ്യില്ല. ഞാന്‍ തീവ്രമൃഗസ്‌നേഹിയല്ല. മനുഷ്യസ്‌നേഹിയാണു താനും. മൃഗസ്‌നേഹിയായ ഒരു മാതാവിന്റെ മകനല്ലേ മനുഷ്യരെ കൊല്ലണമെന്നു ഈയിടെ പറഞ്ഞത് ? പിന്നെ ആരാധനാലയവും‌ വ്യവസായശാലയും‌ തമ്മില്‍‌ അത്ര കണ്ടു വ്യത്യാസമില്ലാത്ത ഇക്കാലത്ത് ആരാധനാലയം‌ പൊളിച്ചാലും‌ 10,000-ല്‍‌ പരം‌ പേര്‍ക്കു തൊഴില്‍‌ നഷ്‌ടപ്പെടും‌.
ഗായകന്‍, അദ്ധ്യാപകന്‍, കുശിനിക്കാരന്‍, ആശാരി, കോമാളി എന്നീ അഞ്ചു തൊഴിലുകളേ ലഭ്യമുള്ളു എന്നു വന്നാല്‍ താങ്കള്‍ ഏതു തിരഞ്ഞെടുക്കും?	സല്ലാപത്തിലെ ആശാരി ഗായകനായതുപോലെ നിലവിലുള്ള കോമാളി വേഷത്തില്‍ നിന്നും ഒരു അദ്ധ്യാപകനാകാന്‍ ശ്രമിക്കും.
ഈയിടെയായി ഒറ്റയ്ക്കിരിക്കുമ്പോള്‍ ഒരു ഏകാന്തത അനുഭവപ്പെടാറുണ്ടെന്ന് തോന്നുന്നു?	ഏകാന്തതയുടേയും‌ ഒറ്റപ്പെടലിന്റേയും‌ പരന്ന സമുദ്രങ്ങളിലെ ചെറുദ്വീപാണ്‌ ജീവിതം. ഈ ഏകാന്തതയും‌ ഒറ്റപ്പെടലും‌ ഇല്ലായിരുന്നെങ്കില്‍‌ നിങ്ങള്‍‌ നിങ്ങളോ, ഞാന്‍‌ ‌ ഞാനോ ആകുമായിരുന്നില്ല.
താങ്കളെ വീണ്ടും അഞ്ചുവര്‍ഷത്തേക്ക് കോളേജ് ജീവിതത്തിലേക്ക് തിരികെ വിടുന്നു എന്നു സങ്കല്‍പ്പിക്കുക. ഏതുവിഷയം തെരഞ്ഞെടുക്കും? എന്തുകൊണ്ട്?	ഇംഗ്ലീഷ് സാഹിത്യം. പിന്നെ സംസ്‌കൃതം. വായിച്ചിട്ടും പഠിച്ചിട്ടും മനസ്സിലാകാത്ത നിരവധി കാര്യങ്ങള്‍ രണ്ടിലും കടല്‍പോലെ മുന്നില്‍ കിടക്കുന്നതുകൊണ്ട്.
എന്താണു് മലയാളിയുടെ അശ്ലീലത്തിന്റെ വ്യാഖ്യാനം?	ഭാര്യയുടെ ആര്‍ത്തവസമയത്ത് വികാരശമനത്തിനായി ബഹുഭാര്യാത്വമാകാമെന്നു മതപണ്ഡിതന്‍മാര്‍ക്കു തുറന്നു പറയാം. എന്നാല്‍ അതു താഴെ ജംഗ്‌ഷനിലെ ചായക്കടയില്‍ ഇരുന്നു കുഞ്ഞാലി പറഞ്ഞാല്‍ അശ്ലീലം. ഇതാണു മലയാളിയുടെ അശ്ലീലവ്യാഖ്യാനം. ബഹുഭൂരിപക്ഷം ജനങ്ങളുടേയും ജീവിതത്തിലെ എല്ലാ വലിയ രഹസ്യങ്ങളും ലൈംഗികതയുമായി ബന്ധപ്പെട്ടിരിക്കുന്നു. കേരളത്തിലെ ലൈംഗികകുറ്റകൃത്യങ്ങള്‍ നോക്കിയാല്‍ പ്രതികളില്‍ കൂടുതല്‍ പേരും വിവാഹിതരും കുടുംബമായി കഴിയുന്നവരുമാണ്‌. കൌമാരക്കാരുടെ എണ്ണം തുലോം കുറവാണ്‌. അശ്ലീലത്തെക്കുറിച്ച്‌ Need to say more? സ്വയമശുദ്ധ: പരാനാശങ്കതേ - സ്വയം‌ അശുദ്ധനായിട്ട്, അന്യരെ ശങ്കിക്കുന്നു. അതാണ്‌ വലിയ അശ്ലീലം.
കുട്ടിയായിരുന്നപ്പോള്‍ ആയിത്തീരണമെന്ന് ആഗ്രഹിച്ചതിനുമപ്പുറത്ത്‌ താങ്കളുയര്‍ന്നോ? എങ്കില്‍ അതില്‍ സന്തോഷിക്കുന്നുണ്ടോ?	ഇല്ല. ഒരു ഇന്‍വെസ്റ്റിഗേറ്റീവ് ജേര്‍ണ്ണലിസ്റ്റ് ആകണമെന്നതായിരുന്നു എന്നത്തേയും ആഗ്രഹം. നടന്നിട്ടില്ല. അതിനാല്‍ സന്തോഷിക്കുന്നില്ല.
ഇഷ്ടപ്പെട്ട ഭക്ഷണം ഏതാണു്? എന്തുകൊണ്ടു്? സ്വന്തമായി പാകം ചെയ്യാൻ അറിയാമോ?	ചോറും തൈരും ചുട്ടരച്ചതേങ്ങാചമ്മന്തിയും. വളരെ നന്നായി പാചകം‌ ചെയ്യും‌. വേണേല്‍‌‍ ഒരു സദ്യവട്ടത്തിനു പോലും തയ്യാര്‍.‌
ഇഷ്ടപ്പെട്ട വാഹനം ഏതാണു് ? (philosophy പറഞ്ഞു ഓവറാക്കണ്ട)	BSA SLR. ആദ്യമായി സ്വന്തമായുണ്ടായ വാഹനമായതിനാലുള്ള ഇഷ്ടം‌. ജിമ്മിലും വായനശാലയിലും പോകാന്‍ എന്നും കൂട്ടുണ്ടായിരുന്നവന്‍. നാട്ടിലെത്തിയാല്‍‌ ഇന്നും‌ ആദ്യം‌‌ കയറാനാഗ്രഹിക്കുന്ന വാഹനം.
കൂട്ടിൽ ചാടിയ മൂങ്ങക്ക് ചിന്താഭാരം ഉണ്ടാകാനുള്ള കാരണങ്ങൾ എന്തായിരുന്നു? അപ്പോൾ മാവോയിസം വീട്ടിൽ ആരെല്ലാം ഉണ്ടായിരുന്നു.	ഇതൊന്നുമറിയില്ല, പക്ഷേ അര്‍ത്ഥവികലമെങ്കിലും ആ പാട്ടിനെ ഇങ്ങനെ മലയാളീകരിച്ച ആ മഹാന്റെ ക്രിയേറ്റിവിറ്റിക്കു ഒരു സലാം.
പരസ്യങ്ങള്‍ താങ്കളെ സ്വാധീനിക്കാറുണ്ടോ? ഉണ്ടേങ്കില്‍ ഏതുവിധത്തില്‍?	എല്‍. ഐ. സി യുടെ ഒരു പരസ്യം സ്വാധീനിച്ചിട്ടുണ്ട്. ഭര്‍ത്താവിന്റെ അഭാവത്തില്‍ മകളെ വിവാഹം കഴിപ്പിച്ചയച്ചതിനുശേഷം ഭര്‍ത്താവിന്റെ ചിത്രത്തിനുമുന്നില്‍ നിന്നു നന്ദി പറയുന്ന ഒരു കുടുംബിനിയുടെ പിക്‌ച്ചറൈസേഷന്‍ ജീവന്‍ശ്രീ പോളിസി എടുക്കാന്‍ സ്വാധീനിച്ചിട്ടുണ്ട്.
പുതിയ blog എഴുത്തുകാർ മലയാളം ബ്ലോഗിലേക്ക് വരുമ്പോൾ എന്തെല്ലാം ചിട്ടകളാണു് സ്വീകരിക്കേണ്ടതു്. അങ്ങനെ ചിട്ടകൾ പാലിക്കേണ്ടതായിട്ടുണ്ടോ?	പ്രത്യേകിച്ചു ചിട്ടകളൊന്നും പാലിക്കേണ്ടതായിട്ടില്ല. ചിട്ടകളെ പൊളിച്ചെഴുതുന്നവര്‍ മാത്രമേ വളരുകയും ഗണിക്കപ്പെടുകയും ചെയ്യൂ. പക്ഷേ പരസ്പരബഹുമാനം ഉണ്ടായിരിക്കണമെന്ന ഒരു ചിട്ട എല്ലാവരും പാലിച്ചിരുന്നെങ്കില്‍ എന്നാഗ്രഹിക്കാറുണ്ട്.
ഒരു ഗ്രാമത്തിൽ ഒരു വിഗ്രഹം കണ്ടെടുത്തു. രണ്ടാം നാൾ ആ വിഗ്രഹത്തിന്റെ വായിൽ (അടുത്തുള്ള ഒരു വിട്ടിൽ വാറ്റിയ) പട്ടചാരായം വെച്ചു കൊടുത്താൽ, ആ വിഗ്രഹം കുടിക്കുന്നതായ മഹ അത്ഭുതം നിങ്ങൾ അറിയുന്നു. പത്രങ്ങൾ ആ വാർത്ത front page ആക്കുന്നു. ജനങ്ങൾ ആ വീട്ടിലേക്ക് തടിച്ചു കൂടുന്നു. നിങ്ങൾ എന്തു ചെയ്യും. 1) ഉടൻ ആ വിട്ടിൽ പോയി നാലു കുപ്പി വിശുദ്ധ പട്ടചാരായം വാങ്ങി വിഗ്രഹത്തിനു് കൊടുക്കാനായി queue നിൽക്കുന്നു. 2) ഇന്ത്യൻ constitution അനുസരിച്ചുള്ള secularism ഉയർത്തിപ്പിടിക്കാനും, വിശ്വാസികളുടെ സ്വാതന്ത്ര്യം അനുവതിച്ചുകൊടുക്കാനുമായി ആ വിട്ടിൽ വിശുദ്ധ പട്ടചാരായം വാറ്റാനുള്ള അവകാശത്തിനു വേണ്ടി, ഇന്ത്യൻ constitution ബഹുമാനിക്കുന്ന ഒരു ഭാരതീയൻ എന്ന നിലയിൽ നിങ്ങൾ പ്രവർത്തിക്കുന്നു. 3) നാലു കന്നാസ് വിശുദ്ധ പട്ടചാരായം വാങ്ങി ഒരു 100ml വിഗ്രഹത്തിനു കൊടുക്കും. ഒരു കന്നാസ് സ്വന്തം വിട്ടിൽ കൊണ്ടു പോകും, ബാക്കി blackൽ വില്കും. 4) ആ വീട്ടിലേക്ക് വിശുദ്ധ പട്ടചാരായം supply ചെയ്യാനായി തൊട്ടടുത്ത് ഒരു distillery തുടങ്ങും. 5) ഇതൊരു തട്ടിപ്പാണെന്നു നിങ്ങൾ വിശ്വസിക്കുന്നു. വിശ്വാസികളായ നാട്ടുകാരുടേ അടി പേടിച്ച്, ഒന്നും ചെയ്യില്ല 6) ഇതൊരു തട്ടിപ്പാണെന്നു നിങ്ങൾ വിശ്വസിക്കുന്നു. പത്രത്തിൽ ഇതേകുറിച്ച് എഴുതും.	ഓപ്‌ഷന്‍‌ അവിടെ നില്‍‌ക്കട്ടെ. ആദ്യം‌ ഡോ. സൂരജിനെ ഫോണില്‍ വിളിക്കും. സമാനചിന്താഗതിക്കാരായ ഒരു പറ്റം ചെറുപ്പക്കാരെ വേറെയും കൂട്ടും. സൂരജ് മൊട കണ്ടാല്‍ ഇടപെടും‌. ഇടപെട്ടാല്‍ പിന്നെ അറിയാമല്ലോ. വിഗ്രഹം തനിയെ ചാരായം കുടി നിര്‍ത്തും. അതിന്റെ ഉടമസ്ഥന്റെ കഥ കട്ടപ്പൊക.
ബ്ലോഗിൽ കാണുന്ന പാചക കുറിപ്പുകൾ പരീക്ഷിച്ച് നോക്കിയിട്ടുണ്ടോ? അതിനു് ഇരയാവരുടേ അഭിപ്രായം എന്തായിരുന്നു.	ബിന്ദുച്ചേച്ചിയുടെ പാചകക്കുറിപ്പു പരീക്ഷിച്ചിട്ടുണ്ട്. 'തീരെ നന്നായിട്ടുണ്ടെന്നു' ബാച്ചി സുഹൃത്തുക്കള്‍. പാചകക്കുറിപ്പില്ലാതെ തന്നെ നല്ല കുശിനിക്കാരനാകയാല്‍ ഇതിന്റെ ഒന്നും ആവശ്യമില്ല.
ആകെ മൊത്തം 35 million മലയാളികളിൽ മാത്രമാണു് ലോകത്ത് ഉള്ളതു്. ഭൂമിയിൽ എല്ലാ കോണിലും ഉണ്ടെന്നുള്ള സ്ഥിരം കേൾക്കാറുള്ള Mythൽ വിശ്വസിക്കുന്നുണ്ടോ? മറ്റു പ്രവാസ സമൂഹങ്ങളെ കാൾ വിത്യസ്തമായി മലയാളിക്ക് എന്താണുള്ളതു്?	മലയാളികള്‍ എല്ലാകോണിലുമുണ്ടെന്നു ആധികാരികമായി പറയില്ല, പക്ഷേ സത്യത്തോടടുത്തു നില്‍ക്കുന്ന ആ മിത്തിനോടു ഒരിഷ്ടമുണ്ട്. മറ്റുള്ള പ്രവാസികളേക്കാള്‍ കൂടുതലായി മലയാളികള്‍ക്കുള്ള പ്രത്യേകത, അവര്‍ തികച്ചും പ്രാദേശികമായും ജാതീയമായും ചിന്തിച്ചുപോകുന്നു എന്നുള്ളതാണ്‌. കൂട്ടുകൂടുന്നതും, മുറി പങ്കിടുന്നതും പോലും സ്വന്തം നാട്ടുകാരുമായാല്‍ നന്നെന്നു കരുതുന്നു. ആദ്യം തെക്കനോ, വടക്കനോ എന്ന്, പിന്നെ ഹിന്ദുവോ, ക്രിസ്ത്യനോ, ഇസ്ലാമോ എന്ന്, ഹിന്ദുവെങ്കില്‍ ജാതി ഏതെന്ന്, ക്രിസ്ത്യനെങ്കില്‍ വിഭാഗമേതെന്ന്‌, ഇങ്ങനെയൊക്കെ ഉള്ളിന്റെഉള്ളില്‍ ആദ്യമേ ഒരു തയ്യാറെടുപ്പു നടത്തുന്നവര്‍ ഭൂരിപക്ഷമാണിവിടങ്ങളില്‍. ഗള്‍ഫുരാജ്യങ്ങളില്‍ പ്രത്യേകിച്ചും. ഇല്ലാത്തവരില്ലെന്നില്ല, എന്നാലും ഇങ്ങനൊക്കെ തന്നെയല്ലേ?
കെ. എസ്. കോപാലകൃഷ്ണൻ എന്തുകൊണ്ടു്, അടൂർ ഗോപാലകൃഷ്ണനെ പോലെയും, പദ്മരാജന പോലെയും സിനിമ എറ്റുക്കുന്നില്ല?	ചോദ്യം തിരിച്ചായിരുന്നു വേണ്ടത്. അടൂര്‍ ഗോപാലകൃഷ്ണന്‍ എന്തുകൊണ്ട് കെ. എസ്സിനെപ്പോലെ സിനിമ എടുക്കിന്നില്ല? കെ. എസ് ഗോപാലകൃഷ്ണനെ ഞങ്ങള്‍‌ 'സാര്‍‌' എന്ന പദവി കൂട്ടി വിളിച്ചിരുന്ന കാലമുണ്ട്. അത്രക്കുണ്ട് കടപ്പാട്.
മലയാള സിനിമയിൽ നിങ്ങളുടെ സ്വഭാവവുമായി സാമ്യമുള്ള കഥാപാത്രം ഏതാണു്	'ഉത്സവപ്പിറ്റേന്നിലെ' അനിയന്‍ തമ്പുരാനെ എന്നുമിഷ്ടം.
ജിവിതം മൊത്തം കേരളത്തിൽ ജിവിച്ചിട്ട് രണ്ടു മാസം അമേരിക്കയിൽ ചുറ്റിതിരിഞ്ഞിട്ടു് തിരികെ നാട്ടിൽ വന്ന ശേഷം "മലയാലം കൊരച് കൊരച് പരയുന്ന"വരെ കണ്ടാൽ എന്തു ചെയ്യും?	മി. ടോം വടക്കന്റെ വീറ്റിലോട്ടു പരഞ്ഞുവിടും. പോകുന്ന വഴിക്ക് നാട്ടിലെ ഉശിരന്‍‌ കുട്ടികളെക്കൊണ്ട് ഇവരെ പച്ച മലയാളത്തില്‍‌ വഴിനീളെ കൂവിക്കും‌.
നിങ്ങളുടെ തൊഴിൽ മേഖല ഏത് ഗണത്തിൽ പെടും. ഉല്പാതനം കച്ചവടം ജന സേവനം വിനിമയം വിദ്യാഭ്യാസം	ലിസ്റ്റിലില്ല, എങ്കിലും ഏതാണ്ടടുത്തുവരുന്നത് വിനിമയം.
ഇന്നു നമ്മുടെ നഗരങ്ങളിൽ യുവാക്കൾ നേരിടുന്ന ഏറ്റവും വലിയ പ്രശ്നം എന്താണു്?	നഗരമേതെന്നുകൂടി അറിയേണം. ഓരോ നഗരത്തിലും ഓരോ തരം പ്രശ്നങ്ങളാണ്‌. ബാംഗലൂരില്‍ ചിലര്‍ക്കു പ്രശ്നം ശ്രീരാമസേനക്കാരാണ്‌.
മലയാള ഭാഷ വളരുകയാണോ, രൂപാന്തരപ്പെടുകയാണോ, വഷളാവുകയാണോ?	ഭാഷ എന്നും രൂപാന്തരപ്പെടുകയേ ചെയ്തിട്ടുള്ളൂ. അതൊരു പ്രൊസെസ്സ് ആണ്‌. സി. വി. രാമന്‍പിള്ളയുടെ മലയാളമല്ല, തകഴിയുടേത്. പൊന്‍കുന്നം വര്‍ക്കിയുടെ ഭാഷയല്ല ഒ. വി. വിജയന്റേത്. സമകാലികരായിരുന്ന ഉള്ളൂരിന്റേയും വള്ളത്തോളിന്റേയും കുമാരനാശാന്റേയും ഭാഷകള്‍‌ വ്യത്യസ്തമായിരുന്നു. ചങ്ങമ്പുഴയുടെ സരളതയെ നെഞ്ചേറ്റിയവര്‍ തന്നെ പാര്‍ശ്വവത്കരിച്ചവന്റെ നാക്കായി വന്ന കടമ്മനിട്ടയെ ശിരസ്സിലേറ്റി. ഭാഷ കാലിക-പ്രാദേശിക സംസ്‌കാരത്തോടൊപ്പം സഞ്ചരിക്കുന്നു. വഷളാക്കുന്നവര്‍ക്കു പോലും വഴങ്ങുന്ന രീതിയില്‍.
മനുഷ്യവാസമില്ലാത്ത ഒരു ദ്വീപിലേക്ക് നിങ്ങളെ ജീവപര്യന്തം നാടുകടത്തപ്പെടാൻ പോവുകയാണെന്നു സങ്കല്പ്പിക്കുക. നിങ്ങൾക്ക് വായിക്കാൻ രണ്ടു പുസ്തകങ്ങൾ കൂടെ കൊണ്ടുപോകാൻ അനുവതിക്കുന്നു. ഏതു് പുസ്തകങ്ങൾ കൊണ്ടുപോകും?	ഏതു പുസ്തകം കൊണ്ടുപോയാലും ദ്വീപിലൊക്കെ ഒറ്റക്കാകുമ്പോള്‍ രണ്ടു ദിവസം കൊണ്ടു തീരും. എന്നാലും വി. കെ. എന്നിന്റെ സമ്പൂര്‍ണ്ണകൃതികള്‍‌ ഉണ്ടെങ്കില്‍‌ ‌അതു കൊണ്ടുപോകും‌. ഖലീല്‍‌ ജിബ്രാന്റെ കവിതാസമാഹാരവും കരുതും‌‌. ലാപ്‌റ്റോപ്പും നെറ്റ്കണക്ഷനും കൂടെക്കൊണ്ടുപൊയ്‌ക്കോട്ടെ?
കേരളത്തിൽ ഇപ്പോൾ ടിവി. പ്രേക്ഷരുടെ ഹരമായ റിയാലിറ്റി ഷോ എന്നറിയപ്പെടുന്ന അനേകം മത്സര പരമ്പരകളുണ്ടു്. താങ്കൾക്ക് ഒരു സാമാന്യം ഭേതപ്പെട്ട ഗായിക/ഗായകൻ ആണെന്നു സങ്കൽപ്പിക്കുക. താങ്കൾ ഈ മത്സരങ്ങളിൽ പങ്കെടുക്കുമോ? എന്തുകൊണ്ടു?	കഴിവുണ്ടായിരുന്നെങ്കില്‍ തീര്‍ച്ചയായും പങ്കെടുക്കുമായിരുന്നു. എപ്പോഴാ ഭാ‍ഗ്യം‌ വരിക എന്നാരു കണ്ടൂ? സമ്പത്തും ഭാഗ്യവും ഒന്നിച്ചുചേര്‍ന്നാല്‍ സങ്കല്‍പ്പം പോലെല്ലാം സാധിക്കുമെന്നല്ലേ അതാണ്‌, അതുകൊണ്ടുമാത്രം. ഇത്തിരി കാശൊത്താല്‍ ഈ പ്രവാസമങ്ങു അവസാനിപ്പിക്കാരുന്നൂ‍.
നിങ്ങളുടേ മുന്നിൽ മൂന്നു buttonകളു ഉണ്ട്. അമർത്തിയാൽ ഈ ലോകത്തിലുള്ള ഏകാധിപതികൾ എല്ലാം നിന്ന നിൽപ്പിൽ തന്നെ ചത്തു് വീഴും. അമർത്തിയാൽ മലയാള മനോരമ പത്രം ഒറ്റ് രാത്രികൊണ്ടു Unicodeലേക്ക് മാറും. അമർത്തിയാൽ (ഇടിവാളിന്റെ ആഗ്രം സഫലമാകും) ബ്ലോഗിൽ ഉള്ള ഓർമ്മ കുറിപ്പിസ്റ്റുകൾക്കെല്ലാം "Amoniasia" വന്നു് എല്ലാം മറന്നു പോകും. ഇതിൽ ഒന്നുമാത്രമെ അമർത്താൻ കഴിയുകയുള്ളു. നിങ്ങൾ ഏതമർത്തും.? എന്തുകൊണ്ടു?"	അടിമകളുടെ ഹൃദയം‌ ‌ കൊണ്ടു പിരമിഡുകള്‍ പണിഞ്ഞ ഏകാ‍ധിപതികള്‍‌ ഇന്നുണ്ടോ? ദുര്‍‌ബ്ബലന്റെ അസ്‌ഥിക്കുമേല്‍‌ ബാബിലോണ്‍‌ പണിഞ്ഞ അധികാരികള്‍‌ ഇന്നുണ്ടോ? ദരിദ്രന്റെ ശവകുടീരങ്ങള്‍‌ക്കു മുകളില്‍‌ കൊട്ടാരങ്ങള്‍‌‌ പണിഞ്ഞവരോ? ഉണ്ടെങ്കില്‍‌ നശിക്കട്ടെ. ആദ്യത്തേതു തന്നെ അമര്‍‌ത്തും‌. പിന്നെ മനോരമ, WHO CARES? എന്തമര്‍ത്തിയാലും ബട്ടണ്‍ 3 അമര്‍ത്തില്ല. I CARE THEM.
ഇവരിൽ താങ്കൾക്ക് ആരെയാണു് കൂടുതൽ ബഹുമാനം: K. കരുണാകരൻ, EMS, AKG, സി.എച്ച്. മുഹമ്മദ്കോയ, മന്നത്ത് പത്മനാഭൻ, പാണക്കാട് സയ്യിദ് മുഹമ്മദലി ഷിഹാബ് തങ്ങൾ. Dr. പല്പ്പു. വെള്ളാപ്പള്ളി നടേശൻ	ഇഷ്ടമുള്ള ആളിന്റെ പേര്‍ ഈ ലിസ്റ്റിലില്ല. സഖാവ് പി. കൃഷ്ണപിള്ള. കിടന്നുറങ്ങാന്‍ പായ ഇല്ലാതെ ചാണകം മെഴുകിയ തറയില്‍ കിടന്നുറങ്ങിയിരുന്ന തൊഴിലാളികള്‍ക്ക് ടൌണില്‍ നിന്നും പുല്‍പ്പായ വാങ്ങി തോളില്‍ വെച്ചു പാടവരമ്പിലൂടെ നടന്ന് വീടുകളിലെത്തിച്ചുകൊടുത്ത അദ്ദേഹത്തേക്കാള്‍ ബഹുമാനം ഈ ലിസ്റ്റിലുള്ള ആരോടും തോന്നുന്നില്ല. My Hero. പുച്ഛം തോന്നുന്ന ചിലര്‍ ഈ ലിസ്റ്റിലുണ്ടു താനും.
ഏറ്റവും ഭാഗ്യവാനായ മനുഷ്യന്‍ ആരാണ്?	അംഗവൈകല്യങ്ങളും മഹാരോഗങ്ങളൊന്നുമില്ലാത്തവരെല്ലാം ഭാഗ്യവാന്‍മാര്‍ തന്നെ. മുകളിലേക്കു നോക്കി അസൂയപ്പെടുന്നവര്‍ മാത്രമേ നിര്‍ഭാഗ്യത്തെക്കുറിച്ചു ചിന്തിക്കുന്നുള്ളൂ. താഴേക്കു നോക്കി ആശ്വസിക്കുന്നവര്‍ എല്ലാവരും ഭാഗ്യവാന്‍മാര്‍.
നിങ്ങളെ അടുത്തറിഞ്ഞ സുഹൃത്തുക്കൾ എങ്ങനെ കരുതുന്നു. 1) ഒരു പാവം 2) കൊച്ചു ഗള്ളൻ 3) പുലി 4) പാമ്പ് 5) തമാശക്കാാാാാാാരൻ 6) തണ്ണിച്ചായൻ 7) കുൾസ് 8) പൊടിയൻ 9) തടിയൻ ഇതിൽ പെടാത്ത ഏതെങ്കിലും പേരുണ്ടെങ്കിൽ അതും എഴുതാം.	മാന്യന്‍‌ (അയ്യപ്പ ബൈജു പറയുന്നതുപോലുള്ള മാന്യന്‍)
ഇന്ത്യയുടേയും ചൈനയുടേയും സാമ്പത്തീക മുന്നേറ്റത്തിൽ ഇവിടങ്ങളിലെ ഉയർന്ന ജനസംഖ്യയും ഒരു ഘടകമാണെന്ന് താങ്കൾ വിശ്വസിക്കുന്നുവോ?	ക്യൂബ മുകുന്ദനെപ്പോലെ, ചൈനയുടെ കാര്യത്തില്‍ വേണമെങ്കില്‍ വിശ്വസിക്കാം. പക്ഷേ ഇന്ത്യ??
ബ്ലോഗിൽ പോട്ടങ്ങൾ പിടിക്കുന്ന ഏതെങ്കിലും അണ്ണന്റെ ഫോട്ടോ നിരൂപണങ്ങൾ കേട്ട ശേഷം അദ്ദേഹത്തിന്റെ തലയിൽ കാമറ തല്ലി പോട്ടിക്കാൻ തോന്നിയിട്ടുണ്ടോ? (തല്ലിപ്പോട്ടിക്കാൻ ഉദ്ദേശിച്ച camera, lense, എന്നീ വിവരങ്ങൾ കൂടി വിശതീകരിക്കുക)	ഇല്ല. ഇല്ലേയില്ല. ഫോട്ടോ ബ്ലോഗ് എല്ലാം ഇഷ്ടം. ഉന്‍മേഷ്‌ ദസ്തക്കിറിനെ, തുളസി കക്കാട്ടിനെ, അപ്പുവിനെ, നന്ദകുമാറിനെ, ശിവയെ, ശ്രീലാലിനെ, കുമാറിനെ, കൈപ്പള്ളിയെ..കലക്കമില്ലാത്ത കാഴ്ച്ചകള്‍ തരുന്ന നിരവധി അനവധി ബ്ലോഗേര്‍സിനെ. ഇവരൊക്കെ ദിവസക്കാഴ്ചകള്‍ പോലെ ഈ ബ്ലോഗിലിങ്ങനെയുണ്ടാവുക എന്നതാണ്‌ എന്നും ഇഷ്ടം.
നിങ്ങൾ പ്രധാന മന്ത്രിയാകുന്നു. എന്തു ചെയ്യും?	ഉപജാപകവൃന്ദങ്ങളുടെ സ്‌തുതിഗീതം അവസാനിപ്പിക്കും. മന്ത്രിമാരെ മന്ത്രിമന്ദിരങ്ങളില്‍ നിന്നും നിര്‍ബന്ധപൂര്‍വം ജനമധ്യത്തിലേക്കിറക്കും. ഇവിടുന്നു തുടങ്ങി പിന്നെ നിരവധി പണികളുണ്ട്. പേജു പോരാ കൈപ്പള്ളീ. അപരാധിഷുയോദണ്ഡ: സ രാഷ്ട്രസ്യ വിശുദ്ധയേ വിനായേന ച സന്ദേഹോ‍ മാത്സ്യന്യായ: പ്രവര്‍‌ത്തതേ രാജ്യശുദ്ധി ചെയ്യാനായി കുറ്റക്കാരെ മാതൃകാപരമായി ശിക്ഷിക്കണം. അല്ലെങ്കില്‍‌ ആ രാജ്യത്ത് മാത്സ്യന്യായമായിരിക്കും‌ നടമാടുക. ബലവാനായ വലിയ മത്സ്യങ്ങള്‍‌ ചെറിയ ചെറിയ മത്സ്യങ്ങളെ ഭക്ഷിക്കുന്ന രീതിയാണ്‌ മാത്സ്യന്യായം. ബലവാന്‍‌മാരായ ആളുകള്‍ ദുര്‍‌ബലരായ സാധുക്കളെ ഹിം‌സിക്കുന്നതും‌‌ പീഡിപ്പിക്കുന്നതും‌ ‌ തടയാന്‍‌ ഗര്‍‌ഗമുനിയുടെ ഈ വാ‍ക്കുകളെ കടമെടുത്തു ഭരണം‌ നടത്തും. വെറുതെയാണീ മോഹമെന്നറിയുമ്പോഴും.......
നിങ്ങൾക്ക് മൂന്നു വരം കിട്ടുന്നു എന്തെല്ലാം അവശ്യപ്പെടും? (കൂടുതൽ വരം കുട്ടാനുള്ള വരം ഇപ്പോൾ stockൽ ഇല്ല. അതു ചോദിച്ച് ചളമാക്കരുതു്)	ദൈവം വരം തരുമെന്നു വിശ്വസിക്കുന്നില്ല. പിന്നെ സങ്കല്‍പ്പിക്കാനാണല്ലോ പറഞ്ഞത്,ആയതിനാല്‍, മരണം വരെ താന്‍ ആഗ്രഹിക്കുന്ന കാര്യങ്ങള്‍ ആഗ്രഹിക്കുന്ന രീതിയില്‍‌ പരിണാമഗുപ്തിയിലെത്താനുള്ള ഒരേ ഒരു വരം മാത്രം.
കേരളത്തിൽ beef നിരോധിച്ചാൽ നിങ്ങൾ എന്തു് ചെയ്യും?	പശു നമ്മുടെ ഗോമാതാവല്ലേ? നിരോധിക്കണമെന്നാണ്‌ അഭിപ്രായം. കൂടുതല്‍ ദാഹശമനികളുണ്ടാകട്ടെ. ഗോവധം നിരോധിച്ചാലും പോത്തും എരുമയുമൊക്കെ ഉണ്ടാവില്ലേ? പിന്നെ തൊട്ടടുത്തല്ലേ തമിഴ്‌നാട്? ബീഫ്‌ നിരോധിച്ചാല്‍‌ ബ്ലാക്കില്‍‌ ഇതൊക്കെ നാട്ടില്‍‌ കിട്ടും‌. ഓഫ്: കഷ്ടം, കൃഷ്ണന്റത്രേം സ്റ്റാര്‍വാല്യൂ ‘കാല‘നില്ലാത്തതുകൊണ്ടാണോ, അദ്ദേഹത്തിന്റെ വാഹനത്തിനുവേണ്ടി ആരുമിറങ്ങാത്തത്? വിവിധ ജീവികളില്‍ ജീവശ്വാസം വിവിധതരത്തിലാണോ? ചില കൊലകള്‍ പുണ്യവും ചില കൊലകള്‍ പാപവുമാകുന്നതിന്റെ യുക്തി...!!?
1 Billion US$ നിങ്ങൾക്ക് ലഭിക്കുന്നു എന്തു ചെയ്യും	മുതലാളിയാകാനിഷ്ടമില്ല. ഒരു ബില്യണ്‍ കൊണ്ട് ലോകത്തിന്റെ ദാരിദ്ര്യവും തീരില്ല. എങ്കിലും കിട്ടിയാല്‍, മധ്യവര്‍ത്തികളില്ലാതെ, രാജ്യത്തിന്റെ ഓരോ മൂലയിലും കുടിവെള്ളമെത്തിക്കാനുള്ള പദ്ധതിക്കായി നേരിട്ടു ചിലവാക്കും. ആണിന്നു ചന്തികഴുകാന്‍ പോലും ദൂരെ നിന്നു വെള്ളം ചുമന്നുകൊണ്ടുക്കൊടുക്കേണ്ടി വരുന്ന കേരളത്തിലേയും ഇതര ദക്ഷിണഭാരതത്തിലേയും, ഉത്തരേന്ത്യയിലേയും അമ്മമാരെ/ഭാര്യമാരെ നിത്യദുരിതത്തില്‍ നിന്നും രക്ഷിക്കും.
പ്രാവാസ ജീവിതത്തിൽ എന്തെങ്കിലും നഷടമായിട്ടുണ്ടോ?	മുത്തശ്ശിയുടെ മടിയില്‍ കിടന്നുള്ള ഉച്ചയുറക്കം. അതിനിടയിലുണ്ടാകുന്ന മുത്തശ്ശിയുടെ പഴംപുരാണം കേള്‍ക്കല്‍. മുത്തശ്ശിയുടെ അടുത്തെത്തുന്ന ചുറ്റുവട്ടത്തെ സ്‌ത്രീകളുടെ പരദൂഷണം പറച്ചില്‍‌. കഥകള്‍ക്കു മറുകഥകളുണ്ടാക്കല്‍. ദശരഥന്‍ കരഞ്ഞു പറഞ്ഞിട്ടും, അനുജന്‍ ഭരതന്‍ കാലുപിടിച്ചു പറഞ്ഞിട്ടും, അനുസരിക്കാതെ ഭാര്യയേയും കൂട്ടി വനത്തിലേക്കു ഹണീമൂണ്‍ പോയ രാമനെ കളിയാക്കുമ്പോള്‍ ഭയപ്പാടോടെ ദൈവത്തെ വിളിക്കുന്ന മുത്തശ്ശിയെയാണ്‌ ഏറ്റവും കൂടുതല്‍ നഷ്ടപ്പെട്ടത്. പിന്നെ ചാരുകസേരയില്‍ കിടന്നുള്ള പുസ്തകവായനയും‌.
രാഷ്ട്രീയക്കാരെ ഇഷ്ടമാണൊ? ഈ ഇലക്ഷന്‍ കാലത്ത് താങ്കള്‍ നാട്ടിലുണ്ടെന്നും ഒരു സ്ഥാനാര്‍ത്ഥി വോട്ട് ചോദിച്ച് വീട്ടില്‍ വരുന്നുവെന്നും കരുതുക.എന്തു പറയും?	എല്ലാവരേയും‌‌ ഇഷ്ടമാണ്‌. സന്തോഷത്തോടെ സംസാരിക്കും. ആര്‍ക്കായിരിക്കും വോട്ടെന്നു കൂടെ വരുന്ന നാട്ടുകാര്‍ക്കെന്തായാലും അറിയാം.
Mark Twain, R.K. Narayan, Basheer. ഇവർ മൂന്നുപേരും ഒരു restaurantൽ വെച്ചു കണ്ടു മുട്ടുന്നു. എന്തു സംഭവിക്കും?	ഒരു കട്ടന്‍‌ ചായ കുടിച്ചുകൊണ്ട്‌ ബഷീര്‍ തീര്‍ച്ചയായും മാല്‍ഗുഡി ഡേയ്‌സ് അലസമായി വായിക്കും. ഒരു ബീഡി വലിച്ചുകൊണ്ട്‌ സ്വേയര്‍‌ എന്ന പഹയന്റെ സാഹസികതയെക്കുറിച്ചു മാര്‍ക്കിനോടു ചെറുതായി അന്വേഷിക്കും‌. അതുറപ്പായ കാര്യം. മറ്റുള്ളവരുടെ ശരീരഭാഷ വശമില്ല.
നിങ്ങൾ Dinnerനു് ഈ പട്ടികയിൽ കൊടുത്തിരിക്കുന്ന രണ്ടു പേരിൽ ആരെ ക്ഷനിക്കും? അവർക്ക് എന്തു ഭക്ഷണം കൊടുക്കും? അവരോടു എന്തെല്ലാം ചോദിക്കും? 1) ഇന്ദിര ഗാന്ധി 2) K.J. Yesudas 3) കാട്ടുകള്ളൻ വീരപ്പൻ 4) മാമുക്കോയ 5) കൊച്ചുത്രേസ്യ 6) അടൂർ ഭാസി 7) Amjad Khan 8) Jimmy Wales 9) Mother Theresa 10) Khalil Gibran 11) Sister Alphonsa 12) കുറുമാൻ 13) കലാഭവൻ മണി 14) സ്റ്റീവ് മൿ-കറി 15) Charles Dickens 16) Kuldip Nayar 17) Arundhati Roy 18) Charlie Chaplin 19) R.K. Lakshman (cartoonist) 20) ഇഞ്ചിപ്പെണ്ണു്	R. K. Lakshman-നെ വിളിക്കും. ഉഡുപ്പി സ്‌റ്റൈലിലെ 'താലി' കൊടുക്കും. എന്നിട്ടു ആ കോമണ്‍മാനെ സൃഷ്ടിക്കാനുണ്ടായ കഥ ചോദിച്ചറിയും. ഇന്ദിരാഗാന്ധിയെ വരയ്‌ക്കാന്‍ ഒന്നു പഠിപ്പിക്കാന്‍ പറയും. Khalil Gibran - കുരിശേറിയ ദേവന്റെ മാതാവായ മേരിയുടെ വ്യാകുലതയെക്കുറിച്ചു പറയുന്നവരുടെ ഇടയില്‍ നിന്നു ആത്മഹത്യ ചെയ്ത യൂദാസിന്റെ അമ്മയായ സൈബോറിയയുടെ കരച്ചിലിനെ തിരിച്ചറിഞ്ഞ ആ മനുഷ്യസ്‌നേഹത്തിനുമുന്നില്‍ നമസ്‌കരിക്കും. മകന്‍ നഷ്ടപ്പെട്ട അമ്മമാരുടെ വേദനയെ ഒരേ തട്ടിലിട്ടു അളന്നവന്റെ സമഷ്ടിക്കു മുന്നില്‍ മുന്തിരി ഇലയില്‍ പൊതിഞ്ഞ ഒലിവിന്‍കായകള്‍ സമര്‍‌‌പ്പിക്കും‌.
Nostalgia-mania-dingolapi എന്ന അതിഭീകരവും ഭയാനകവുമായ രോഗം ബാദിച്ച മലയാളി ചേട്ടന്മാരെ എങ്ങനെ ചികിത്സിക്കും? ഇവരെ ബീമ പള്ളിയിൽ കൊണ്ടുപോയി ചങ്ങലക്കിടുന്നതിനെ കുറിച്ച് എന്താണു് അഭിപ്രായം.	ഈ ഡിങ്കോലാഫി ഇല്ലെങ്കില്‍ ബ്ലോഗില്ലാ എന്നു കൈപ്പള്ളിക്കറിയില്ലേ? എന്നിട്ടും? അഥവാ ഇതു രോഗമാണെങ്കില്‍ അതിനുള്ള മരുന്ന് ബ്ലോഗെഴുത്തു തന്നെയാണ്‌. അക്ഷരങ്ങളുടെ ചങ്ങലക്കുടുക്കില്‍ കിടന്ന് അവര്‍ അങ്ങനെ തിമിര്‍ക്കട്ടെ. ചിലപ്പോള്‍ അസുഖവും ഒരു സുഖമാണ്‌ കൈപ്പള്ളീ. അല്‍പ്പം ശാസ്ത്രം: നൊസ്റ്റാള്‍ജിയ പണ്ടു കാലത്ത് ഇന്നത്തെ വിഷാദരോഗം പോലെയുള്ള ഒരു അസുഖമായിട്ടാണു കണക്കാക്കിയിരുന്നതെന്നു കേട്ടിട്ടുണ്ട്. കഴിഞ്ഞ തലമുറയോടും കൊഴിഞ്ഞ കാലത്തോടുമുള്ള ഒരു ആദരവിന്റെ കണക്കില്‍ അതു പിന്നെ മനുഷ്യന്റെ ജനിതകവിശേഷമായി ജനറലൈസുചെയ്തുപോയതാണ്‌. ഇന്നു നൊസ്റ്റാള്‍ജിയ ഒരു അസുഖമല്ല, സുഖമാണ്‌.
നിങ്ങൾ ഇപ്പോൾ ഇരിക്കുന്ന സ്ഥലത്തുള്ള ജനാലയിൽ നിന്നും പുറത്തേക്ക് നോക്കുക. അവിടെ കാണുന്ന ദൃശ്യം 100 വാക്കിൽ കുറയാതെ വിവരിക്കുക.	റോഡിനോടു അരികുചേര്‍ന്ന്‌ പണിയുന്ന കോണ്‍ക്രീറ്റ് കൂടാരത്തിനു മുകളില്‍ ക്രെയിനില്‍ കയറിപ്പണിയുന്ന എന്റെ സഹോദരങ്ങളെ ഞാന്‍ കാണുന്നുണ്ട്. എനിക്കെഴുതാന്‍ 100 വാക്കുകള്‍ പോര.
ബ്ലോഗിൽ അവസാനമായ എഴുതിയ post എന്തിനെഴുതി? ഇനിയും എഴുതുമോ?	ഒരു വായനയുടെ അവശിഷ്ടമായി കിട്ടിയവ എഴുതി വെച്ചു. അത്രമാത്രം. ഇനിയും എഴുതും.
ബ്ലോഗിൽ അവസാനമായി വായിച്ച ലേഖനം ഏതാണു്?	ജീവന്‍, ആഹാരം, ഊര്‍ജ്ജം, കോസ്‌മോളജി എന്ന ശ്രീഹരിയുടെ ഉജ്ജ്വലമായ പോസ്റ്റ്‌.
ബ്ലോഗിൽ അവസാനമായി വായിച്ച അതുന്താധുനിക കവിത വായിച്ച ശേഷം നിങ്ങൾ എന്തു ചെയ്തു? കരഞ്ഞു. ചിരിച്ചോ. തലകറങ്ങി നിലത്തു വീണു്. എഴുതിയവനെ ഫോണിൽ വിളിച്ചു തെറി പറഞ്ഞു. മുകളിൽ പറഞ്ഞ എല്ലാം സംഭവിച്ചു് എന്നു് ഭ്രാന്താശുപത്രിയിൽ എത്തിയപ്പോൾ സുഹൃത്തുക്കൾ പറഞ്ഞു.	കവിതയുടെ ധര്‍മ്മങ്ങള്‍ പാലിക്കാത്ത നിരവധി ആധുനിക കവിതകള്‍ കണ്ടിട്ടുണ്ട്. പക്ഷേ ആ ഒരെഴുത്തുപോലും, ഒരു ഹൃദയത്തിന്റെ ഭാവമാണെന്നും, ഭാഷയോടുള്ള സ്‌നേഹമാണെന്നുമുള്ള തിരിച്ചറിവില്‍ അവയെ ഉള്‍ക്കൊള്ളാറുണ്ട്. എത്രമാത്രം സ്വീകാര്യമായിരിക്കുമെന്നറിവില്ലാത്തതിനാല്‍ കമന്റിലൂടെ ഉപദേശിക്കാന്‍ ഇഷ്ടമില്ല.
ഒരു hotelൽ രണ്ടു blog meet നടക്കുന്നു. അതിൽ ഒരു barൽ ബ്ലോഗ് കവികളും വേറൊരു barൽ ബ്ലോഗ് ഓർമ്മക്കുറുപ്പ്istകളും ഉണ്ടു്. നിങ്ങൾ ഏതു barൽ കയറും.	കവികളുടെ ബ്ലോഗില്‍ കയറും. കവിതയോടാണു ഇഷ്ടം കൂടുതല്‍. ഓര്‍മ്മക്കുറിപ്പിസ്‌റ്റുകളുടെ കൂട്ടത്തില്‍ അത്ര സജീവമല്ലാത്ത 'പുനര്‍ജ്ജനി' എന്ന ബ്ലോഗറെ (http://punarjjani.blogspot.com) കാണണമെന്നൊരാഗ്രഹമുണ്ട് . അവിടെയുണ്ടൊ എന്ന് അന്വേഷിക്കും. കണ്ടുമുട്ടിയാല്‍‌ മകന്‍‌ പരീക്ഷക്കു തോല്‍‌ക്കാന്‍‌ പ്രാര്‍‌ത്ഥിച്ച അമ്മയുടെ മകനു ഒരു കൈകൊടുക്കും‌.
നിങ്ങൾ കൈപ്പള്ളിയെ കണ്ടു മുട്ടുന്നു. എന്തു ചോദിക്കും? (കാശു്, sandwich, വാച്ച്, മോതിരം, ഫോൺ, ചെരുപ്പ് മുതലായവ ചോദിക്കരുതു്)	ഹെന്റെ മാഷേ, ഈ ബൂലോക ഐഡിയ എവിടെ നിന്നു കിട്ടി എന്നു? ഇങ്ങനെ ഒരു കൂട്ടായ്മ ഉണ്ടാക്കുന്നതിനു നന്ദിയും‌ അറിയിക്കും. പിന്നെ സന്തോഷ് ഹെയര്‍‌‌ടോണ്‍ ആണോ ഉപയോഗിക്കുന്നതെന്നും??
ഒരു International blog meet വിളിച്ചു കൂട്ടുന്നു. അതിനായി കാര്യപരിപാടികൾ അവതരിപ്പിക്കാൻ ആരെയെല്ലാം ഉൾപെടുത്തും? എന്തെല്ലാം പരിപാടികൾ ഉണ്ടായിരിക്കും?	പ്രോഗ്രാം കോ-ഓര്‍ഡിനേഷനോ, ടെക്‌നിക്കാലിറ്റിയോ വശമില്ല. പരിപാടി എന്തായാലും അപ്പുവിനേയും കൈപ്പള്ളിയേയും ഉള്‍പ്പെടുത്തണേ എന്നു അറിയാവുന്നവരോടൊക്കെ പറയും.
ബ്ലോഗിൽ ആരംഭിക്കുന്ന സൌഹൃദങ്ങളെ താങ്കൾ എങ്ങനെ കാണുന്നു? (കണ്ണു കൊണ്ടു കാണുന്നു എന്നു പറയരുത്, ബാക്കി എല്ലാവരും മൂക്കു കൊണ്ടാണോ കാണുന്നതു്?)	കൈപ്പള്ളിയുടെ ‘ഇതാരുടെ പുസ്തകശേഖരവും‘ ഈ ചോദ്യാവലിയും കണ്ടതിനുശേഷം കാഴ്ചപ്പാടില്‍ വ്യത്യാസമുണ്ടായി. ഒരാളെ അയാളുടെ അഭിപ്രായത്തിന്റെ പേരില്‍, നിലകൊള്ളുന്ന ആശയത്തിന്റെ പേരില്‍, വായിക്കുന്ന പുസ്തകങ്ങളുടെ പേരില്‍ തിരിച്ചറിയാനാകുംവിധം ആഴമുള്ള സൌഹൃദമാണ്‌ ബ്ലോഗ് വഴി ഉണ്ടാകുന്നതെന്നു മനസ്സിലായി.
ഈ പറയുന്ന എഴുത്തുകാരിൽ നിങ്ങളെ സ്വാധീനിച്ച എഴുത്തുകാരൻ/കാരി ആരാണു്: മാധവികുട്ടി, എം. മുകുന്ദൻ, സാറ ജോസഫ്, സക്കറിയ, ഓ.വി. വിജയൻ, ബഷീർ, ആനന്ദ്, വി.കെ.എൻ, തകഴി, എം.ടി വാസുദേവൻ നായർ, പെരുമ്പടവം, വിശാലമനസ്ക്കൻ, കുറുമാൻ, ഓ.എൻ.വീ കുറുപ്പ്, കുമാരനാശാൻ.	മാധവിക്കുട്ടി. വി. കെ. എന്‍. എം. ടി. സ്‌കൂളില്‍ പഠിക്കുന്ന കാലത്ത് എം. ടി. യുടെ 'ഒരു പിറന്നാളിന്റെ ഓര്‍മ്മയ്ക്കു' വായിച്ചു തലയിണയില്‍ അമര്‍ന്നുകിടന്നു കരഞ്ഞത്, ദേ ഇന്നലത്തെപ്പോലെ ഓര്‍ക്കുന്നു. ദാരിദ്ര്യമുള്ള സഹപാഠികളെ കൂടുതല്‍ സ്‌നേഹിക്കാനും, അവര്‍ക്കു മുന വെട്ടാത്ത പുത്തന്‍ പെന്‍സിലും മറ്റും കൊണ്ടുക്കൊടുക്കാനും ഈ കഥ സ്വാധീനിച്ചിട്ടുണ്ട്.
കാട്ടിലാണോ ഉത്സവപറമ്പിലാണോ ആനകളെ കാണാൻ കൂടുതൽ ഭംഗി?	ആനക്കു ഭംഗി കാട്ടില്‍ തന്നെ. എത്ര അലങ്കാരത്തോടെയാണെങ്കിലും‌ ഉത്സവപ്പറമ്പിലെ ആന വേദനയും‌ ഭീതിയുമാണ്. നെറ്റിപ്പട്ടത്തിനിടയില്‍, മുത്തുക്കുടക്കു താഴെ, തീവെട്ടിയുടെ ചൂടേറ്റുനില്‍‌ക്കുന്ന നനഞ്ഞ കണ്ണുള്ള ആന ഒരു വലിയ ദു‌:ഖമാണ്. പിന്നെ മനുഷ്യനെപ്പോലും തനതുരൂപത്തില്‍ കാണാനല്ലേ എല്ലാവരും ആഗ്രഹിക്കുന്നത്. കാഴ്ചകള്ക്കു ഭംഗി തികയാഞ്ഞതിനാലാണ്‌ മനുഷ്യന്‍ പലയിടങ്ങളിലും എത്തിനോക്കുന്നവനായി മാറിപ്പോയത് എന്നെവിടെയോ വായിച്ചിട്ടുണ്ട്.
ആരുടേയും ബ്ലോഗുകൾ വേണമെങ്കിലും താങ്കൾക്ക് ഡിലീറ്റ് ചെയ്യാം എന്നൊരു അവകാശം ലഭിച്ചാൽ ആദ്യം താങ്കൾ ഡിലീറ്റ് ചെയ്യുന്ന 5 ബ്ലോഗുകളുടെ പേരു പറയുക?	ഈ ചോദ്യാവലിയില്‍ വിഷമം തോന്നിപ്പിച്ച ചോദ്യം. ഏതവകാശത്തിന്റെ പേരിലായാലും ഒരിക്കലും ആരുടേയും വ്യക്തിസ്വാതന്ത്ര്യത്തില്‍ അപരന്നു അനുവാദമുണ്ടാകരുത്. ഇല്ല.ഒരിക്കലും ആരുടേയും ബ്ലോഗ് ഡിലിറ്റ് ചെയ്യില്ല.
അടുത്ത മത്സരത്തിനു് ചോദിക്കേണ്ട ഒരു ചോദ്യം നിർദ്ദേശിക്കു.